یەکێتی و گۆڕان .. قەیرانی ژمارە و ناونیشان
3/4/2023 8:11:00 PM
سمكۆ ئەسعەد ئەدهەم
-یەکێتی خاوەنی ناونیشانەکانی (پێشکەوتنخوازیی ، ئاوەدانی
، ئاشتی ئارامی وسەقامگیری و دموکراسی و مافی چارەی خۆنوسیی و فرەیی سیاسی) بوو لەسەر
ئاستی ھەرێمی کوردستان وعیراق ، بۆ ناخۆی خۆیشی خاوەنی بنەماکانی ( فرە مینبەری و
پشتگیری کردنی ھەڵکەوتوانی بواری حزبی وکارگێڕی وزانستی بە ھەموو بوارەکانیەوە و خۆ
بەدوورگرتن لە ھەژموونی بنەماڵەیی سیاسی وحزبی) بوو ، ھەموو ئەوانە .. لای مام جەلال
گرێئەدرانەوە و ئەکەوتنە ڕوو .
-گۆڕان داڕێژەری ناونیشانەکانی ( یەکسانی و دادپەوەری کۆمەڵایەتی
و ڕووبەڕوو بوونەوەی گەندەڵی لە ھەموو بوارەکاندا ، چاکسازیی ڕیشەیی و بونیاد نانەوەی
قەوارەیەکی تەندروست و ڕاست بۆ ھەرێم وپاراستنی متمانەی نێوان خەڵک و دەسەڵات..)
بوو ، بۆ ناخۆی خۆیشی دەیان بنەما وستایڵی نوێی کاری حزبی وسیاسی داڕشتبوو لە ھەمویشی
گرنگتر ، خۆ بەدوورگرتن بوو لە ھەژموونی بنەماڵەیی سیاسی وحزبی ، ھەموو ئەوانە ..
لای کاک نەوشیروان گرێئەدرانەوە و ئەکەوتنە ڕوو .
یەکێتی وگۆڕان ، دوای
ماڵئاوایی مام جەلال و کاک نەوشیروان ، بە دوور لە ناونیشانە ڕاستەقینەکانیان ، کەوتنە
داوی ژمارەی کورسی پەرلەمان و پۆستی حکومی ، ناونیشانە ڕاستەقینەکانیان کە خاڵی بەھێزیان
بوو کران بە قوربانی دەسەڵاتێکی کارتۆنی ، دەسەڵاتێک وێرانیی و پەککەوتنی سلێمانی
و گەرمیان و پشدەر و کۆیەی لێکەوتەوە لە پاڵ دەوڵەمەند بوون و بەھێزبوونی ئەو کەسانەی
ھەمیشە دژی ناونیشانە بنەڕەتیەکانی یەکێتی و گۆڕان بوون .
ئێستا سەر لە نوێ ، بە
ناوی ھەڵبژاردنەوە ، ئەو لایەنەی ناونیشانەکانی (یەکێتی وگۆڕان)ی گەیاند بەم ڕۆژە
، بانگھێشتیان ئەکات بۆ سەر لە نوێ گرەوکردن لەسەر ژمارە ، بۆ ھێشتنەوەیان لە ناو
ھەمان بازنەی پێشوو ، بۆ یەکسانکردنی (ناونیشانەکانیان) بە چەند پۆستێکی حکومی.
ئومێدەوارم سەرۆکی یەکێتی
نیشتمانی کوردستان و ڕێکخەری گشتیی بزووتنەوەی گۆڕان ڕێگا لە نوێکردنەوە ودووبارەبوونەوەی
ئەم ناڕەوایەتییە بگرن ، نەھێڵن بە ناوی ھەڵبژاردنەوە ئەم شێوازی حوکمڕانییە خۆی چەندبارە
بکاتەوە،
ھەردوو بەڕێزیان ئەتوانن
، لە بری سەرقاڵبوون بە ھەڵبژاردنێکی تر ، ناونیشانە ڕاستەقینەکانی (یەکێتی وگۆڕان)
زیندووبکەنەوە ، بەھای سیاسەت وحوکمڕانی ومتمانەی ھاوڵاتیان بژێننەوە ، ئەگەر نا ئەوا
دانیشتوانی زیاتر لە نێوەی ھەرێم ، بۆ ھەتا ھەتایە ، دوڕاوی یەکەمی گرەوی ژمارە ئەبن.