شمشێرو درهەم، هێزو نەوت !
2/16/2022 3:53:00 PM
251 جار خوێندراوەتەوە
ئاسۆ عەبدوللەتیف
موعاویەی کوڕی ئەبو سوفیانی ئەمەوی، وەک هاوەڵی
نزیکی پێغەمبەر ﷺ و شەشەم خەلیفەی موسوڵمانان و دامەزرێنەری دەوڵەتی ئەمەوی لە
شام. لەسەروەختی نەخۆشکەوتن و وەفاتکردنیدا لە تەمەنی حەفتاوهەشت ساڵی، واتە لە ساڵی
٦٠ ی کۆچیی، کە پایەکانی خیلافەتی ڕادەستی یەزیدی کوڕی کرد، وەعزو ئیرشادی ئاشتیانەی
بۆ کوڕەکەی نەکرد و باسی ئیسلام و شوراو جیهادو عەقیدەو بیروباوەڕو ئیمان و ڕەببانیەتی
بۆ بکات. ڕێک و ڕەوان ؛ لە کۆشکە سەد ژووریە
بە خشت هەڵچنراوە تابلۆدارە ڕازاوەکەی لە شام، بە یەزیدی وت کوڕی خۆم سۆز بخەرە
لاوە سەیری بەرەباب و ڕەچەڵەک مەکە، هێز بریتییە لە شمشێر بە شمشێر، گەر ئەتەوێ زاڵ
بیت بەسەر خەواریج و فیتنەی عێراق و ئەمیرایەتی و خەلیفەی دەوڵەتی ئەمەوی، گرنگی بە
زۆری هێزو شمشێرو دینارو درهەمەکان بدەو پیاوی ئازا بکڕە، ئامۆژگاری یەزید دەکات و
دەڵێ خیلافەت هیچ حیکمەتێکی تێدا نییە ئەگەر هێزت نەبوو، دەسەڵات تەنها سەوداو مامەڵەکردنە
بە بەندەو فەرماندە ئازاکانەوە، ئازاکانیان لە هەرکوێ بوو بەهەر نرخێک بوو بیانکڕەو
ترسنۆکەکانیان سەرقاڵ بکە بە ژن و شەراب و بەخێوکردنی حوشترو دارخورماکانەو.
هەر بەو حیکمەتە یەزیدی کوڕی مەعاویە، دەسەڵاتی
چەسپاندو عێراقییەکانی کوفەو بەسرەی کڕی و ویلایەتەکانی خستە ژێردەستی خۆی و دەیان
پیاوی جەربەزەی وەک عوبەیدوڵای کوڕی زیادی کردە شوێنکەوتەی خۆی بۆ خوێنڕێژیی و دژی
بەرەی حوسەین و ئال و بەیتەکەی، بن زیاد کە والی بەسرەو کوفە بوو، کردی بە گژی ئیمامی
حەسەن و حوسەینی ئەولادی ئیمامی عەلیدا. ڕەزاو ڕەحمەتی خودا لە هەموویان بێت، رضي
الله عنهم.
دەی ئەو عێراقەی ئێستا هیچ نەگۆڕاوە ڕەزاو ڕەحمەتی
خودایان لەسەر نەبێت، شمشێرو درهەم حوکمی دەکات، زیهنیەتی خوێن و فاشیزم و دیدی خیلافەگەریی
و فیتنەو ئاشووب هەر ماوە، کوفەو بەسرە هێشتا لە خراپترین دۆخدان و ئاوی سوێراو دەخۆنەوە،
شیعەکان خۆیان سەدان فیرقەو کەتیبەو لیوای میلیشیایی و پاڵاوگەی نایاسایی نەوتیی و
گومرگ و مەرزو مزگەوت و مەرقەدیان بەدەستە، کەچی ڕێگریی دەکەن لەوەی کورد هەرێمێکی
سەربەخۆو پێشمەرگەو نەوتی خۆی و سیاسەتی خۆی هەبێت و دەستکراوەبێت بەڕووی جیهاندا.
کورد پێویستە چیتر پیاوی خۆی نەنێرێت بۆ بەغداد
بەڵکو وەک یەزیدو موعاویە سیاسەت بکەن و پیاوەکانیان و مەندوبەکانیان و ئەشرافەکانیان
بکڕن و ویلایەتەکانیان بدەن بە گژ یەکتریدا.
چونکە ئیتر ئەستەمە گۆڕینی ئەو دیدە ئینقیلابیی
و سەربازییەی شیعە بۆ دیدێکی دیموکراسی و پێکەوەیی، کە تاکی عێراقی و کورد و سوننەو
کەمینەکان هەست بە ئارامیی و شوناسی وەک یەکیی بکەن.