جیاوازییەکانی ئەمڕۆ چ جیاوازییەکن؟
9/23/2026 3:58:00 PM
فارس نەورۆڵی
جیاوازیی بیرکردنەوە
لە کایەیی سیاسەتدا لەناو هەر میللەتێکدا دياردەیەکی ئەرێنییە و سەرچاوەی هێزە ، بەمەرجێک
ئیدارەدانی جیاوازییەکان لە چوارچێوەی چاکەی گشتیدا بێت و ئیستغلال نەکرێت بۆ خزمەتکردنی
گرێی دەروونیی تاک یان گرووپێک.
هەرچەندە جیاوازی
لە بیروڕا و بەرژەوەندیدا دوو دیاردەی سروشتیی ناو کۆمەڵگەن، بەڵام ئەمڕۆ تێکەڵکردنێکی
بەئەنقەست لەنێوانیاندا دەکرێت. بۆیەبەرژەوەند خوازە کانیش بانگەشەی جیاوازی بیروڕادەکەن گوایە بۆ چاکەی خەڵکە ، بۆیە پێویستە ئەوەی کار
بۆ بەرژەوەندیی تایبەتیی خۆی دەکات، بانگەشەی ئەوە نەکات کە ئەوە بیروڕای جیاوازە
و لەپێناو خەڵکدایە؛ چونکە بیروڕای جیاواز کە لە سیاسەتدا تەوزیف دەکرێت، لە بەرژەوەندیی
خوازی جیایە. ، چونکە بیروڕای جیاوازی سیاسی لە فرەییی بیرکردنەوە، ڕۆشنبیری و جیهانبینیی
تاکەکانەوە سەرچاوە دەگرێت بۆ بەدیهێنانی ئامانجێکی هاوبەش لەپێناوی دادپەروەریدا.
هەبوونی ڕای جیاواز لەناو هەر کۆمەڵگە و حزبێکی سیاسیدا، نیشانەی زیندوویەتیی ئەو
کۆمەڵگە و حزبەیە، تا لەڕێگەی دیالۆگی ئەقڵانییەوە پردی بەستنەوەی جیاوازییەکان لە
فۆڕمێکی نوێدا بخەنە خزمەت کۆمەڵگە.
لە لایەکی دیکەوە
، جیاوازی لە بەرژەوەندیی کەسێک یان گرووپێکدا تەواو جیاوازە لە جیاوازیی بیروڕا.
جیاوازیی بەرژەوەندییەکان زیاتر بۆ پارە، دەستکەوتی مادی، یان خودپەرستیی تاکە؛ بۆیە
ململانێی بەرژەوەندی توندترو ئاڵۆزتر و بێمتمانەترە لە جیاوازیی بیروڕا، چونکە زیاتر
لەسەر دابەشکردنی سەرچاوەی مادی و دەسەڵاتە، تا ئەو ئاستەی بیروڕاکان دەکەنە
ئامرازێک بۆ شەرعیەتدان بە خۆیان لەپێناو دەستکەوتدا.
هەر بۆیە لە کۆمەڵگەی
کوردستاندا، زۆر جار سیاسییەک لەژێر پەردەی بیروڕای جیاواز و چاکەی گشتیدا، ململانێ
بۆ دەستکەوت و بەرژەوەندییەکانی خۆی دەکات. لەبەر ئەوە پێویستە تێبگەین لەوەی کەسی
بەرژەوەندیخواز لەژێر پەردەی بیروڕای جیاوازدا بۆ دەسکەوتە مادی وسیاسیەکانی خۆی ، خەڵک نەکاتە پەیژە بۆ سەرکەوتنی خۆی . بۆیە
جیاوازی دەبێت بەرگی خزمەتی کۆمەڵگا و تاکی بەبەردابکرێت تا ڕەنگدانەوەی دەربکەوێت.