بارزانی: مووچه به چاوساغی خه‌ڵێكی ناوخۆیی به‌كارهێنا بۆ ئه‌وه‌ی هه‌رێم له‌ناوببه‌ن
08:54 - 30/10/2025
زەمەن پرێس:
مه‌سعود بارزانی، سه‌رۆكی
پارتی رایگه‌یاند، مووچه‌ی خه‌ڵكی كوردستان وه‌ك كارتێك له‌لایه‌ن به‌غداوه به
چاوساغی خه‌ڵێكی ناوخۆیی به‌كارهێنا بۆ ئه‌وه‌ی هه‌رێمی كوردستان له‌ناوببه‌ن، ئه‌مه‌ش
لە ئەنفال و کیمیاباران کەمتر نییە.
مه‌سعود بارزانی، سه‌رۆكی
پارتی، ئه‌مڕۆ پێنجشه‌ممه، لەگەڵ ئافره‌تان و دایكانی شه‌هیدی پارتی له پارێزگای
دهۆك كۆبوه‌وه.
سه‌رۆكی پارتی وتی، جگە
لە خودا ئێمە بۆ کەس خۆناچەمێنین، تەنیا بۆ دایكی شەهیدانی خانەوادەی شەهیدان دە
جار خۆمان دەچەمێنین.
بارزانی وتیشی: ئەمڕۆ
ئێمە لە سەدەی بیست و یەکین، ڕەنگە هێشتا وەك پێویست مافی ئافرەتان دەستبەر
نەکرابێت بەڵام ئافرەت خۆشی خەباتی بێوچان بکات و دڵنیابن بە هەمو شێوەیەك لە پشت
ئێوە دەبم."
مه‌سعود بارزانی
ئاماژەی بە "مەترسی پیلانەکانی ئێستا بۆ سەر هەرێمی کوردستان" کردو ڕایگەیاند"پیلانی
ئێستاو دوژمنایەتی ئێستا لەگەڵ میللەتی ئێمە زۆر مەترسیدارتر و گەورەترە لە هی
ڕابردو، ئێستا بەشێوەیەكی بەرنامە بۆدارێژراو دەیانەوێت خەڵكی ئێمە و گەنجی ئێمە
توشی ماددەی هۆشبەر بێت، ئەمە گەورەترین مەترسییە، دەیانەوێت خەڵكی ئێمە توشی بێ
ئومێدی بکەن و هیچ سۆز و ئینتما بۆ نیشتمان نەمێنێت." وتیشی"ئەرکی گەورە
لەسەر شانی ئێوەیە هەر ئافرەتێك منداڵەکەی لە ماڵەکەی خۆیدا تێبگەیەنێت کە چ
پیلانێكی مترسیدار لەسەر ئێمە هەیە، ئەگەر گەنجی ئێمە باوەڕی بە خۆی نەما ئێمە هیچ
دۆزێكمان نامێنێت."
هاوکات سەرۆکی پارتی
ئاماژەی بە "بڕینی موچەی خەڵكی کوردستان" کرد و ڕایگەیاند"موچەی
خەڵکی کوردستان قەزیەیەکی سیاسییە و وەك کارتێك بەکاریان هێنا بۆ ئەوەی هەرێمی
کوردستان لەناوببەن، ئەمەش بە چاوساغی خەڵكێكی ناوخۆیی بو کە ڕێگایان بۆ بەغدا خۆش
کرد و ئەمەش لە ئەنفال و کیمیاباران کەمتر نییە."