کادر و حەبی پیرفیتین ..!
4/2/2023 3:14:00 PM
عەلی شەریف
هەندێ کادر و بەرپرسی
دەسەڵات دەڵێی حەبی “ پیرفیتین “ یان پێدراوە
!
ئەڵمانەکان لە سەرەتای
شەڕی دووەمی جیهانیدا جۆرە دەرمانێکیان لەشێوەی شیرینی دەدا بەسوپاکەیان بۆئەوەی دڕتر
و زیاتر بەرگەی شەڕ و شەڕەنگێزتربن .
ئەودەرمانە ناوی
(بیرفیتین) بوو، کە کاریگەری زۆر لەسەر ئەقڵ وجەستەی مرۆڤ دادەنێت و بۆماوەیەک دەیکات
بەپاڵەوانێکی ساختە!
«پاڵەوانی ساختە»
بەمانای ئەوەی سەربازەکان
کاتێ ئەم شیرینیەیان پێدەدرا هەستێکی ئازایەتی و جۆش و خرۆشیەکیان لادروست دەبو کە
ئارەزووی هەرچی زووتری هێرش و پەلاماری بەرامبەریان دەکرد و لەهێرشەکاندا زۆرجار پێش
دەبابە و زرێ پۆشەکانیش دەکەوتن، جگە لەوەش ئەم شیرینیە هێز و گڕوتینێکی وای پێدەبەخشین
کەبۆماوەی٧٢ کاتژمێر بەئاگایی بیانهێڵێتەوە و هەست بەبێ خەوی و ماندوبون و برسی بون
نەکەن، هەربۆیە کاتێ سوپای ئەڵمانیا لە ٥ی ئایاری ١٩٤٠ هێرشیانکردە سەر سوپای فەرەنسا،
سەرکردە سەربازیە فەرەنسیەکان سەریان لەوهەمووهێرش و پەلامارە بەردەوامانەی سوپای ئەڵمانیا
سوڕمابوو کەدەیانبینی دەرفەت بەسوپای فەرەنسا نادەن و بۆماوەی چەند شەوێک بەبەردەوامی
درێژە بەهێرشە یەک لەدوای یەکەکان دەدەن، کە لەئاکامدا وتەنها دوای ٣٥ رۆژ و لە٢٥ی
حوزەیرانی ١٩٤٠دا فەرەنسیەکان تەسلیم بونی خۆیان راگەیاند.
دوای راگەیاندنی
بڕیاری دادگای تەحکیمی نێودەوڵەتی لەپاریس لە٢٣ی ئازاری٢٠٢٣ و هەروەها جەختکردنەوەی
کۆنسۆڵی گشتی ئەمەریکا لە هەولێرسەبارەت بەشلۆقی
ودۆخی پەیوەندی هەرێم و رێگرتن لەناردنە دەرەوەی نەوتی هەرێم لەڕێگەی بەندەری جیهانەوە
بێ پرسی دەوڵەتی فیدڕاڵی عێراق و دامەزراوەی سۆمۆ، چەندین کادری حزبی و بەرپرسی دیاری
دەسەڵات رەتدانەوە و لێدوانی توند و نەشیاویان ئاڕاستەی کۆنسۆڵی گشتی و خودی دەوڵەتی
ئەمەریکا و حکومەتی فیدڕاڵی عێراق کرد بەجۆرێک کە قەوارە و جۆری ئەو رەتدانەوە و بەرپەرچدانەوانە
زۆر لە قەوارە و دەسەڵاتێکی هەرێمی بەتایبەتی هەرێمێکی وەک هەرێمی کوردستانی بە دوژمن
ونەیار گەمارۆدراو … گەورەتر و سەرکێشانەتر و دواتر نابەجێ ونەشیاو و دوور لە هەموو
ئەتەکێتێکی دپلۆماسی وسیاسی و رێکارە پەیڕەوکراوە نێودەوڵەتیەکان بوو، کەمرۆڤ سەری
دەسوڕمێ لەئاست کاریگەری و زیان و لێکەوتە خراپەکانی لە داهاتوودا.
ئەو رەتدانەوە توند و لێدوانە نا بەرپرسەنایە، رەتدانەوە
و دەربڕینی ئاقڵانی و سیاسی نین، بەڵکە دەربڕین و لێدوانی پاڵەوانە ساختە و بێکردار
و چەواشەکارەکانن کە جگە لەماڵ وێرانی و نەگبەتی هیچ بەرهەمێکی تریان بۆ گەلەکەیان
بەرهەم نەهێناوە و دەشێ ژیانی کولەمەرگی خەڵک و موچەخۆر و پاشاگەردانی و دوو ئیدارەیی
حوکمڕانی لە هەرێمێکی بچکۆلانەی وەک کوردستاندا باشترین و راستگۆترین دەربڕ و نموونەبن
بۆ ئەو وتانەمان .!
