کاتێ سەرکردە و فەرماندە دەڵی " نا"
1/23/2026 12:22:00 PM
مەلا فەرمان محەمەد
٥٠ پەنجا ساڵ بەر لە ئێستا،
شای ئێران بە سەرۆک و جەنەراڵ بارزانی باوکی وت " کاری شما تمام شد"، یانی
ئاشبەتاڵ بکەن، ئەگەر بێهەڵوێستە لەسەرکردن بی وتایە " بە پێوە و بەکەرامەتەوە
دەمرین، بەڵام چەک دانانێین" بێگومان هاوکێشەکە بە جۆرێکی تر دەبو، دواجار
ئاشبەتاڵ نەدەکرا و سەرکەوتن هەر بۆ شۆڕشی کورد بو. سەرۆکیش لە خاکی خۆیی و لە ناو
میللەتی خۆی بەسەربەرزی گیانی دەسپارد، لای هەمو میللەت دەبو بە سمبولی خەبات.
دوای ٥٠ ساڵ سەرکردە و فەرماندەکانی شەڕڤانانی رۆژئاوا
لەو مێژوە پەند وەردەگرن و هەمان هەڵە دوبارە ناکەوە، پۆست و پلە لە خشتەیان نابەن،
بۆیە لە جیاتی هەموان دەڵێت " بە پێوە و بە کەرامەتەوە لە ناو میلەتی خۆم دەمرم".
نا و نەخێرێک وەک زەمین لەرزەیەکی پلە ٨ رێختەر شەقامی کوردی و دونیای هەژاند:
١- ریزەکانی کوردبون و کوردایەتی
راستەقینەی یەک خست، ئومێدی چاندەوە. لە چوارلاوە و لە تەواوی دونیا کچ و کوڕی
کورد رژانە سەرشەقام بۆ پشتیوانی لە فەرماندە و سەرکردە و رۆژئاوا.
٢- کاریگەری جدی لەسەر دۆست
و دوژمن و نەیارانی دانا، وای کرد بە هەڵەی خۆیاندا بچنەوە.
٣- پەیامی سوربونی بە بەردەوامیدان
بە خەبات بە گەورەترین دەسەڵاتی دونیا دا. راستەوخۆ پێی وتن " ئێوە خیانەتتان
لێمان کرد".
٤- ئەو نەخێرە ناپاکی بەشێ لەو
هۆزە عەرەبیانەی دەرخست کە کورد چاکەی لەگەڵ کردبون،. ئەو ناپاکیەی بوە هۆی شکستی
سەربازی لە هەندێ ناوچەی عەرەب نشین. لەم هەڵەیەش هەرزو پەندیان وەرگرت و دەستیانکرد
بە پاکسازی.
٤- بزوتنەوەی سیاسی و دیبلۆماسی
کوردی خستەوە جوڵە.
ئەم نایە جگە لە ئاستی شەقامی کوردی لە ئاستی نێودەوڵەتی
و هەرێمایەتیش کاریگەری خۆی کرد:
١- روسیا بگەڕێتەوە رۆژئاوای
کوردستان و هەوڵی گێڕانەوەی بەڵانسی هێزبدات، لە کاتێکدا روسیا سەرقاڵی شەڕیکی گەورەیە
لەگەڵ ئۆکراینا. بۆ کورد گرنگە لەم گەڕانەوە تێبگات و نەبێتە گەنمی نێوان دو بەردئاش.
٢- ئەمەریکا و وڵاتانی ئەوروپی
هەڵوێستەیەکی جدی بەکەن لەسەر دەسەڵاتی تازەی کۆماری سوریا.
٣- مافی مرۆڤی سەربە نەتەوە یەکگرتوەکان
لە نزیکەوە رەفتاری داعشیانەی سوپای سوریا ببینن: دژ بە عەلەوی، دروز و کورد.
٤- بە تەواوی بۆ هەمو تاکێکی
کورد بە کردەوە رونبوەوە کە تورکا دوژمنی سەرسەختی گەلی کوردستانە. براکان لە
باکور عەرشی سوڵتانیان هەژاند.
ئەم سەرکەوتنە بەردەوام دەبێت بە:
* بەردەوامی پشتیوانی جەماوەری کوردستان .
* دەستلەناودەستی
کوڕان و کچان
* خۆنەویستی
و سادەیی سەرکردە.
* یەکڕیزی
حیبەکانی کوردستان