قوباد تاڵەبانی: رێژەیەکی گەورەی خەڵک ناڕازین لە شێوازی ئیدارەدان و حکومڕانی
09:50 - 28/10/2025
زەمەن پرێس:
جێگری سەرۆکی حکومەتی
هەرێم رایدەگەیەنێت، رێژەیەکی گەورەی خەڵک ناڕازین لە شێوازی ئیدارەدان و
حکومڕانی، ناڕازین لەبەر پەراوێزخران و نادادپەروەری.
قوباد تاڵەبانی جێگری
سەرۆکی حکومەتی هەرێم دەڵێت: رێژەیەکی گەورەی خەڵک ناڕازین لە شێوازی ئیدارەدان و
حکومڕانی، ناڕازین لەبەر پەراوێزخران و نادادپەروەری. زۆرینەیەکی گەورەی ئەم
خەڵکە ناڕازییە لە رابردوودا بنکەی جەماوەری یەکێتی بوون. هەندێکیان لە خەمساردی و
بێ بەرنامەیی و ناکۆکی ناوخۆیی ناو یەکێتی ناڕازی بوون و هیوابڕاو بوون لە یەکێتی
و بەشدارییان لە هەڵبژاردندا نەدەکرد. هەندێکیشیان هیوایان لەسەر چەند هێزێکی
ئۆپۆزسیۆن هەڵچنی و دەنگیان بەوان دەدا.
وتیشی: لە کۆبوونەوەم
لەگەڵ هەڤاڵانی بازنەکانی هیران و باسرمە روونم کردەوە کە ئەم دابەشبوونەی خەڵکی
ناڕازی تەنها لە بەرژەوەندیی پارتیدا بووە، چونکە پارتی نایەوێت هێزێکی گەورە لە
بەرامبەر خۆیدا ببینێت و ستۆپی پێ بکات و پێی بڵێت رێگە نادەم خەڵک لەبەر
هەڵوێستیان پەراوێز بخرێن.
تاڵەبانی باسی لەوە
کرد، ئەگەر پێشتر لە یەکێتی ناڕازی بوون، ئێستا یەکێتی هێزێکی تۆکمە و خاوەن
بەرنامەیە. هێزێکە سازش لەسەر خواست و داواکاریی خەڵکی ناڕازی ناکات.
دەشڵێت،لە خەڵکی
ناڕازی دەپرسم ئایا باشتر نییە لە جیاتی دابەشبوون یان بەشدارینەکردن لە
هەڵبژاردن، بە دەنگی خۆیان ئەو حیزبە بەهێزتر بکەن کە هێزی پێویستی هەیە لە
کوردستان کۆتایی بە پەراوێزخستن بهێنێت و لە بەغداش کێشەکان چارەسەر بکات؟