وتار

ھەڵبژاردنی پێشوەخت لە ھەرێم ڕابگەیەنن

10/27/2020 11:07:00 AM 253 جار خوێندراوەتەوە
سمكۆ ئەسعەد

ھەڵبژاردنی پێشوەختە لە ھەرێم، بۆ ھەڵبژاردنەوەی خولێکی نوێی پەرلەمان و پێکھێنانی کابینەیەکی نوێی حکومەت بۆ ھەرێم، شان بە شانی ھەڵبژاردنەکانی عێراق لە حوزەیرانی ٢٠٢١ دا ، پێویستییەکی گرنگی مانەوەی ژیان و و گوزەرانی ھاوڵاتیانە .

بێگومان ئاسان نییە داوا لە بەشێکی زۆری ئەندامانی ئەم خولەی پەرلەمان و وەزیرانی ئەم کابینە حکومییە بکەیت، کار بۆ ھەڵبژاردنی پێشوەختە بکەن، لەبەر ئەوەی داوایان لێئەکەیت رۆژی کۆتایی ھێنان بە دەسەڵاتەکانیان دیاری بکەن، بەڵام لە ھەمان خول و کابینەدا کەسانێک ھەن ، ھەست بە گرنگی و پێویستی ئەو ھەنگاوە ئەکەن ، لە پاڵ ھەستکردنی زۆرینەی ھاوڵاتیانی ئەم ھەرێمە بەوەی چیتر مانەوەی ئەم دۆخە، بەم شێوەیەی ئێستا، داڕمان و نەھامەتی گەورەتری بە دوادا دێت .


سەرەتا وەک ھەنگاوی یەکەم، پێویستە یاسای ھەڵبژاردنی پەرلەمانی ھەرێمی کوردستان ھەموار بکرێتەوە بە ھاوشێوەی یاسای ھەڵبژاردنەکانی عێراق و یەک بازنەیی لە ھەرێمدا بگۆڕدرێت بۆ ئەو ١٢ بازنەیەی بۆ ھەر سێ پارێزگاکەی ھەرێم دانراوە لە یاسا عێراقییەکەدا .

ھەنگاونان بەرەو ھەڵبژاردنی پێشوەختە، ململانێی نێوان دوو بەرەی نیشتمانپەروەری  و بەرژەوەند خوازییە ، کێ لەگەڵە و کێ لە دژە ئەکەوێتە ڕوو ، لەبەر ئەوە داواکارم لە پەرلەمانتاران لەسەر ئاستی تاک تا فراکسیۆن ھەڵوێستیان ڕابگەێنن لەبارەی دەربازبوون لەم قەیرانی حوکمڕانییە، بە ھەنگاونان بەرەو ھەڵبژاردنی پێشوەختە.

ھەڵبژاردنەوەی پەرلەمان و پێکھێنانی کابینەیەکی نوێ ، دەرفەتێکی باشە بۆ ھەردوو لایەنی ھاوکێشە لاسەنگەکەی دەسەڵاتی سیاسی و ھاوڵاتیان لە ئێستای ھەرێمدا، دەرفەتە بۆ دەسەڵاتی سیاسی کە ھەنگاوێک بۆ وەستاندنی ئەم پرۆسە شکست خواردوەی حوکمڕانی بنێت.

دەرفەتە بۆ ھاوڵاتیانی ھەرێمی کوردستان ، سەرەتایەکی نوێ و نەخشەیەکی نوێی بۆ ژیان و گوزەرانیان دابڕێژنەوە لە سایەی دەسەڵاتێکی جیاوازدا .

سۆشیال میدیا

ڕۆژنامەی زەمەن

Advertisement