وتار

عێراق و پرۆکسیەکان و کورد

3/31/2022 9:22:00 AM 113 جار خوێندراوەتەوە
ئاسۆ عەبدوللەتیف


• دەنگە سەربەخۆکان کەوتنە ژێر پێی ورچە گەورەکان و بە دوبارەکردنەوەی هەڵبژاردنەکان وەک ئەگەرێک یانی کەوتنی ئۆپۆزسیۆنە کاتیەکەی عێراق و هاتنەوەی هەژموونی حەشدو وەلائیی بۆ گۆڕەپانی سیاسی و بێدەنگ بوونی درۆن و موشەکەکان.

• ئێستا بە کردەنیی نەک تەفسیری قانونیی دوای هەردوو جوڵەکەی بەرەی چوارچێوەی هەماهەنگی بۆ سێیەکی پەکخەر، ٢٦-٣-٢٠٢٢ + ٣٠-٣-٢٠٢٢. عێراق لەناو  بۆشایی دەستووریدایەو شەش مانگە هەڵبژاردن کراوەو حکومەت دیار نییە و تەواوی جومگە هەستیارەکانی عێراق لە جووڵە کەوتوون و عێراق لە چاوەڕوانی دوایین دەرفەتی دیبلۆماسی و دانوستاندا وەستاوە.

 • بەڵام وەک فاکت عێراق دابەش بووە بەسەر پێنج سەرۆکایەتیدا، کە بریتین لە ؛ کۆمار_وەزیران_پەڕلەمان_هەیئەی حەشدی شەعبی _دادگای فیدڕاڵیی. دوای دوو جوڵەی بەرەی سێیەکی پەکخەر، دادگای فیدراڵیش خەریکە دەبێتە تەرەف و تێوە دەگلێ، چونکە بێدەنگی زۆر جار تەڕەفە. ئێستا لەو پێنجە، دوو سەرۆکایەتی چالاکن و سیان پەکخراو، حەشدو مەحکەمەی ئیتیحادی و بەس.

• موقتەدا سەدر ڕەنگە بیەوێت حەشد هەڵە گەورەکە بکات، یان بجوڵێت و جوڵە تائیفیی و نایاساییەکە بکات و ئەویش بقۆزێتەوە بۆ مارکێتینگی سیاسی ئایندە و بەمەرجەعکردنی خۆی وەک پاڵەوانی ڕزگاری و ڕیفۆرم. ئەو ئەزموونەی بینیمان ناشیرینترین مۆدێلی مەزهەبگەرای توند بوو لەلایەن پرۆکسییەکانەوە- بریکارەکان، دژی دامەزراوەی دەستووری و دیموکراسی، دەرگای کردەوە بۆ زۆر پەکخستنی تر !

• بۆیە دەنگۆی رەتکردنەوەی کۆی پرۆسەی هەڵبژاردن و دووبارەکردنەوەی ڕۆژەڤی گەرمە ئەگەر ڕێککەوتنی کاریزمایی نەکرێت، ئەوەش واتە پەکخستنی دەستورو حوکمی جەبریی و بۆنی کۆدەتای لێ دێت.
لە هەموو حاڵەتەکاندا دووبارەکردنەوەی هەڵبژاردن کۆتایی دۆخی ئۆپۆزسیۆن و سەربەخۆخوازان و کورسییە هەڵتۆقیوەکانە، گوڵە پایزەکان. کە نەیانتوانی گەمەیەکی شایستە بەو تەمەنە کەمەوە بەو دەنگانەوە بکەن و کەوتنە ژێر پێی ورچەکان و دەنگەکانی خەڵکی ناڕازیان لەدەستدا.

سۆشیال میدیا

ڕۆژنامەی زەمەن