730وتار

یەكێتی ئیفلیج دەكات
كاڵفامی سەركردەكان

11/5/2019 10:43:00 AM
موعتەسەم نەجمەدین

 

ئەوەی نكۆڵی لێناكرێت یەكێتی لە ئەمڕۆدا لە قەیرانێكی فرە رەهەندا ژیانی رێكخراوەی خۆی دەگوزەرێنێت. لەم ئاراستەیەداو لە چاوەڕوانی ئەنجامدانی كۆنگرەیەكی تەندروست بۆ رزگاركردنی یەكێتی لەو قەیرانەی تێیكەوتووە تا ئەمڕۆ ئاماژەكان دڵخۆشكەر نین. چڕبوونەوەی قسەوباس و وتوێژەكان لەسەر ئەنجامدانی كۆنگرەیەكی تەوافوقی بۆ رزگاركردنی یەكێتی بۆخۆی یەكێك لە هەرە كێشەو ئاماژە ترسناكەكان. رێكەوتنی پێشوەختەو مانەوەی هەندێك لەو سەركردەو كادرانەی رۆڵی گەورەو كاریگەریان لە بەلاڕێدابردنی یەكێتیدا هەبووەو هەر خۆیان سەرچاوەی قەیران و نەخۆشیەكانی یەكێتی بوونە، ئەم رێكخراوە گەورەیە بەرەو مەرگی كۆتای دەبات.
لەم پرۆسەیەدا دەبێت یەكێتیەكان لە سەرەوە تا خوارەوە لەو راستیە تێبگەن، كە لە ئەمڕۆ بەدواوە ئەو بۆچوونە راست نابێت، كە دەڵێت: یەكێتی بەدیلی نیەو بە هەموو كەموكورتیەكانمانەوە خەڵك و لایەنە سیاسیەكان ناچارن قبوڵمان بكەن. لە روویەكی ترەوە یەكخستنی هێزی پێشمەرگە لە باشترین حاڵەتدا بۆ خەڵكی كوردستان، یەكێتی و پارتی لە فاكتەری هێز دادەماڵێت، یان ئەم هێزە دەكرێتە هێزێكی نیشتمانی وەك ئەوەی خەڵكی كوردستان بەگشتی خەونی پێوە دەبینن، لە خراپترین باریشدا ئەم هێزە لەلایەن پارتیەوە بە مۆڵی قۆرخ دەكرێت. ئەم پێشبینیە جێگای مەترسی زۆربەی كادران و ئەندامانی یەكێتیە. بەواتە لە قۆناغی داهاتودا ئەگەر یەكێتی كێشە و گرفتەكانی چارەسەر نەكات زۆر بە ئاسانی بەدیلی بۆ دەخوڵقێت، لێرەدا چارەسەر ئەوە نیە كۆنگرەیەكی كارتۆنی ئەنجام بدات و هەمان عەقڵیەت و میكانیزمی كاری رێكخراوەی بەرهەمبێنێتەوە. لە پێش هەموو گرفتێكەوە گرفتی عەقڵیەتی سەركردایەتی و شێوازی رێكخستن و كاری رێكخراوەی پێویستی بە گۆڕانكاریە. ئەم فۆرمە لە كاری حزبی وەك شێوەو شكڵی مەڵبەندەكان و مەكتەبی رێكخستن و راگەیاندن و چاودێری و ....هتد، بە تەواوەتی سواون و كاریگەریان وەك فۆرم نەماوە. قەیرانی ستراكچەری یەكێتی لە جەوهەردا تەنیا  لەبەرئەوە نیە، كە یەكێتی قەیرانی نەبونی سەركردایەتیەكی شیاوو لێهاتوی هەیە، بەڵكو ئەم فۆرم و شێوازە لە كاری رێكخراوەی مۆدو سەردەمیان بەسەرچوەو كاریگەریان نەماوە. بۆیە هەموو پرۆژە و كارێكیان هیچ كاریگەریەكی لە سەر ئاشتكردنەوەی شەقامی یەكێتی نیە و نابێت. لاسایكردنەوەی عەقڵیەتی پارتی و فۆرم و شێوازی كاركردنی، گرفتێكیتری یەكێتیەكانە، چونكە لە واقعدا ئەگەر ئەو فۆرمە بۆ ئەم دەڤەرو ناوچەیە بگونجایە، هەر لە سەرەتاوە نە یەكێتی و نە مەدرەسەی سیاسی سلێمانی دروست نەدەبوو. قەیرانەكانی یەكێتی لە بوار و رەهەندەكانی هزرو سیاسەت و رێكخراوەی و ..هتد، لە جەوهەردا بەهۆی نەبوونی سەركردایەتیەكی لێهاتووە، كە لە ئاست پێداویستی قۆناغەكەدا بێت و توانای تێگەیشتنی لە ئەجندا و دنیابینی و عەقڵ و تێگەیشتنەكانی دنیای نوێ و گۆڕانكاریە بنەرەتیەكانی هزری سیاسی و ئابوری و كەلتوریدا بێت. 

لە ئەمڕۆدا یەكێتی پێویستی بە نوێبونەوەیەكی راستەقینە لە گیان و جەستەیدا هەیە، نەك نوێبونەوەیەك لە دەموچاو بەرگەكان، نەك گۆڕینەوەی باوكە پیرەكان بە كوڕە لاو و هەرزەكارەكان. لەم پرۆسەیەدا ئەوەی جێبەجێكردنی ئەم ئەرك و پرۆژەیە زۆر سەختەو دژوار دەكات ئەوەیە، باسە راستەقینەكەو كێشە هەقیقیەكە هیچ قسەو وتوێژێكی لەسەر ناكرێت، هەموو كێشەكان لە دیاریكردن و رێكەوتن لە سەر دانانی سەرۆك یان سكرتێر كورتكراوەتەوە. جەوهەری پرۆسەكەیشیان شەڕی پۆست و پلەو دەسەڵاتەكانە لەنێوان سەركردە كۆنەكان و تێكۆشەرە دێرینەكان خۆیاندا.

ئەم شەڕو ناكۆكی و ئاشوبانە لە كاتێكدایە تەواوی جەستەی یەكێتی توشی رزان و هەڵوەشاندنەوە بووە. تێكۆشەرە دێرینەكان و هەندێك لە سەركردەی هەلپەرست و بێ رابردووە بێ گوێدانە ئەوەی دەرئەنجامی ئەم سیاسەت و هەڵسوكەوتەیان چی دەبێت، چوارمشقی لە سەر بەرەی گەندەڵی و نادادپەروەری دانیشتوون، وەك ئەوەی مێشیش میوانیان نەبێت سورن لەسەر گەیاندنی یەكێتی بە مەرگ و كۆتایی. لەم ستراتیجە تایبەتەیاندا دروشمێكی شاراوەیان هەیە، كە دەڵێت: یان دەبێت ئەم وڵاتە بۆ ئێمەو كوڕەكانمان بێت یان تەڕو وشك پێكەوە دەسوتێنین...، ناڕاستەوخۆیش دەڵێن: ئەی جەماوەری یەكێتی ئێوە بۆخۆتان باش دەزانن، كە لە پرۆسەی روخان و مردنی یەكێتیدا تەنیا ئێمەی دەسەڵاتدارە، كە زەرەرمەند نابین، چونكە پارەو موڵك و داهاتمان سنوری كوردستانی بڕیوەو ژیانی خۆمان و ماڵ و منداڵانمان بۆ سەدان ساڵی تر مسۆگەر كردووە، ئەوە ئێوەن دەبنە قوربانی و لە دوای رۆیشتنی ئێمە دەكەونە ژێر دەستی گورگ و چەقڵ و بە رۆژی نیوەرۆ و بە بێبەزەییانە مەرگ و ئەشكەنجەو نەهامەتی دەبێتە میوانی سەر سفرەتان، بۆیە دەبێت ئێوە مەمنون بن، كە ئێمە  بمێنینەوە، دڵنیابن ئەگەر ئێمە بڕۆین ئەم وڵاتە بەم كەلاوەیشەوە بۆ ئێوە جێناهێڵین، كە هەوڵی چاكردنەوەو پێشخستنی بدەن. لە ئەمڕۆدا تێكۆشەرە دێرینەكان كار لەسەر گەوجاندنی كادران و ئەندامانی یەكێتی وەك ستراتیژ دەكەن. هەڵسوكەوتی رۆژانەی ئەم سەركردانە تەنیا یەك ئاماژە پەخش دەكەن ئەویش ئەوەیە، كە ئەمان تا تەڕایی لە حزبەدا بمێنێت جێی ناهێڵن و بەردەوامیش كار لەسەر شكاندنی شكۆی یەكێتی و سەروەریەكانی دەكەن. بۆ تەنیا ساتێك ئامادە نین نەیارانی یەكێتی لە خۆیان زویر بكەن و بەرگریەك لە یەكێتی بكەن، بەڵام تا ئاستی ئێسك شكاندن و خوڵقاندنی كارەسات ئامادەن رووبەڕووی هاوڕێ و تێكۆشەرە دێرینەكانی خەباتی رزگاری و خەڵكی دڵسۆزی یەكێتی ببنەوە. 

دەرئەنجامی ئەم عەقڵیەت و سیاسەت و بیركردنەوەیە، دابڕانێكی ئەوەندە فراوان و قوڵ لەنێوان توێژی تێكۆشەرە دێرینەكان و سەركردە هەلپەرستەكان لەگەڵ جەماوەرو میللەت و كادرو ئەندامانی یەكێتی دروست بووە، هیچ پردو پەیوەندیەك لە نێوانیاندا نەماوە، بۆیە زۆرجار هەڵوێست و بڕیارو كاری ئەم توێژە لە سەركردایەتی ئەوەندە نامۆیە لە بڵاوبوونەوەیدا دەبێتە نوكتەو چیرۆكێكی گاڵتەجاری. لەم پانتاییەدا هەموو رەخنەو دەربڕینی بۆچونێكی كەسانی روناكبیرو وشیار، هەموو نوسین و وتارێكی راستگۆیانە و جدی لای توێژی خاوەن كورسی و دەسەڵات هیچ رەنگدانەوەیەكی نیە، تەنانەت ئامادەنین وڵامیشی بدەنەوەو رەتیبكەنەوە. ئەم بێمنەتیە لە جەماوەرو خەڵك من بۆخۆم نازانم سەرچاوەكەی بە دیقەت چیە، ئایا هۆی ئەوەیە ئەوان دڵنیان لەوەی، كە ئەم خەڵك و جەماوەرەیان تەواو بێ ئیرادە كردووەو ناتوانن رووبەڕووی ئەمان ببنەوە یان بە راستی پێیانوایە خۆیان خدری زنەن و لەمان باشترو گونجاوتر بۆ ئەم میللەتە نیە، دەوروبەرەكانیان لە خەڵكانی هەلپەرست و درۆزن رۆژنە راستیەكانیان لێدەشارنەوەو ئەوە دەڵێن، كە دڵ و دەرونی ئەوان دەیەوێت، نەك راستیەكان وەك خۆی. پرسیارێكی جدی لەمەڕ هۆی سەرەكی ئەم شێوە دنیابینی و هەڵسوكەوتەی سەركردە سیاسیەكان و تێكۆشەرە دێرینەكان ئەوەیە، ئایا ئەمانە بۆخۆیان بە سروشت كەسایەتیان بەو شێوەیە، كە دەیانبینین، یان دەرئەنجامی كاریگەریەكانی واقعی سیاسی و كۆمەڵایەتی و كەلتوری ئەم كۆمەڵگایەو رێكخراوە سیاسیەكان وا گۆڕاون. بەواتایەكیتر رەفتارو هەڵسوكەوتی ناتەندروست و نابەجێی هەندێك لە سەركردەو تێكۆشەرە دێرینەكان لە بناغەدا لە سەر چ بنەماو دنیابینیەك خوڵقاوە؟ خوێندنەوەی تەندروست و زانستی بۆ سایكۆلۆجیای سەركردەو تێكۆشەرە دێرینەكان چیمان پێدەڵێن؟. لە روویەكی ترەوە چی وا لە كەسانی روناكبیرو خوێندەوارو لێهاتوو زیرەك دەكات، كە ببنە پاشكۆی ئەم توێژەو عەقڵ و تواناو شارەزاییان بخنە خزمەت كارو كردارێكی ناڕەواو ناتەندروستەوەو خزمەتی بەرژەوەندیە كەسێتی و تایبەتەكانی ئەم توێژە بكەن؟. 

سەركردایەتی سیاسی كورد لەبەرئەوەی نازانن لە ئەمڕۆدا، لەسەر ئاستی جیهان چی دەگوزەرێت و خوێندنەوەی تەندروستیان بۆ گۆڕانكاریەكانی دنیا و ئەجندای نوێی زلهێزەكان و ستراتیجی جیهانی گۆڕانكاریەكان نیە، بۆیە هیچ پێشبینیەكیان بۆ رووداوەكان نیەو هیچ خوێندنەوەیەكیان بۆ گۆڕانكاریەكان نیە، بەمەیش هیچ پلان و ئامادەكاری و بەرنامەیان بۆ رووداوەكان نیە، هەموو ئەو رووداوانە لای ئەمان قەدەرەو وەك رووداوی سروشتی مامەڵەی لە گەڵدا دەكەن. لەكاتی رووداوەكانیشدا بۆ رووبەڕووبوونەوەیان هیچ كات بژاردەی دووەمیان نیە، واتە پلان و نەخشەی رووبەڕووبوونەوەیان نیە. بە گشتی سەركردایەتی كورد لە ئەمڕۆدا لەوە بێ ئاگایە، كە لەسەر ئاستی جیهان چی دەگوزەرێت و ئاراستەی گۆڕانكاریەكان میللەتان بەرەو كوێ پەلكێش دەكات. شۆڕش و راپەرینەكانی ئاسیای ناوەندو بەهاری عەرەبی و جوڵانەوەكانی ئەوروپاو جیهانی رۆژئاواو بەرهەڵستكارانی ئەجندای دوای عەولەمەو لێبرالیزمی نوێ لەسەر ئاستی جیهان تەنیا قسەو دروشم و چیرۆكی سیاسی نیە، بەڵكو ئاماژەی بەرجەستەبوونی گۆڕانكاری بنەڕەتی و گەورەن لە كۆی پرسەكانی هزرو سیاسیەت و ئاماژەی بەرجەستەبوونی قۆناغێكی نوێی مێژووی جیهانین. دەركەوتنی تەرمی فۆرمی كلاسیكی رێكخراو و دنیابینی هزری چەپایەتی و عەقڵیەتی راستڕەوی كلاسیكی و داڕوخانی ستراكچەری هەرەمی و زەبت و رەبت و توندوتۆڵی و قاڵببەستوی كاری رێكخراوەی...هتد، تەنیا ئاماژەی كۆتای سەردەمێكی مێژووی تایبەت بە خۆیان نیە، بەڵكو ئاماژەی كۆتای بە قۆناغێكی مێژووی مرۆڤایەتی هێناوە، كە بەرپرسانی ئێمە توانای ئیستیعابكردن و تێگەیشتنیان نیە. لەم واقعەدا ئەوەی بۆ ئەم برادەرانەی ئێمە دەبێتە كارەسات و كێشە ئەوەیە سەردەمی حزبایەتی كارێزمای و دەسەڵاتی تاكڕەوی و تاكەكەسی و تەنانەت دەسەڵاتی نوخبەی پێشڕەویش كۆتاییان هاتووەو چیتر كاریگەرو سیحریان نامێنێت. ئەو فۆرم و شێوازە رێكخستنەی، كە جاران لەسەر بنەمای كاری رێكخراوەی كلاسیكی پەیوەندی نێوان كادرو سەركردایەتی و كادران خۆیان، خەڵك و حزب پەیوەندیەكانیانی دروست دەكردو بەیەكەوەیانی دەبەستەوە، لە ئەمڕۆدا هیچ كاریگەریەكی نەماوەو ناتوانێت ئەرك و كارەكانی حزبایەتی راهی كات. بەواتە داڕوخانی پردی رێكخستنە كلاسیكیەكان دەبێتە گەورەترین كێشە بۆ حزب و رێكخراوە سیاسیە كلاسیكیەكان. پوختەی روونكردنەوە ئەوەیە فۆرم و شێوازی كاری رێكخراوەی ستالینی و كلاسكی رۆژئاوایش وەك تێگەیشتن و رێباز كۆتاییان هاتووە. لە ئەمڕۆدا شۆڕشی زانست و تەكنۆلۆجیای پەیوەندیكردن و فراوانبوونی تۆڕەكانی پەیوەندی ئەلیكترۆنی و سۆشیال میدیا و ...هتد، زۆر بە خێرایی جێگای ئەو فۆرمە كۆنە لە كاری رێكخراوەی دەگرنەوە، پردێكی زۆر پتەوترو تەندروستتر بۆ پەیوەندی نێوان سەركردایەتی بنكردایەتی حزبی نوێخواز دادەمەزرێنن، پەیوەندی نێوان خەڵك و كادران، نێوان كادران خۆیان، پەیوەندی نێوان حزب و جەماوەر دروست دەكەن. ئەم ئامرازە نوێیانە نەك هەر كاری سیاسی و رێكخراوەی زۆر ئاسان و رەوان دەكەن، بگرە زۆرو تەندروستتر جێگای ئامرازەكانی پێشوو دەگرنەوە. زۆر عاقڵانەترو دیموكراسیترو دادپەروەرتر كارەكان بەڕێدەخەن. لەم پرۆسەیەدا فەرمان و رێنماییەكان و دنیابینی سیاسی و هزری سەركردەكان بە شێوەیەكی ئەبستراكت ناگوازرێتەوە، بەڵكو گیانێكی زیندوو دەدەنە پەیوەندیەكان و ئەم ئامرازانە دەبنە سەكۆیەك بۆ گۆڕینەوەی بیرو بۆچونە جیاوازەكان و راستكردنەوەی هەڵەو تێنەگەیشتنەكان و لە دەرئەنجامدا رەوشێكی دیموكراسی و تەندروست بەرهەم دێت. ئەم شێوەو فۆرمە لە كارو ئامرازی تەكنۆلۆجی و زانست، دواین بزمارە لە تابوتی كاری رێكخراوەی كلاسیكی و سروشتی ئۆرگانی حزبایەتی دەدرێت. لێرەدا ئەو راستیە بە روونی دەردەكەوێت و وەڵامی ئەو پرسیارەش دەدرێتەوە بۆچی سەركردایەتی سیاسی حزبە كوردیەكان و تێكۆشەرە دێرینەكان دژی هەموو پرۆسەیەكی نوێبونەوەو پێشكەوتن و ئەجندای نەوەی نوێن؟.
لەم بازنەیەدا وردبوونەوەو شیكاركردن لە بارودۆخی ناوخۆی یەكێتی و فۆرمی رێكخراوەیی، دەگەینە ئەو راستیەی چیتر ئەم شێوە رێكخستن و فۆرمە ناتوانن ببنە بناغەی نوێبونەوەی یەكێتی و پردی رەتكردنی كێشەو قەیرانەكانی، پێویستە گۆڕانكاریەكی بنەڕەتی و جەوهەری لە كۆی ستراكچەرو كاری رێكخراوەیی یەكێتیدا بەرجەستە بكرێت. شێوازی رێكخستنی ئۆرگانی وەك ئەوەی تا ئەمڕۆ كاری پێدەكرێت یەكێتی بەرەو داڕوخان و زیاتر لاوازبوون دەبات، بە رامان لە واقعی كاری رێكخراوەیی زۆر بە روونی ئەوە دەبینیت، كە تەواوی ئەو ئۆرگانانە توشی ئیفلیجبوون بوونەو هیچ كاریگەریەكیان نەماوە. 


شەڕی سەركردەكان
شەڕ و كێبركێ و ململانێی نێوان سەركردەو تێكۆشەرە دێرینەكان، لە ئەمڕۆدا گەیشتوەتە قۆناغێكی مەترسیدار، لە بناغەدا ئەم جیاوازیانە لەسەر دنیابینی و بۆچون و بیری جیاواز نیە، بەڵكو شەڕی بەرژەوەندی و پلەو پۆستی موغرییە، شەڕە لەسەر دەسەڵات و ئیمتیازات و دەستكەوتی مادی و مەعنەوی. ئەم واقعە ئەو بارەی خوڵقاندوەە تەواوی دامەزراوەو ئۆرگانەكانی یەكێتی توشی قەیران و ئیفلیج بوون ببن. دابەزینی شەڕو كێبڕكێكان بۆ ئاستی كادرانی خوارەوەو موریدو دەست و پێوەندەكان دۆخەكەی زیاتر ئاڵۆز كردووە. تۆڕە كۆمەڵایەتیەكان لە بری ئەوەی ببنە سەكۆیەك بۆ ئاڵوگۆڕی بیرو باوەڕو دنیابینی سیاسی و هزری بوونەتە گۆڕەپانی یەكتر شكاندن و ئابڕوبردنی یەكتر. گەیشتنی جیاوازیەكان بە ئاستێك سروشتی ناكۆكیەكان لە ململانێ و كێبڕكی خزمەتكردن و داهێنان بگۆڕێت بە شەڕو پێكهەڵپژان و یەكتر سڕینەوەو تەسفیەكردنی سیاسی تا بگاتە ئاستی تیرۆرو یەكتر ئەشكەنجەدان،  ئەو بارەی رەخساندووە تەواوی كادران بگەنە ئەو بڕوایەی، كە سەركردایەتی یەكێتی لە ئەمڕۆدا لە ئاست بەرپرسیارێتی مێژوویدا نیەو متمانەی جەماوەرییان لە دەست داوە. لەكاتێكدا گەندەڵی و نادادی ببێتە دیاردەو تەواوی شادەمارەكانی ژیانی خەڵكی گرتبێتەوە، بیروباوەڕی نەتەوەیی و نیشتمانی توشی سوان و ژەنگ كردبێت، جەماوەر بگاتە ئاستێك لە هیواو داخوازی لەپێناو بەرجەستەبوونی گۆڕانكاری و دەرچوون لەم دۆخەی تێیخزراوە تەمەنای داڕوخانی كۆی سیستمەكەو سڕینەوەی تەواوی دەستكەوتە نەتەوەییەكان بكات كارەساتێكە لە مێژویو سیاسی گەلانی ژێر دەستەی هاوشێوەی كورد نمونەو شێوەیان دەگمەنە.


دوورخستنەوە و خەفەكردنی كادرانی ژیرو بوێر
 بەرجەستەبوونی گۆڕان لە تەركیبەی جەماوەری یەكێتی، بەرزبوونەوەی دەنگە ناڕازیەكان لەلایەك، پەرچەكرداری ناتەندروستی دەسەڵات و سەركردایەتی بۆ كپكردن و خەفەكردنی ئەو دەنگانە ئەو بارەی خوڵقاندووە، كە زۆرینەی كادرانی ناڕازی لەم دۆخە ناتەندروستەدا بێدەنگی و بێهەڵوێستی  هەڵبژێرن. لە راستیدا ئەم بێدەنگیە بەواتای قبوڵكردن و رازیبوون نیە بە هەڵوێست و سیاسەتەكانی سەركردایەتی و تێكۆشەرە دێرینەكان. ئەم توێژە لە ئەمڕۆدا زۆرینەی كادران و ئەندامانی یەكێتی پێكدێنن، وردتریش ئەمانە بە زۆری ئەوانەن ، كە ناچنە كۆنگرەوە هەر ئەمەیش وایكردووە بەشێوەیەكی گشتی تێكۆشەرە دێرینەكان هیچ سەنگ و حیسابێكیان بۆ نەكەن، بەڵام ئەوەی ئەم برادەرانە لێی تێناگەن، كاتێك كە ناڕازیبوون دەبێتە یاخیبوون ئەوە ئەمانن سەرمەشقی ناڕازیبوون و یاخیبوونەكە دەگرنە دەست و رووداو و گۆڕانكاریەكان ئاراستە دەكەن. تێكۆشەرە دێرینەكان بەهۆی تێنەگەیشتنیان لە سایكۆلۆجیای جەماوەری ئەو باوەڕەیان لا یەقین بووە، كە توانیویانە ئەم توێژە تەواو بێ ئیرادەو ئیفلیج بكەن، لەواقعدا لەم بۆچونەدا هەڵەن، كاتێكیش بەم هەڵەیە دەزانن هەموو شتێكیان لەدەست دەرچووەو بۆیان كۆنترۆڵ ناكرێت. نەوتنی راستیەكان و هەڵوێستوەرنەگرتن و خۆلادان لە رووبەڕووبوونەوەی نادادی وگەندەڵی و زوڵم و ستەمی ناوخۆیی ئەگەر وەك عەرەبیش دەڵێت: هێشتنەوەی لە دڵی خۆیاندا (اچعف الایمان) بێت، ئەم واقعە زەمینەی ئەوە خۆش دەكات هیچ قەیران و كێشە و گرفتێكی یەكێتی چارەسەر نەبێت و ئەم قوتابخانەیە زۆر بە هێمنی و لە سەرخۆ هەنگاو بەرەو كۆتایی و مەرگی حەتمی بنێت، بەڵام ئەوەی لێرەدا روون نیە نازانرێت ئەو كۆتاییە چۆن دەبێت و چۆن بەسەر تێكۆشەرە دێرینەكان و سەركردەكانی ئەمڕۆدا ئەشكێتەوە. 
كەس ناتوانێت نكۆڵی لەوە بكات، كە لەمڕۆدا یەكێتی بە دۆخێكی زۆر دژوارو مەترسیداردا تێدەپەڕێت، كۆمەڵێك قەیران و گرفتی بونیادی هەیە پێویستە هەڵوەستەی لە سەر بكرێت ئەگەر نا داهاتوو بە دڵی هیچ كەسێك نابێت. 

لەم رەوش و دۆخە دژوارەدا لە بری بیركردنەوەو گەڕان بەدوای چارەسەرێكی گونجاو تەندروستدا كاركردن بۆ دوورخستنەوەی كادرو ئەندامانی بوێرو رووناكبیرو شارەزا بە مەبەستی بێدەنگكردن و خنكاندنی ئەو دەنگە بوێرو راستگۆیانە نابێتە بناغەی چارەسەركردنی كێشەكان، بەڵكو قەیران و كێشەكان بە شێوەیەك قوڵ و فراوان دەكات بە تەقینەوەی تەڕو وشك پێكەوە دەسوتێنێت.
دابەشبوونی یەكێتی بەسەر چەند باڵ و ئاراستەو گروپێكی جیاوازو نەیاری یەكتری، بەتایبەتی كە ئەم جیاكاریە بۆ بەرژەوەندی كەسێتی و بەلارێدابردنی یەكێتی بێت، ئایندەی ئەم رێكخراوەو سەركردەكانیشی زۆر لەوە رەشتر دەبێت، كە بیری لێدەكرێتەوە. لە ئەمڕۆدا ئەوەی شەڕو كێبركێكان زۆر توندو دژوار دەكات لە جەوهەردا زۆری و فراوانی دەسەڵات و مافەكانی سكرتێری گشتیە. ئەم پۆستە ئەوەندە موغریە تێكۆشەرە دێرینەكان و سەركردە لاوەكان بە هیچ شێوەیەك ناتوانن بیر لە نەگەیشتن پێی بكەنەوە. پۆستی سكرتێری گشتی بەوەی لە رابردوودا جێگای تاڵەبانی بووەو بەهۆی كارێزمای ئەو كەسایەتەوە دەسەڵاتێكی رەهای هەبووە، لە ئەمڕۆدا ئەو دەسەڵاتە بكەوێتە دەست هەر كەسێك دوور نیە یەكێتی بەرەو دۆخێك نەبات لە بارودۆخی ئێستا زۆر خراپتر نەبێت. 

سۆشیال میدیا

بیروڕا

ڕۆژنامەی زەمەن
وتاری هەفتانەی گۆڕان زەمەنی ڕەمەزان دایەلۆگی نێوان عێراق و ئەمریكا رووماڵی هەڵبژاردنی سەرۆکایەتی ئەمریکا

کولتوور
      

دەمیرتاش لەم مانگەدا رۆمانێکی نوێی بڵاودەکرێتەوە

 

Zemenpress copyright © / [email protected]

Developed by Avesta Group & Powered by Microsoft Azure