خۆپیشاندانەکانی عێراق و گواستنەوەیان بۆ هەرێم
10/4/2019 10:33:00 PM
گمۆ محەمەد
لە دوای ۱۷ شوباتی ۲٠۱۱ەوە چەندین
جار و لە چەندین بۆنەی جیاوازدا خۆپیشاندان هەرێمی کوردستان و تایبەتتر شاری سلێمانی
گرتۆتەوە، بەڵام خۆپیشاندانەکان ئەگەر بێ
ئەنجام نەبوبن، ئەوا تەواوی داخوازیەکانیان بەدی نەهێناوە، لە هەمان کاتیشدا کۆتاییان
پێهاتووە.
لە ئێستاشدا کە لە پایتەختی عێراق و بەشێک لە شارەکانی تر خۆپیشاندانی گەورە بەڕێوەدەچێت،
پرسیارێک دێتە ئارەوە، ئایا خۆپیشاندانەکان هەرێمی کوردستان دەگرێتەوە؟
لە ماوەی چەند ساڵی ڕابردوودا و بەتایبەت لە دوای کۆچی
دوایی نەوشیروان مستەفا و چونی بزوتنەوەی گۆڕان بۆ ناو حکومەت، جۆرێک لە بێدەنگی و
نەمانی ناڕەزایەتی دەستەجەمعی بەدیدەکرێت، کە ڕەنگە هۆکارەکەشی بەپلەی یەکەم بۆ نەمانی
سەرکردەی نەڕەزایەتیەکان نەوشیروان مستەفا بگەڕێتەوە، چونکە بوونی ئەو لەسەر گۆڕەپانی
سیاسی پاڵپشتیەکی گەورە و هێزێکی زۆربوو بۆ چینی هەژاران کە چینی سەرەکی ناو ناڕەزایەتیەکانن.
جگە لەو هۆکارە گۆڕانی سیاسەتی بزوتنەوەی گۆڕانە بە بەراورد
بە ساڵانی پێش ۲٠۱٤، چونکە لەو
کاتەدا بزوتنەوەی گۆڕان و کۆمەڵ و یەکگرتوو هێزی گەورەی پشت ناڕەزیەتیەکان بوون و
بارەگاکانیان شوێنی مانەوەی ئازادیخوازان بوو، هەڵبەت بە هاوکاری کۆمەڵگەی مەدەنی
و میدیای ئەهلی و ڕۆشنبیران، کە هەموو پێکەوە بەرەیەکی بەهێزی دژە دەسەڵاتیان
دروستکردبوو.
لە دوای ساڵی ۲٠۱٤ەوە پاشەکشەیەکی بەرچاو و گۆڕانکاری گەورە هەبوو لە
تێڕوانینی هێزەکان بۆ شەقام و ناڕەزایەتیەکان، بە جۆرێک نەوشیروان مستەفا بەهۆی نەخۆشکەوتنیەوە
دورکەوتەوە وگۆڕان و کۆمەڵ و یەگرتووش بە کێشەی ناوخۆیەکانەوە سەرقاڵبوون کە زۆرێک
پێیان وابوو دەسەڵات هۆکاری جیابونەوە و ناڕەزایەتیەکانە.
نەمانی میدیای ئەهلی و تاپۆکردنی یەکجار کەناڵی ئێن ئاڕ
تى لەسەر جوڵانەوەی نەوەی نوێ، و گۆڕینی
ئاڕاستەی کارکردنی لڤین و ئاوێنە و کڕینەوەی پەیجە گەورەکانی فەیسبوک لە لایەن چەند
کەسێکەوە و بەکارهێنانیان بۆ ململانێی سیاسی، نەمانی بەشێک لە ڕێکخراوەکانی کۆمەڵگەی مەدەنی یاخود کارکردنیان بە ئاڕاستەی
سیاسەتی یەکێتی و پارتی بەهۆی قەیرانی داراییەوە، هەموو ئەمانە پێکەوە پەرتەوازەییەکی
گەورەیان دروستکردوو کۆتاییان بە خۆپیشاندان و ناڕەزایەتیە گەورەکان هێنا.
ئایا ئامادەین بۆ دەرهێنانی ناڕەزایەتیەکان لە سۆشیال میدیا و پێچەوانەکردنەوەیان بۆ شەقامەکانی سلێمانی و هەولێر و شارەکانی تر؟
لەبەر ئەو هۆکارانەی سەرەوە کە باسمان کرد، ڕەنگە خۆپیشاندان
و ناڕەزایەتی کورتخایەن بێت و ئامانج و مەبەستی خۆی نەپێکێت تا کاتێک کە:
1. سەرکردەیەکی کاریزمی هاوشێوەی نەوشیروان مستەفا لە
پشتی خۆپیشاندانەکان بێت، کە هیچ بەرژەوەندیەک نەبێت بۆ پاشەکشەکردن پێی.
2. خۆڕێکخستنەوەی کۆمەڵگەی مەدەنی و بوونی میدیایەکی بەهێزی
ئەهلی کە بەکارنەهێنرێت لە پێناو هێزێک یاخود بەرژەوەندی هێزی سیاسی.
3. هێزێکی خۆڕسکانەی جەماوەری هاوشێوەی بزوتنەوەی گۆڕانی
سەردەمی نەوشیروان مستەفا، کەهیچ کەس و لایەنێک نەتوانێت ئاڕاستەی بکات و سەرکردەکانی
مەلەفدار نەبن، یاخود هیچیان نەیابێت بەدەستەوە، تاوەکوو بێ دودڵی هاوشێوەی سەدر ڕابەرایەتی
ناڕەزایەتیەکان بکات..
4. شکستی کابینەی نۆیەمی حکومەت و کۆتایی هاتنی ئەو وادەیەی
کە بزوتنەوەی گۆڕان دایناوە بۆ چاکسازی و گەڕانەوە بۆ کارکردنی هاوشێوەی پێش ۲٠۱٤.
لە کۆتاییدا گرنگە بوترێت، لە ئەگەری ڕونەدانی خاڵی دووەم
و چوارەمدا خاڵی سێیەم خۆی دەسەپێنێت و دروستبوونی سەرکردەش پێویستی بە کات و قۆناغێکی
زەمەنی دیکە هەیە.