تۆم باراک: رێککەوتنی ئەحمەد شەرع و مەزڵووم عەبدی وەرچەرخانێکی مێژووییە
08:21 - 18/01/2026
کۆبوونەوەی
دوو سەرکردە بۆ کۆتاییهێنان بە ستەمکاری
تۆم باراک لە پەیامێکدا وەسفی ئەحمەد شەرع، سەرۆککۆماری سووریا
و مەزڵووم عەبدی، فەرماندەی گشتیی هەسەدەی کرد و وتی "دوو سەرکردەی گەورە"
کە دیدگەیەکی هاوبەشیان بۆ رزگارکردنی وڵات و گەلەکەیان لە ستەمکاری هەبووە. باراک
گوتی: "ئەم رێککەوتن و ئاگربەستە نوێنەرایەتیی خاڵێکی وەرچەرخانی سەرەکی دەکەن،
کە تێیدا نەیارەکانی پێشوو لەبری دابەشبوون، هاوبەشییان هەڵبژارد."
رۆژی یەکشەممە 18-01-2025 نێردەی
ئەمریکا ئاماژەی بەوە کرد کە ئەحمەد شەرع دووپاتی کردووەتەوە، کورد بەشێکی دانەبڕاوی
سووریایە. باراک جەختی کردەوە، واشنتن بە پەرۆشەوە چاوەڕوانی تێکەڵبوونی بێ کێشەی هەسەدەیە
لە ناو دەوڵەتدا و بە "هاوبەشی مێژوویی ئەمریکا لە جەنگی دژی داعش" وەسفی
کردن. باراک ئاماژەی بەوەش کرد، ئێستا دەوڵەتی سووریا بووەتە "نوێترین ئەندامی
هاوپەیمانیی نێودەوڵەتی" و پێکەوە لە جەنگی دژی تیرۆر بەردەوام دەبن.
بە گوتەی
تۆم باراک، هەرچەندە کارە سەختەکان بۆ کۆتاییهێنان بە وردەکارییەکانی رێککەوتنی گشتگیری
تێکەڵبوون لە ئێستاوە دەستپێدەکەن، بەڵام ویلایەتە یەکگرتووەکان لە هەموو قۆناخەکاندا
بە تەواوی پاڵپشتی ئەم پڕۆسەیە دەکات. باراک روونی کردەوە، ئەمە یارمەتیدەر دەبێت بۆ
پاراستنی بەرژەوەندییەکانی ئاسایشی نیشتمانیی ئەمریکا لەرێگەی تێکشکاندنی پاشماوەکانی
داعش و بەرەو پێشبردنی "پلانی بوێرانەی سەرۆک ترەمپ بۆ ئاشتیی رۆژهەڵاتی نێوەڕاست".
لە کۆتایی
پەیامەکەیدا، نێردەی ئەمریکا رایگەیاند، ئەم هەوڵە بەردەوامانە پڕۆسەی هاتنە ناوەوەی
تەواوەتیی کورد بۆ ناو سووریایەکی یەکگرتوو و گشتگیر ئاسان دەکات، کە تێیدا بەرژەوەندی
و مافەکانی هەموو هاووڵاتییان پارێزراو بێت. باراک جەختی کردەوە، ئامانجی کۆتایی یەکخستنی
ئاراستە جیاوازەکانە بۆ ناو یەک رێڕەوی گشتگیر لەپێناو ئاشتەوایی و یەکڕیزیی نیشتمانی.