وتار

لەساڵیادی شكستی بزوتنەوەی گۆڕاندا

10/4/2022 8:00:00 PM 387 جار خوێندراوەتەوە
چۆمان محەمەد

نزیك دەبینەوە لەساڵێك بەسەر هەڵبژاردنی 10ى ئۆکتۆبەرى 2021ى پەرلەمانی عێراق، دەرئەنجامەكان بۆ گۆڕان كەمەرشكێن بوون، زیاتر لەشكست بگرە خاڵیبوونەوەو سفربوونەوەبوو لەمتمانەی خەڵكیی.

تێپەڕینی ساڵێك واتا ۳٦٥رۆژە جوڵە و هەنگاوی راستەقینەمان نەناوە، وەک ئەوەى شکستمان نەهێنابێت و هەستمان پێى نەکردووە، وا مامەڵە دەكەین لەگەڵ ئەم شكستە دەکەین وەك ئەوەی هیچ رووینەدابێت و خۆمان رادێنین لەگەڵ واقیعەكە.

دەرئەنجامەكانی هەڵبژاردن پرسێك نییە هەروا بەسانایی لەبیربكرێت و هیچ جوڵەیەكی بۆ نەكرێت، دەبوو خاڵی وەرچەرخان بوایە بەوەی دنیابینی حزبەكەی بگۆڕیبایە بەرامبەر كۆی پرسەكان، هەموو دڵسۆزان چاوەڕێ بوون، ئەو شکست و سزادانەی خەڵكی، وامان لێبکات پێداچوونەوەیەکى راستگۆیانەو ڕاستەقینە بەسیاسەت و بەرنامەکانى خۆماندا بکەینەوە، چاوەڕێ بوون بەخێرایی هۆکاری شكست و پاشەكشە دەستنیشان بکەین بەپەلە چارەسەریان بکەین و بەدەنگدەرانمان بڵێین ئێوە لەسەر ئەو شتانە ئێمەتان سزادا، ئەوەتا ئێمە گوێتان لێدەگرین و هەڵەکان راستدەکەینەوە،فرسەت هەبوو باشتر بێیینەوە مەیدان، بەڵام بەداخەوە تا ئێستا ئیرادەیەكی راستەقینە دروست نەبووە بۆ بەخۆداچونەوە، شکستەکە وا لێی دەڕوانرێت روداوێکى ئاساییە بۆ حزب و تێدەپەڕێت، بۆیە بەبەرتەقای شكستەكە هەنگاومان نەناوە، چونکە راستكردنەوەی ئەو بارە لارە نە بەم نەرمە نەرم وسستی و جوڵە روكەشیانە دەبێت، نە بە خۆبێئاگاكردن لە گۆڕانکاری ریشەیی و نە بە یاریكردن و دەستی دەستی بەكات، دەنا تێپەراندنی كات بەبێ جوڵەو پلانی ستراتیژی بگرە واقیعەكە خراپتر دەبێت، دۆخەكە زیاترو زیاتر هەڵسوڕاوان وكادیری ئەساسی ودڵسۆز بێ هیوادەکات كە سەرەتایی رەشبینی و نائومیدی دەركەوتوە،هەتا كات زیاتر تێپەرێت ئەم پرسە ئەستەمتروقورستر دەبێت ولەسەر ڕێگای دروست وبنەماودنیا بینیمان دوردەكەوینەوە.

ئێمە پێویستمان بە خۆڕێكخستن و یەكریزی و ئاشتەوایی ناوخۆمان هەیە، پێویستمان بە داڕشتنەوەی وتارو بەرنامە و روئیای سیاسی و میدیامان هەیە، ئەوكات دەتوانین قورساییمان هەبێت بۆكاری گەورە و جوڵەی كاریگەر، كەئەمە پێشمەرجی قۆناغی بەخۆداچوونەوەیە، گەر ئیرادە هەبێت دۆزینەوەی ڕێگای سەركەوتن و بەرنامەی کار ئاسانە، ئەم هێزە پێویستە هەمیشە لەبەرەی خەڵكدا بێت، جیاوازتر دەربكەوێت لە حزبی دەسەڵات و حزبی دوكانی سیاسی، بەداخەوە گەر ئێمە ئەم هەنگاوانە نەنێین چارەنوسێك چاوەڕێمانە كە خراپترە لەو دەرئەنجامانەی كە توشمانبوو لەدوایین هەلبژارن..

سۆشیال میدیا

ڕۆژنامەی زەمەن