وتار

پلانی وەرگرتنەوەی موچە نەدراوەكانی فەرمانبەران و مامۆستایان

12/24/2020 10:07:00 PM 365 جار خوێندراوەتەوە
سمكۆ ئەسعەد


دەرفەتێكی یاسایی گرنگی وەرگرتنەوەی موچە نەدراوەكانی فەرمانبەران و مامۆستایان و لێبڕینە نایاساییەكانی تری ماف و شایستەكانیان، لە پرۆژە یاسای بودجەی 2021 ی عیراقدا ، بوونی هەیه‌.

پێویستە فەرمانبەران و مامۆستایان ئەركی وەرگرتنەوەی ئەو مافە بگرنە ئەستۆی خۆیان، بە گرتنەبەری ڕێكارە جێبەجێكاری و یاساییەكان .. و لە ئەنجومەنی نوێنەرانی عیراقەوە دەست پێ‌ بكەن بەم شێوەیە :

- ئامادەكردن و دارشتنی بڕگەیەكی پەیوەست بە قەرزە داراییەكانی فەرمانبەران و مامۆستایان لە ساڵانی 2015 تا 2020 و جێگیركردنی ئەو بڕگەیە (وەك قەرزی شایستەی پێدانەوە) لە ئەستۆی حكومەتی هەرێم لە ناو پرۆژە یاسای بودجەی 2021 دا ، پێش ئەوەی بخرێتە بەر دەنگدان.
- بۆ ئەو مەبەستە ، پێویستە دەستەیەك لە نوێنەرانی مامۆستایان و فەرمانبەران بۆ چاوپێكەوتنی لایەنەكانی پەرلەمانی عیراق ، سەردانی بەغدا بكەن و داوای جێگیركردنی ئەو بڕگەیە، لە پرۆژەیاسای بودجەی 2021 بكەن، تا دەنگی لەسەر بدرێت ، بە تایبەت لەو بڕگانەدا كە هەرێم پابەند ئەكات بە چۆنیەتی خەرجكردنی داهاتەكان .

- داوای پێكهێنانی سندوقێك بكەن، ناوی (سندوقی قەرزەكانی فەرمانبەرانی هەرێم - صندوق دیون موڤفی الاقلیم) بێت ، لە پرۆژە یاسای بودجەی 2021ی عیراقدا جێگیر بكرێت ، بە یاسا كارەكانی ئەو سندوفە ڕێكبخرێت.
- دەستبەجێ‌ پرۆژە یاسای (سندوقی قەرزی فەرمانبەران و مامۆستایان) ئامادە بكرێت وبخرێتە بەر دەنگدان . 
- بە جێگیركردنی شایستەكانی فەرمانبەران و مامۆستایان لە یاسای بودجەی 2021دا ، مافە داراییەكانی 2015 تا 2020 و تا پاكتاوكردنی سەرجەم مافەكان بەردەوامی دەبێت و چیتر فەرمانبەران ومامۆستایان بە گومان و دوودڵییەوە رۆژ ناژمێرن .
بێگومان وردەكاری و میكانیزمی سەردانیكردنی لایەنە سیاسییەكانی عیراق و دارشتنی بڕگە یاساییەكانی نێو پرۆژە یاساكەی بودجەی 2021ی عیراق و دامەزراندنی سندوقێك بە یاسا ، گفتوگۆی زۆر هەڵدەگرێت ، داواكارم لە نوێنەرانی فەرمانبەران و مامۆستایان  زوو  دەستبەكاربن تیایدا .

چیتر لەسەر كەس نەوەستن، چیتر متمانە بەو كەسانە نەكەن كە سازش بە بژێوی و چارەنوسیانەوە ئەكەن، بابەتی ئەم نوسینەش تێكەڵ بە (بابەتی گواستنەوە موچە بۆ سەر بەغدا) نەكەن .

سۆشیال میدیا

ڕۆژنامەی زەمەن

Advertisement