پاشەکشەی کورد و خەیاڵی فەلەستینی .
9/6/2023 1:55:00 PM
عەلی شەریف
رۆژێ لەخۆمان پرسیوە بۆ کراینە دەرەوەی مێژوو !
لە دوای پێکهێنانی دەوڵەتی نوێی عێراق لە ١٩٢١ تائەمڕۆ پرسی کوردستانی بونی کەرکوک بەتایبەتی دوای دۆزینەوەی چالەنەوتەکان، کە گرنگی گەورەی ئابوری خۆی هەیە ، بابەتی مشتومڕ و هۆکاری سەرەکی سەرجەم ناکۆکی وسەرنەگرتنی زۆربەی گفتگۆ و دانوسانەکانی نێوان رژێمی بەعس و جولانەوەی ڕزگاری نیشتیمانی خەلکی کوردستان بوە هەر لە گفتۆگۆی ١٩٧٠ – ١٩٧٤ و گفتوگۆی سالی ١٩٨٤ و لە ٢٠٠٣ وە لەگەل حکومەتی فیدراڵی عێراق و تائێستا ئەو پرسە بەچارەسەرنەکراوی ماوەتەوە و ڕۆژ دوای رۆژیش ئەم پرسە ئاڵۆزتر و ناکۆکی و گرژی توندتربەدوای خۆیدا دێنێت.
کاتێ کورد زۆرترین خاکی داگیرکراوی کوردستانی ئازاد کرد بەخوێنی زیاتر لە ٢٠٠٠ شەهید و هەزاران بریندار لەدەست چەتە بەکرێگیراوەکانی داعش و لەسنوری موسڵ توانی تا تەلەعفەر و شەنگال و هەمو دەشتی موسڵ رزگار بکات و لە سنوری کەرکوک تا خوار حەویجە وتازە خورماتوو بچێت و لە بەرەی خانەقین تا توزخورماتو و جەلەلاو و ئامرلی بڕوات ،کەنزیکەی نیوەی خاکی هەرێم و سەرجەم ناوچەی جێ ناکۆکەکانی ئێستای لەبەر دەست بوو ، کەچی دەسەلاتی سیاسی کوردی ئەم دەرفەتە مێژووییەی نەقۆستەوەو گفتوگۆ و چارەسەری ئاشتیانەی رەتکردەوە و ملی نەدا بە گفتوگۆی عەقڵانی و پێچەوانەی ڕا و بۆچون و قسەی هاوپەیمانان و برێت ماکگورک نوێنەری سەرۆکی ئەمەریکا و ئامۆژگاری و قسەی وەزیرانی دەرەوەی هەریەک لە بەریتانیا و فەرەنسا و ئەمەریکا و تەنانەت نوێنەری نەتەوەیەکگرتوەکان و ئەنجومەنی ئاسایشی نێو دەولەتی نەگرت و چارەنوسی ئەم پرسەیان لە کارەساتی شەرمهێنی پڕ تراژیدیای ریفراندۆمی ٢٠١٧ دا بە شکستێکی کەمەر شکێن بۆ کورد سپارد .
ئێستا سنورمان لەپردی خازری نێوان هەلێر و موسڵ ، لە بانی مەقان و قەرە هەنجیرەوە سەیری کەرکوک دەکەین و لە پردێوە هەڕەشە ئاراستەی سوپای حکومەتی ناوەندی دەکەین ..!
کاتی هەڕەشەی ئێمە بەسەر چوە ، کەرکوک بەهێزو چاو سورکردنەوە ناگەرێندرێتەوە بۆسەر قەوارەی هەرێم ، تاکە هەل و کارێک لەبەر دەسەلاتی سیاسی کوردا بۆ کوردستانی بونی کەرکوک ئەوەبوو کە سەرنج و سۆزی دانیشتووانی کەرکوک بەسەرجەم پێکهاتە جیاوازەکانی ئەوە ڕابکێشێت بەرەو هەرێم و هەرێمی وەک نموونەیەکی جوانی حکومڕانی و خۆشگوزەرانی و دەسەلاتێکی دادپەروەرانەی ڕاستەقینە و نموونەیەکی جوانی دیموکراسی بایە لەناو دنیا و گێژاوی دەوڵەتی ناوەندی بەغدای بارگاوی بە مەزهەب و دواکەوتن و بێ خزمەتگوزاری !
فەلەستییەکانیش هاوشێوەی ئێمە لە هەڵەی مێژوویی و بەهەند وەرنەگرتنی ڕاو و راسپاردەکانی هاوپەیمانان و ئەنجومەنی ئاسایشی نێو دەولەتی لە سالی ١٩٤٨ لە میانەی پێک هێنانی دوو دەولەت بۆ عەرەبی فەلەستینی و یەهودیەکان و رەتکردنەوەی ئەو بڕیارە لەلایەن فەلەستینیەکان وبەرەی عەرەبی بەشێوەیەکی گشتی دەرفەتێکی مێژوویی گەورەیان لەدەست داو کرایە قوربانی جۆش و خرۆش و چەندین دروشمی ناواقیعی وەک ( سنلقيهم في البحر) كە بەردەوام لە رادیۆی قاهیرە بەدەنگە کاریگەرەکەی بێژەری بەناوبانگی میسری ( احمد سعيد ) وەک هەڕەشەیەکی پاکتاوی رەگەزی دژی یەهودیەکانی فەلەستین بڵاودەکرایەوە و دواتر ڕودانی شەڕی ٦ ڕۆژەی حوزەیرانی ١٩٦٧ و شکستی عەرەب و سەرکەوتنی گەورەی اسرائیل لێکەوتەوە و پاشەکشەیەکی بێ وێنەشی بەجولانەوەی ڕزگاری گەلی فەلەستین کرد و هاوشێوەی کورد ئەوانیش قودسیان لە گەڕاندنەوەی لە ڕێگەی زەبری هێزەوە لەم چەرخەدا بوو بە خەیاڵ.
کەرکوک بوە بە شارێک کە دیموگرافیای بەتەواوی گۆڕاوە، ژمارەی پێکهاتە جیاوازەکانی ئەگەر لە کورد زیاتر نەبێت کەمتر نین ، کەرکوک بەهۆی هەلەی یەک لەدوای یەکی سەرکردایەتی سیاسی کوردەوە بەدرێژایی مێژوویی شۆڕش و یاخیبونەکانیەوە رۆژ دوای رۆژ ، هاوشانی شالاوی تەعریب و ستەمی نەتەوەیی و کلتوری و فەرهەنگییەوە پێگە و ژمارەی کورد لە کەرکوک بەرەو لاوازی و کەمبونەوەی براوە و تا ئەم پرسە بە چارەسەرنەکراوی بمێنێتەوە لە زیانی کورد و قازانجی پێکهاتەکانی تردایە چونکە بەردەوام ئاسانکاری و هاندان و پشتیوانی گەورە هەیە بۆ زیاد کردنی ژمارەی دانیشتووانی نەتەوەی عەرەب و پرۆسەی تەعریب بەشێوەیەکی گشتی لەسەرجەم ناوچە جێ ناکۆکەکان بەتایبەتی.
لە ژێر بارودۆخێکی ئاوادا و نەبونی هیچ فشارێک لەسەر گۆڕینی دیموگرافی کەرکوک لەلایەن حکومەتی ناوەندەوە ، دەرەنجامی زۆر خراپی لێدەکەوێتەوە و لەوانەیە لەهەر دۆخێکی ئالۆزوپێکادانێکی نەتەوەیدا جگە لە قوربانیەکی زۆر بە راپرسیەک ئەو دۆخە یەکلایی بکرێتەوە و ئەوکاتەش لە پرۆسەیەکی دیموکراسی هێمنانەی ئارەزوومەندانەدا کەرکوک شوناسی نەتەوەیی کوردستانی بوونی خۆی بۆ هەتا هەتا لەدەست دەدات و دەبێتە شارێکی پێکهاتە تێکەڵاوەکان ، بەمەش خوێن و خەونی هەزاران شەهید بە فیرۆدەروات و کوردستانیش شادەمارێکی گەورەی ئابوری و گەنجینەیەکی یەدەگی گەورەی نەوت و غازی سروشتی لەدەست دەدات .!
اسرائیل لە ئێستادا جگە لە دەولەتێکی پڕ ڕەفاهیەت و گەلێکی پێشکەوتوی یەکگرتوو ، یەکێکە لە دەولەتە بەهێزەکانی دنیا ، خاوەنی چەکی ناوکی و پێشکەوتوترین تەکنۆلۆژیای سەردەمە ، لەدوای ئەمەریکا دیارترین دەولەتی جیهانە لە چەکی سوک و فڕۆکەی بێ فڕۆکەوان و بۆشایی دا.
بەردەوام لەهەوڵی بۆ پێشوەچوون و پێشخستنی ماشێنی جەنگی خۆیدایە ، لە تازەترین داهێنانیدا هەستاوە بە دروستکردنی رۆکێتی بەرگری جۆری (ا ر و -3 ) کە دەتوانی تا مەودای ٢٤٠٠ کم بڕوات و لەدەرەوەی بەرگە هەوایی گۆی زەوی ئامانجەکەی بپێکێ، کە لەئێستادا بە کاریگەرترین و پێشکەوتوترین چەکی بەرگری بۆشایی دادەنرێت ، شایەنی باسە لە رۆژی ١٧ئابی ئەمساڵی ٢٠٢٣ رێککەوتنی لەگەڵ دەولەتی ئەڵمانیا واژۆ کردوە کە ژمارەیەک لەو رۆکێتە بەرگریانەی پێ بفرۆشێت لە گرێبەستێکی ٤ ملیار دۆلاریدا ، ئەی دۆخی فەلەستینیەکان چی؟.
ئێمە و فەلەستینی هێشتا هەژموونی دروشمی خەیاڵی و خۆ بە مەزلووم بینی مێژوویی بەری نەداوین، هێشتا زەمان و زەمینی ( یا خانەقین و حەمرین یا تاماوین دەجەنگین ) لە زەین و هزری تاکی کوردا ماوەتەوە، هێشتا سەدای ( خەیبەر خەیبەر یا یهود جيش محمد سيعود ) نەک هەر فەلەستینی زۆرێک لە ئیسلام و جیهانی عەرەبی وەک کاڵا یەکی بازرگانی ستەمکاری دەسەلاتی سیاسی بەکاردەبرێت و گرێی قەومی و دینی توندتر دەکەن لە گەردنی مێژووی بێدادی و ستەمی خۆیان.
" نیچە " گەورە فەیلەسوفی ئەڵمانی وتویەتی : هێزی ئەقڵ ، بەوەدەپێورێت کە چەند دەتوانێت بەرگەی حەقیقەت بگرێت.
ئێستا ئێمە لەدەرەوەی مێژووداین ، گرنگە بیربکەینەوە و دەلاقەیەک بدۆزینەوە بۆئەوەی بتوانین بچینەوە ناو پرۆسە کاریگەرەکەی ململانێ و بڕیارە دروستەکانی سیاسەتەوە .