269 عیراق

سه‌رۆكایه‌تی كۆمار: له‌تیف ڕه‌شید له‌ كاتی دابه‌زینی له‌ فڕۆكه‌ به‌ر نه‌بوه‌ته‌وه‌

03:20 - 23/05/2023

"زەمەن"
فەرمانگەی ڕاگەیاندنی سەرۆکایەتی کۆمار، ڕه‌تیده‌كاته‌وه‌ له‌تیف ڕه‌شید سه‌رۆك كۆمار له‌ كاتی دابه‌زینی له‌ فڕۆكه‌ به‌ربوبێته‌وه‌ و ده‌ست و ده‌موچاوی شكا بێت.
دوێنێ له‌ هه‌ندێك میدیا هه‌واڵی ئه‌وه‌ بڵاوكرایه‌وه‌ كه‌ له‌تیف ڕه‌شید، له‌ كاتی دابه‌زینی له‌ ناو فڕۆكه‌ له‌ قادرمه‌كان به‌ربوه‌ته‌وه‌ و ده‌ست و ده‌موچاوی شكاوه‌.
فەرمانگەی ڕاگەیاندنی سەرۆکایەتی کۆمار، ئه‌مرۆ له‌ رونكردنه‌وه‌یه‌كدا رایگه‌یاند: ئەو هەواڵە دوورە لە ڕاستییەوە و تەندروستی سەرۆک کۆمار لەبارێکی تەواو ئاساییە وەک هەمیشە لە سەرۆکایەتی کۆماردا ئەرکەکانی خۆی جێبەجێ دەکات.
ئاماژه‌به‌وه‌كراوه‌، بەدرێژایی ڕۆژانی ڕابردوو و تا ئەمڕۆ سێشەممە، 23-5-2023، چەندین چالاکیی ئەنجامداوە کە لەڕێگەی ڕاگەیاندنەکانەوە بڵاوکرانەوە و پەخشکراون، ئەمەش ئەوە پشتڕاست دەکاتەوە کە ئەوەی لەلایەن هەندێک سۆشیال میدیاوە بڵاوکرایەوە ڕاست نییە.
فەرمانگەی ڕاگەیاندنی سەرۆکایەتی کۆمار، ده‌ڵێت شاراوە نییە کە سەرچاوەی ئەو دەنگۆیانە ناسراو و ئامانجەکانیان ئاشکران و ڕەفتارێکی نابەرپرسانەن، وەک چۆن کەسانی نابەرپرس لە ڕێگەیانەوە پشێوی و نادروستی لە کۆمەڵگە و دامەزراوەکانی دەوڵەتدا دروست دەکەن، بۆ ئەمەش ئێمە پابەند دەبین بە گرتنەبەری ڕێوشوێنی یاسایی تا ڕێگرییان لێبکات.
هاوکات داوا لە دەزگاکانی ڕاگەیاندن دەکەن کە وردبین بن و سەرنجیان ڕادەکێشین بۆ پێویستی پشتڕاستکردنەوەی ڕاستی هەواڵەکان پێش بڵاوکردنەوەیان و پابەندبوون بە ستانداردەکانی متمانەپێکردن و پیشەیی بوون لە بڵاوکردنەوەدا.