سەرۆکی شارەوانیی سلێمانی: کەسانێک وەك مافیا پارە و سەرانە لە خەڵک وەردەگرن

12:26 - 16/08/2022 481 جار خوێندراوەتەوە

زەمەن – سلێمانی

لەیلا عومەر، سەرۆکی شارەوانیی سلێمانی رایگەیاند، "کۆمەڵێک خەڵک پەیدابوون بوونەتە مافیا بۆ زەوی و خانوو و کۆشکەکانی شارەوانی سلێمانی و دەستیان بەسەر ئەو مووڵکانەدا گرتووە..

 

 

پێشنیوەرۆی ئەمڕۆ سێشەممە 16ی 8ی 2022،  لە کۆنفڕانسێکی رۆژنامەڤانیدا سەرۆكی شارەوانی وتی: دەیبینین بە چاوی خۆمان لە دەرەوە کۆمەڵێک خەڵکی دەموچاو دووبارە پارە و سەرانە لە خەڵک وەردەگرن.. ئەوەی کاریگەریی کردە سەر ئێمە کۆمەڵێک لەو کەسانە بەناوی حیزب و بەرپرسەکانەوە قسەدەکەن بۆیە ئێمە داوای پاڵپشتی و پشتگیریمان کرد بۆ بەدواداچوون و وەرگرتنی رێکاریی یاسایی."

 

 

بەیانی ئەمڕۆ هێزێکی چەکداری كۆماندۆ چوونە ناوبینای شارەوانیی سلێمانی، لە دواتریشدا فەرماندەیی ھێزەکانی کۆماندۆی کوردستان روونکردنەوەیەکی  بڵاوکردەوە و وتی، بە فەرمانی "سەرۆک بافڵ" جووڵەیان بە هێزەکەیان کردووە. دوای ئەوەی لەماوەی ڕابردوو لەلایەن چەند بەرپرسێکی نابەرپرسی حزبی و حکومی لە ژێر فشاری هەڕەشە هەستان بە ئیفرازکردنی چەندین پارچە زەوی و داگیرکردنی بۆ مەرامی تایبەتی خۆیان و ڕێگریکردن لەئەنجامدانی چەند پڕۆژەیەکی ستراتیجی کە بۆ خزمەتی شارەکە ئەنجام ئەدران.