وتار

نەورۆز وەک پێگەیەک بۆ شوناسی نەتەوەیی و نیشتمانی .

3/23/2019 9:51:00 AM 797 جار خوێندراوەتەوە
بەختیار نامیق


بە پێ ی سەرچاوە مێژوییەکان نەورۆز بۆنەیەکی نەتەوەییە ، ئەگەر چی نەورۆز جەژنی زۆرێک لە میللەتانی ناوچەکەیە ، بەڵام دوا جار وەک بۆنەیەک بوەتە پانتاییەک بۆ ئازادی نەتەوەکان و بەتایبەتی تر کورد ، کورد ئەم بۆنەیە وەک بۆنەیەکی تەواو نیشتمانی دەبینێ ، نەورۆز تەنها یادێک نیە و بەس تەنها هەڵکردنی ئاگر و ژیانەوەی زەوی و داوای کورد نیە  بۆ ڕزگار بون لە ژێر دەستی وەک قوڵایی مێژو ، بەڵکو لە هەناوی ئەم یادەدا بەدەر لە پیرۆزکردنی ئەم یادە هەڵگری دنیایەک چەمکی نەتەویی و شوناسی نەتەوەیەکە ، بەردەوام دیواری نەورۆز ئەو بۆنە بوە کە تاکی کورد دروشمەکانی پیا هەڵدەواسێ و تازەی دەکاتەوە ، پەیامێکە بە دنیا دەڵێ کورد دەبێت ببێتە خاوەن ناسنامەی خۆی ئەگەر چی لە چوارچێوەی ئەو وڵاتانەشدا بێت کە مێژو بەسەر کوردیانا سەپاندوە ، بە مانایەکی تر تەنها سەیران و دەربڕینی خۆشەبەختی نیە ، ئەگەر ئەمە بەشێکی بێت ئەوا بەشە قورس و قوڵەکەی داواکردنی ئازادی و بون بە خاوەن شوناسی ڕاستەقینەی خۆمانە ، نەورۆز ئەو دروشمەیە کە بەڕوی وڵاتانی ناوچەیی و جیهانیدا هەڵدەکرێت کە ئێمە بەردەوامین لە مانەوەمان و داواکاری نەتەوەیەکی بێ جوگرافیا و کیانێکی سیاسی ، نەورۆز وەڵامدانەوەی ئەو نەتەوانەیە کە ڕەگەزپەرستن و دان بە بونی کوردا نانێن ، وەستانێکە لەبەردەم ئاڵنگاریە گەورەکاندا .


ئەگەر سەیر بکەین لە ڕۆژهەڵات و ڕۆژئاواوە بۆ باکور و باشور کورد بە بێ جیاوازی بەشداریەکی قورس دەکات لەم بۆنەیەدا کە دەکرێت لەسەر و هەمو بۆنەکانەوە ببینرێت ، جونکە هێندە سەیرکردنێتی وەک خەباتی بەردەوام ، هێندە گەشت و سەیران و یادکردنەوە نیە ، دەکرێت بڵێین ئەمە بەشێکێتی ، بەشە گەورەکەی هەزاران بارە کردنەوەی بونی ئێمەیە لەسەر خاکێکی داگیرکراو ، دروشمێکە کە خاوەندارێتی زمان و خاک و فەرهەنگمان دیاری دەکات .


لە ناوخۆشدا بڕینی بیری حیزبیە و حیزب دەکاتە وەسیلەیەکی بچوک لە بەردەم بە نیشتمانی بونی هەمو تاکێکی کوردا ، نەورۆز بۆ حیزبەکان هێندەی پەیامێکە بۆ شەرمەزارکردنیان هێندە بۆنەیەک نیە حیزبەکان بێن شانازی پێوە بکەن ، نەورۆز بە حیزبەکان دەڵی ئەگەر چی ئێوە هەر یەکەتان درێژکراوەی وڵاتێکی بێگانەی فاشیزمن ، بەڵام لە هەناوی کۆمەڵگادا شتێک هەیە لە ئێوە بەرپرسیارانە تر لە ئێوە گەورە تر ، نەورۆز بۆ حیزبەکان مایەی شەرمەزاری و شکستە چونکە ئەوان جوگرافیای ئەم نەتەوە دابەش دەکەن و نەورۆز وەک یەکیەتیەکی ناوەکی قورس هەڵەکانی ئەوان ڕاست دەکاتەوە کورد دەکاتە یەک لاشە ، ئەم نەورۆزە بۆ دوژمنانی کورد و حیزبە فاشیلە کوردیەکانی سەلماند کە داواکردنی خاوەندارێتی شوناسی نیشتمانی داواکاریەکە لە هەناوی کۆمەڵگادا هەیە و لە خواستی تەسکی حیزبەکان گەورەترە ، دەبینین کورد بون سنوری جیاکاری دوژمن حیزبی گرگنی بڕی هەورامی لە ئاکرێ یە و دیار بەکری لە مەریوانە و سنەیی و سلێمانی و قامشیلی و دیار بەکری لە قەندیلن ، ئەوەی دەمێنێتەوە دەبێت بڵێێن نەورۆز تاقە ئاوێنەیەکە کە ڕاستی هەر تاکێکی کوردی بەرامبەر شوناسی نەتەوەیی پێشان دەدا .

سۆشیال میدیا

ڕۆژنامەی زەمەن