بیمەى تەندروستى بۆ هاووڵاتیان دەکرێت و تێچووى نەخۆشخانەکان بەڕێژەى 99% کەمدەکرێتەوە

07:41 - 03/08/2024

زەمەن - عێراقى

 

وەزارەتى تەندروستى عێراق رایگەیاند، تائێستا ناوى 380 هەزار کەسیان لە پارێزگاى بەغدا تۆمارکردووە بۆئەوەى بیمەى تەندروستییان بۆبکرێت.

 

لە راگەیەندراوەکەى وەزارەتى تەندروستى عێراقدا هاتووە، ئەم هەنگاوە لەدرێژەى ئەو بەرنامەیە دێت کە محەمەد شیاع سودانى سەرۆکوەزیرانى عێراق لە مەلەفى چاکسازییەکان لە کەرتى تەندروستى رایگەیاندووە، ناو تۆمارکردنەکەش بە دوو قۆناغ دەبێت و ناوى هەموو ئەو کەسانە تۆماردەکرێت کە بیمەکە دەیانگرێتەوە.

 

وەزارەتى تەندروستى دەڵێت، ئەو 380 هەزار کەسەى ناویان بۆ بیمەى تەندروستى تۆمارکراوە، لەڕێگەى 28 پەنجەرەوە مامەڵەکانیان بۆ تەواودەکرێـت و دەفتەرى بیمەى تەندروستییەکانیان رادەست دەکرێت.

 

بەگوێرەى ئەو راگەیەندراوەى وەزارەتى تەندروستى عێراق بڵاویکردووەتەوە، هەموو ئەو کەسانەى بیمەى تەندروستییان بۆدەکرێت، لەکاتى سەردانیکردنى نەخشۆشخانە حکومییەکان 99% داشکاندنیان بۆدەکرێت و تەنیا 1%ى پارەى تێچووى گرفتە تەندروستییەکەیان دەدەن.