وتار

ره‌وتێك بۆ گۆڕین

10/24/2021 10:41:00 AM 624 جار خوێندراوەتەوە
ئەحمەد حەمە ساڵح

لە ئایاری ٢٠١٨بابەتێکم بەوناونیشانەی سەرەوە بڵاوکردەوە،لەئیمڕۆدا و لە ده‌رئه‌نجامەکانی هه‌ڵبژاردنەوە، بە پێويستمزانی بە هه‌مان ناونیشان وبە دەستکاریەوە، دووبارە ئەم بابەتە بنوسمەوە.

لەکتێکدا،کەنوێبونه‌وه‌ و گۆڕانكاری‌ و به‌هێزبونی‌ پێگه‌ سیاسی‌، ئابوری‌، ڕۆشنبیری وكۆمه‌ڵایه‌تەکانی‌ هه‌ر نه‌وه‌یه‌ك به‌ (10) ساڵ ئه‌ژمار بكرێت،ئه‌وا چه‌ند ده‌یه‌یه‌كه‌،لەلای ئێمە چه‌مكه‌كانی‌ (نیشتیمانیبون،هاوڵاتیبون، دیموكراتی‌،یاسا،ئاشتی‌، ئازادی‌ و دادوه‌رێتی‌)،له‌ بازنه‌كانی‌ یه‌كتر قبوڵنه‌كردن و قۆرخکاری و تاڵانكاری‌ و چه‌واشه‌كاریدا،كه‌وتونه‌ته‌ به‌رده‌م به‌رداشەکانی سالارێتیەوه‌،تا لەدرۆسازیدا وله‌ كۆی‌ دزیه‌كانی‌ داهات و ده‌نگ و ئیراده‌وه‌ بازنه‌كانی‌ ناڕونی‌ و نائارامی‌ و ناته‌بایی‌ فراوانتربون وساڵانێکە وڕۆژانە لاپه‌ڕه‌یه‌كی‌ تر له‌ مێژوی‌ نائومێدی‌ نیشتیمانی‌ تۆماركراو دەکرێت.له‌م  ره‌وشه‌ ناڕۆشن و بەردەوامی خولانەوە لەنێوبازنە داخراوەکاندا،به‌پێوسیتمزانی‌ بۆچوونێك له‌ پێناو ئاینده‌ی نیشتیمانیدا بده‌م به‌ گوێی‌ كۆی‌ تاک و لایەن وهێزه‌ نیشتیمانی وگۆڕانخواز وچاكه‌خواز و ئاشتی‌ خوازه‌كاندا، تا په‌نجه‌ره‌ی‌ روانینه‌كان فراوان بكه‌ین وده‌رگای‌ كاری‌ پێكه‌وه‌یی‌ بكه‌نه‌وە

سه‌لمێنراوه‌ كه‌ بارودۆخی‌ مرۆڤایه‌تی‌، رامیاری‌،كۆمه‌ڵایه‌تی‌، ئابوری‌ له‌خۆیه‌وه‌ ناگۆڕێ‌،بەڵکو له‌ ژێر كاریگه‌ریەکاندا  گۆڕانكاری‌ دێته‌ كایه‌وه‌،بۆ هێزی نیشتیمانی ،كه‌ بیانه‌وێ‌ چینایه‌تی‌ و دواکەوتوویی‌ بگۆڕن به‌ كۆمه‌ڵگایه‌كی‌ یه‌كسان و پێشكه‌وتو، پێویستە لە بەرەی گەلدا به‌رژه‌وه‌ندی‌ هاوڵاتیبوون وهانیشتیمانیبون مایه‌ی‌ خه‌باتی‌ بێوچان بێت،تا نیشتیمانی‌ به‌جێماو له‌ كاروانی‌ شارستانی‌ بگۆڕن به‌ نیشتیمانێكی‌ ئازاد و ئاوه‌دان و گه‌شه‌سه‌ندو، ئه‌مه‌ش كاری‌ كۆی‌ هێزه‌ مه‌ده‌نیه‌كان و گۆڕانخواز و چاكه‌خواز و ئاشتی‌ خوازه‌كانه‌، له‌ ده‌ستپێكدا پێویسته‌ به‌ره‌ی‌ نیشتیمانی‌ بەرامبەربەرەی سالارێتیە نانیشتیمانیەکان،بوێرانە و ڕاستگۆیانە بێنە مەیدانی کاروخەباتەوە،لێره‌وه‌ به‌رده‌وام كار بۆ فراوانكردنی‌ به‌ره‌ی‌ نیشتیمانی بكرێ‌، به‌ره‌ی‌ نیشتیمانی مه‌به‌ستم هه‌موانه‌، هه‌موان له‌ بازنه‌ی‌ هاوڵاتیبوون و هاونیشتیمانیبوندا به‌یه‌كه‌وه‌ كۆی‌ هێزن، له‌ هێزدا مه‌به‌ستم هێزی‌ سه‌ربازی‌ و كۆی‌ توانا مرۆییه‌كانه‌ كه‌ به‌ هێزی‌ نه‌رم ناو ده‌برێن، پێویسته‌ كۆی‌ هێزه‌كانیش ببنه‌ هێزی‌ نیشتیمانی‌، تا كۆی‌ كایه‌كان بخرێنه‌وه‌ ناو بازنه‌ نیشتیمانیه‌كەی‌، ئه‌مه‌ش كارو‌ خه‌باتی‌ مه‌ده‌نیه‌ كه‌ كات و كاری‌ رۆشنبیرانی‌ نیشتیمانی‌ ده‌وێت تا هه‌نگاوه‌ دروسته‌كانی‌ گه‌شه‌و بنیاتنان ببنه‌ هه‌نگاوی‌ ئومێد به‌خش.

به‌داخه‌وه‌ له‌ نیوه‌ی‌ دوه‌می‌ سه‌ده‌ی‌ بیسته‌مه‌وه‌ هه‌تا ئیمڕۆ تاكه‌كانی‌ گه‌له‌ په‌ژمورده‌كه‌مان له‌م نیشتیمانه‌ كه‌رت و هه‌رێمه‌ په‌رتدا هه‌ر له‌ تونێله‌ تاریكه‌كانی‌ چاوه‌ڕوانیدان، لێره‌دا روی‌ قسه‌مان زیاتر له‌سه‌ر فاكته‌ره‌ ناو خۆیه‌كانه‌، باشبونی‌ ناوخۆمان ته‌نها به‌ ره‌خنه‌ گرتن نابێت، به‌ڵكو هێنانه‌كایه‌ی‌ جێگره‌وه‌ی‌ نوێیە‌ ‌، ئه‌مه‌ش هه‌نگاوی‌ گۆڕینی‌ بنجینه‌ییه‌و ئاواته‌ نیشتیمانی‌ و پێداویستیه‌ كۆمه‌ڵایه‌تیه‌كان به‌یه‌كه‌وه‌ ده‌به‌ستێ‌، ئه‌مه‌ گۆڕینی‌ جۆری‌ ژیان و په‌روه‌رده‌ و سیسته‌می‌ به‌ڕێوه‌بردن و گه‌شه‌و بنیاتنانه‌، كه‌ له‌ هزری‌ گۆڕینه‌وه‌ كۆی‌ چالاكیه‌كان ده‌بێت له‌ پێناو ئیمڕۆ و ئاینده‌یه‌كی‌ دیاردا بن.

لێره‌دا قسه‌ له‌سه‌ر پێكهێنانی‌ به‌ره‌یه‌كی‌ حیزبی‌ ناكه‌ین، چونكه ‌له‌ لای حیزب كراوه‌ته‌ ماڵی‌ یه‌كه‌می‌ كاره‌كته‌ره‌ ده‌ستڕۆیشتوه‌كان ،كه‌ حیزب و به‌ره‌یه‌كی‌ حیزبی‌ ماڵی‌ كۆی‌ ئه‌ندامه‌كانیشی‌ نه‌بێت، ئه‌وه‌ ناشبێته‌ ماڵێك بۆ گه‌ل و نیشتیمان، لێره‌وه‌ ویستم له‌ پێناو كۆڕانگاریدا راتانكێشم بۆ شرۆڤه‌ی‌ ره‌وتی‌ گۆڕین لە به‌ره‌یه‌كی‌ فراوانی‌ مه‌ده‌نیدا‌، كه‌ بزوتنه‌وه‌یه‌كی‌ كراوه‌ و رێبازێكی‌ فراوان و یه‌كگرتنێكی‌ ئاره‌زومه‌ندانه‌یە، ئیمڕۆی‌ كوردستان پێویستی‌ به‌ بون و كاراكردنی‌ ره‌وتێكی‌ كراوه‌ی‌ سه‌ربه‌خۆیه‌ كه‌ كۆی‌ (چاكه‌خواز و گۆڕانخوازو پێشكه‌وتنخوازه‌كان) له‌ خۆ بگرێت، كه‌ وه‌ك تیمێكی‌ یه‌كگرتوی‌ نیشتیمانی‌ و لایه‌نگری‌ زانستیانه‌ و سه‌رده‌میانه‌ی‌ كار، به‌یه‌كه‌وه‌ كاربكه‌ن، ده‌شبێت جیاوازبن له‌ لایه‌نگری‌ حیزبایه‌تی‌، خێڵه‌كێتی‌،خزمایه‌تی‌ ،بنه‌ماڵه‌یی، ئایدۆلۆژیا و ئاینی‌. به‌كورتی‌ ئیمڕۆ كوردستان پێویستی‌ به‌ ره‌وتێكه‌ كه‌ هه‌وڵبدات بۆ گۆڕین له‌ بارودۆخێكه‌وه‌ بۆ بارودۆخێكی‌ تر،كۆی‌ لایه‌نه‌ ناڕازیه‌كانی‌ ئیمڕۆ، ئه‌گه‌ر بیانه‌وێ‌ و راستگۆبن له‌گه‌ڵ ئازاری‌ نیشتیمان و په‌یامی‌ مرۆڤ دۆستیدا، ئه‌وه‌ له‌ پێناو گه‌شه‌و بنیاتناندا ئه‌توانن ببنه‌ ده‌ستپێك بۆ دامه‌زراندنی‌ ئه‌و به‌ره‌ نوێیه‌، له‌م رێگه‌یه‌وه‌ ئه‌توانین به‌ تۆكمه‌یی‌ و به‌هێزی‌ زیاتره‌وه‌ روبه‌ڕوی‌ هه‌ره‌سی‌ ئیراده‌ و شكاندنی‌ شكۆی‌ تاك و ئاشبه‌تاڵی‌ نیشتیمانی‌ ببینه‌وه‌

سۆشیال میدیا

ڕۆژنامەی زەمەن