ئەرکی میدیا لەکاتی جەنگدا
6/24/2025 11:11:00 AM
فارس نەورۆڵی
میدیا بەگشتی هەر لەتەلەفیزۆن و ڕۆژنامە و ڕادیۆ و تۆڕەکۆمەڵایەتیەکان، لەسەردەمی
جەنگدا ئەرکێکی نیشتیمانی و ئەخلاقی و پیشەییان دەکەوێتە ئەستۆ، چونکە لەکاتی جەنگدا
تەنیا ئەرکیان گواستنەوەی هەواڵ و زانیارییەکان نیە، میدیا هۆکارێکی کاریگەری ناو
جەنگەکانەو هێزی ئاراستەکەری ڕای گشتی یە، ڕۆڵی یەکلاکەرەوەی هەیە لەبەرزکردنەوە یان
ڕوخاندنی ورە و باوەڕی خەڵکدا، دەتوانێ پەشێوی و نائارامی لە دەرونی کۆمەڵگادا بەئاسانی
دروست بکات و دەشتوانێ ڕێگا لەئاشوب بگرێت، چونکە میدیا جگە لەوەی هەواڵەکان دەگوازێتەوە
لەهەمان کاتدا دەشیانکات بەواقیع، بۆیە پەیوەندی نێوان میدیا و جەنگ پەیوەندیەکی
ئاڵۆزە و میدیا دەکرێ تەواوکەری جەنگ بێت، ببێتە هۆکاری سەرکەوتن بۆ مێژوو، بۆیە میدیا
ئەرکی زۆر و گرنگی لەئەستۆدایە، لێرەدا بەکورتی لەچەند خاڵێکدا دەیخەمەڕوو.
١- گواستنەوەی هەواڵ و زانیاری بە هوشیاری و ڕاستگۆیی و
دوور لەلایەنگیری و پیشەییانە بێت.
٢- نیشاندان و پێشێلکارییەکانی جەنگ دژ بە مافی مرۆڤ.
٣- گەیاندنی دەنگی ستەملێکراو زیان لێکەوتوانی جەنگ و نیشاندانی
چیرۆکەکانیان بەڕای گشتی جیهان.
٤- شیکردنەوەو تەفسیری ڕووداوەکانی جەنگ بەهاوسەنگی، بۆ ئەوەی
خەڵک وەک خۆی لەڕووداوەکان تێ بگات.
٥- ڕێگا گرتن لەزانیاری درۆ و چەواشەکارانە کەئامانجی تێکدانی
دەروونی خەڵک و ئاشتی کۆمەڵایەتیە بەتایبەتی میدیای کوردی، دەبێت بەرپرسیارانە لەسەر
ئەم خاڵە ڕاوەستێ چونکە گەلی کورد شەڕێکی دەروونی هەمەلایەنەی لەسەرە.
٦- پاراستنی بەها مرۆیی و ئەخلاقیەکان و ڕێزگرتن لەکەرامەتی خەڵک. خۆ دورخستنەوە
لەنیشاندانی توندوتیژی .
٧- تۆمارکردنی ڕووداوەکان وەک خۆی بۆ ئەوەی لەداهاتوو سودی
لێ وەرگیرێ بۆ بریاڕدانی مێژوو .
لەکۆتایدا دەبێت میدیای کوردی ئەوە بزانێ ئەگەر چی ئێمە بەشێک نین لەجەنگ بەڵام
کە جەنگ نزیکت بوو ئەو بەشێکە لەتۆ، بۆیە گرنگە خۆپارێزی لەجەنگ بەزمانێکی ئەقڵانی .