وتار

پلە بەرزکردنەوەی ئەفسەران پیرۆز ئەکەین، بەڵام!

9/18/2022 9:07:00 PM 170 جار خوێندراوەتەوە
لوقمان چاوڕەش

کێشەو گرفتەکانی هێزی پێشمەرگە تەنها بە پلە بەرزکردنەوەی ئەفسەران چارەسەر نابێت.

بەڵکو دەبێت گیانی بەرگری کردن لەنیشتمان و قبوڵ کردنی لایەنی بەرامبەر شۆڕبکرێتەوە بۆ ناو یەکە سەربازیەکانی وەزارەتی پێشمەرگە بۆ ئەوەی هەستی نامۆ بون و شەڕانگێزی لەبەرامبەر هاوپیشەو هاوسەنگەرەکەیدا  بسڕینەوە..

گرفتی پێشمەرگە ئەو ناکۆکی و ململانێ ناشەریفانەیە کە لەناخی بەرپرسان و فەرماندە باڵاکاندا خۆیان حەشارداوە کە بە ڕاستەوخۆو ناڕاستەوخۆ تۆوی ڕق و بوغزو کینە دەرخواردی  ئەفسەروپلەدارو پێشمەرگەکانی کوردستان ئەدرێت..

گرفتی پێشمەرگە ئەو دابەشکارییە نادروستەیە کە لەنێوان چەند تەکەتولێک و دوو ڕەنگ و دوو حزبدا.

 ئەنجام ئەدرێت و سەدان کەسی دڵسۆزو تێکۆشەرو نیشتمان پەروەری تێدا ئەکرێت بە قۆچی قوربانی وسەدان پیاوی ئازاو دڵسۆزی بێ پشت و پەنای تێدا پەراوێز ئەخرێت.

کێشەی پێشمەرگە بن بڕکردنی دەستی بازرگان و مشەخۆرانی ناو هێزەکانە کە بێ گوێدانە خزمەت و ئەرک و پیرۆزی پیشەکەیان تەنها لەخەم و هەڵپەی بەرژەوەندیەکانی خۆیاندان.

ئەرکی وەزارەت لادانی ئەو کوڕە جاش و کۆنەبەعسیانەیەکە خزێنراونەتە ناو یەکە سەربازیەکانی  هێزی پێشمەرگەی کوردستانەوە و هەریەکەیان چەندین پاسەوان و ئۆتۆمبێلیان بۆ دابین کراوە.

بنەبڕکردنی ئەو هەزاران بن دیوارەیە کە بەشێک لە ژێرخانی ئابوری ئەم وڵاتەی وێران کردووە.

پێشمەرگە خوازیاری ئەوەیە کە بکرێتە هێزێکی پیشەیی و نیشتمانی و لەکاتی دەنگداندا وەک هاوڵاتیەکی خاوەن بڕیار ئازادانە بچێتە سەر سندوقەکانی دەنگدان.

 پێشمەرگە ئەیەوێت لە ناوچەیەکی ئارام و ئازادو سەقامگیردا ببێتە پاسەوان و پارێزەری ئەو دەستکەوتانەی کە لە خزمەت تەواوی کۆمەڵگاکەیدایە بێ جیاوازی لەدەنگ و ڕەنگ و ناوچەکان.

پێشمەرگە نایەوێت لولەی چەکەکەی بکاتە کوردی پارچەکانی ترو لەپێناو ئەجێندا دەرەکیەکاندا دەستی بەخوێنی گیانبازانی پارچەکانی تری کوردستان سوربێت.

پێشمەرگە دەخوازێت ئەوکاتەی بەشەقامەکاندا گوزەر دەکات شکۆو کەرامەتیان پارێزراو بێت و بە شانازیەوە لەناو خاکی پیرۆزی نیشتماندا بە متمانەبەخۆبون و ئارامی بسوڕێتەوە.
پێشمەرگە نان و بژێوی و شوێنی نیشتەجێ بونی پێویستە .

گرفتی پێشمەرگە ڕەواندنەوەی ئەو خەمە گەورەیە کە لەدوای مەرگی خۆیان بیری لێ ئەکەنەوە بۆ ماڵ و مناڵ و خانەوادەکەیان.

سۆشیال میدیا

ڕۆژنامەی زەمەن