هاوین زۆر گەرم دەبێت و پلەکانی گەرما لە هەندێك شار 50 پلە تێدەپەڕێنن
12:08 - 05/05/2026
زەمەن - هەواڵ
دەستەی کەشناسی،
وردەکاریی دۆخی کەشوهەوای بۆ ڕۆژانی داهاتوو ڕاگەیاند، هاوکات ئاماژەی بەوە کرد کە
هاوین زۆر گەرم دەبێت و لەوانەیە پلەکانی گەرما 50 پلەی سەدی تێپەڕێنن.
عامر جابری، بەڕێوەبەری
ڕاگەیاندنی دەستەکە، ڕایگەیاند: " لە وەرزی زستانی ڕابردوودا بارانبارین و
دابەزینی پلەکانی گەرما هەبوو، بەڵام وەرزی هاوینی عێراق بە یەکێک لە سەختترین وەرزەکان
دەمێنێتەوە .
ئاماژەی بەوەش
کرد: "کەشی سێ ڕۆژی داهاتوو ساماڵ دەبێت لەگەڵ هەندێک هەور، پلەکانی گەرماش
مامناوەندن و تا کۆتایی هەفتە بەرەبەرە بەرز دەبنەوە، لەگەڵ ئەگەری بەرزبوونەوەی تۆزێکی
سوک لە هەندێک شوێنی ناوچەکانی باشوور و بارینی بارانی سوکی پچڕپچڕ لە هەندێک ناوچە
بەتایبەت لە بەشەکانی باکوور." ڕوونیشی کردەوە کە "پێشبینییەکان لە بەشی
پێشبینی کەشناسی و چاودێری دۆخی کەشوهەوا بەردەوامن لە ڕێگەی بەدواداچوونی تۆمارکردنی
حاڵەتەکان بەتایبەت حاڵەتە کاتژمێرییەکان بۆ نوێکردنەوەی دۆخی کەشوهەوا."
باسی لەوەش کرد:
"دەستەکە خاوەنی ئامێری نوێ و پێشکەوتووی تایبەت بە کەشناسییە، لەوانە وێستگەی
جیهانی ئۆتۆماتیکی کۆمپانیای ڤایزەلای فینلەندی، جگە لە 11 بۆ 15 وێستگەی تایبەت بە
چاودێری بوومەلەرزە لە کۆمپانیایەکی ئەمریکی، بەڵام پێویستیان بە پەرەپێدان و نوێکردنەوە
هەیە بۆ بەدەستهێنانی پێشبینی وردتر."
بەردەوام بوو لە
گوتەکانی و گوتی: "دەستەکە پشت بە تەکنەلۆژیا نوێیەکانی کەشناسی دەبەستێت لە ڕێگەی
وێستگەکان، مانگە دەستکردەکان، ڕادارە کەشوهەواییەکان و مۆدێلە ژمارەییەکان کە خوێندنەوە
بۆ ڕۆژانی داهاتوو دەکەن، جگە لە هەندێک تەکنەلۆژیای ژیریی دەستکرد، بەڵام تەنها
پشت بە ژیریی دەستکرد نابەسترێت بەڵکو پشت بە هەوڵی فەرمانبەرانیش دەبەسترێت."
لە کۆتاییدا
ئاماژەی بەوە کرد: "دەستەکە پێویستی بە پەرەپێدان و نوێکردنەوە هەیە بۆ بەدەستهێنانی
پێشبینی وردتری کەشوهەوا، تاوەکو هاوشانی پێشکەوتنە جیهانییەکان بێت لە ژێر سایەی
گۆڕانکارییەکانی کەشوهەوا و ناسەقامگیری کەش، چونکە یەکێکە لە گرنگترین دامەزراوە
زانستییەکان."