كوردستان لەناو ئەو تونێلە گیری خواردووە!
10/17/2025 11:29:00 AM
هەندرێن شێخ راغب
كایەی سیاسی لەهەرێمی كوردستان لەناو دوو تێڕوانین دا گیرۆدە بووە، ناتوانێت
بەلایەكدا یەكلابێتەوە، هەندێكجار لەناو خەڵك و نوخبەشدا گفتوگۆیەك دروست دەبێت، بەڵام
هێشتا نەبۆتە مشتومڕی راستەقینە.
دوو تێڕوانین هەیە، یەكەمیان پێی وایە ئەم نەتەوانەی لە قۆناغی رزگاری نیشتمانین‌و
نەبوونەتە دەوڵەت، نابێت فرە حزبی بن و تەنها حزبێكی بەهێزو پێشڕەوی دەوێت كە رابەرایەتی
دۆزەكە بكات هەتا دەگاتە كۆتایی قۆناغەكە، ئەوكاتە بۆ زیندوو هێشتنەوەی پرۆسەی سیاسی
حزب و لایەن و مینبەری سیاسی جیاواز دروست دەبێت و ئیدارەی جیاوازی و ناكۆكیەكانی
ناو هەناوی دەوڵەت و نەتەوە دەكات، نمونە كەمال ئەتاتورك، دەوڵەتی توركیای دروست
كرد ئینجا فرە حزبی دروست بوو. ئەم بۆچونە پێی وایە حزبی پێشڕەو دەتوانێت بە ئاسانی
بڕیار دروست بكات، پەرلەمان و حكومەت و هێزی لایەو پرۆسەی بڕیار بە باشی دەتوانێت
گەڵاڵە بكات، نمونە ئەگەر یەك حزبی پێشڕەو هەبوایە لە ریفراندۆم دەیتوانی ئیدارەی
كەركوك و ناوچەكانی دیكە بكات و حزبێكی تر نەبوو بێ پرسی ئەو رێككەوتن بكات و بڕیار
لەسەر ئەم ناوچانە بدات.
بۆچونی دووەم رێك پێچەوانەیە، بەرگری لەوە دەكات مۆدێلی حزبی پێشڕەو كۆتایی
هاتووە، ئەم جۆرە حزبانە نمونەی وەك بەعسی سوریاو عێراق دروست دەكات و لە جێگای خۆی
بۆگەن دەكات، چونكە كەس نیە ركابەرایەتی بكات و مەترسی لەسەر پێگەی دروست بكات،
دواجار هەڵەی مەترسیدار دەكات كە دەیان ساڵی دەوێت هەتا دێتەوە سەر رێچكەی خۆی،
نمونە دەڵێن ئەگەر فرە حزبی و پەرلەمانێكی بەهێز هەبوایە رێگای نەدەدا ریفراندۆم
بكرێت و رایدەگرت و دۆخەكەی بەجۆرێكی تر ئاراستە دەكرد كە زیانی گەورەی لێ نەكەوێتەوە.
كوردستان خاوەنی حزبی پێشڕەو نیە، بەڵكو خاوەنی حزبی دەسەڵاتدارە، خاوەنی
فرە حزبی نیە، بەڵكو خاوەنی ناكۆكی حزبی و فەوزای حزبیە. بۆیە پێویستە ئەم بابەتە
گفتوگۆیەكی گرنگی ناو كایەی سیاسی و خەڵك بێت، بۆ ئەوەی كوردستان لەم تونێلە سیاسیە
دەرچێت و بەلایەكدا بكەوین.