٢٥٠ هەزار خانەنشینی هەرێم گرفتیان بۆ دروستدەبێت
03:23 - 06/08/2024
زەمەن – عێراقی
ئەندامێکی لیژنەی دارایی پەرلەمانی عێراق ئاشکرایکرد، مووچەی ٢٥٠ ھەزار خانەنشینی ھەرێم بەھۆی نەبوونی سندوقی خانەنشینی بۆ ھاوتاکردنی مووچەکانیان ڕوبەڕوی ئاستەنگ بووەتەوە
ئەمڕۆ سێشەممە، ٦ی ئابی ٢٠٢٤، موعین کازمی ئەندامی لیژنەی دارایی ئەنجومەنی نوێنەرانی عێراق بە رۆژنامەی سەباحی ڕایگەیاند:تائێستا نەگەیشتوونەتە ئەنجام لە دۆسێی ھاوتاکردنی مووچەی خانەنشینانی ھەرێم لەگەڵ عێراق، چونکە دەبێت بڕی لێبڕینەکان بدرێتە ئەو دەستەیەی کە لە ڕێگەی سندوقی خانەنشینەکانەوە شایستەیی دارایی خانەنشینی دابیندەکات.
ئاماژەی بەوەشداوە، بەشێوەیەکی گشتی ئەو بڕە پارەیەی لە مووچەی فەرمانبەران دەبڕدێرێت بۆ خانەنشینی، دەچێتە سندوقی خانەنشینیەوە، بەڵام لە ھەرێمی کوردستان بەو شێوەیە نیە، ھەربۆیە بەم شێوەیەی ئێستا ناتوانرێت موچەی خانەنشینانی ھەرێم و ھاوتابکرێت.
ئەندامەکەی لیژنەی دارایی ئەنجومەنی نوێنەران جەختیشیکردووەتەوە لەوەەی دەبێـت چارەسەر ھەمیشەیی بۆ گرەنتیکردنی مافی خانەنشینانی ھەرێم بدۆزرێتەوە بەبێ ئەوەی بارگرانی دارایی دروست بکات.