ڕۆژهەلاتی کوردستان و دواین بژاردە!
6/24/2025 3:26:00 PM
هونەر حاجی جاسم
لای هەموومان مەعلومە لە نیو سەدەی ڕابردوو، خەباتی چەکداری کوردی، هێزەکانی ڕۆژهەلاتی کوردستان نەیتوانیووە مافە سیاسیەکانی کورد لە ئێران دەستبەر بکات. پێم وایە دەبێت تاکو ئێرە هێزە سیاسیەکانی کوردستانی ئێران لەوە تێگیشتبن! کە نەیان توانیوە. بە مانایێکی تر، جۆرێک لە شکەستی سیاسیان هێناوە. هەرچەندە لە چوار سالی ڕابردوو دەرفەتیان هەبوو، فشاری سیاسی و دیبلۆماسی و سەربازی بکەن بۆ چەسپاندن و بەدەستهێنانی کۆمەلێک مافی سیاسی. بەلام لە دەرفەتەکان سوودیان وەرنەگرت. ئێستا دوای هێرشە ئاسمانیەکانی ئەمریکا و ئیسرائیڵ بۆ سەر ئێران جارێکی تر دەرفەت بۆ کوردی ڕۆژهەلات هاتۆتە پێشەوە! بەلام ئەمجارە بە تەواوی جیاوازە!
دوای کۆتایی جەنگی 12 ڕۆژە. دەسەلاتی سیاسی لە ئێران، بە جۆرێک لە جۆرەکان دەگۆڕێت، چونکە ئێران مەحکومە بە کۆمەلێک گۆرانکاری سیاسی، ئەمنی، کلتوری، ئاینی، ئابووری و پەیوەندی سیاسی لە ئاستی هەرێمی و نێودەولەتی. ئەمەش هەم دەرفەتە بۆ کورد، هەمیش ئامادەکاری و نەخشە ڕێگایێکی ستراتیژی دەوێت بۆ ئەم بژاردە سیاسیە، چونکە چۆن سیستەمی سیاسی ئێران 46 بەردەوامی بەخۆی ئەدات. ئەبدێتی سیستەمی سیاسی درێژکراوەی ئێرانی داهاتووش بەردەوام دەکات. بۆیە کورد بزانێت بژاردەکەی چیە؟!
لە ئێستادا، تاکە بژاردەی کورد لەڕۆژهەلاتی کوردستان کە جەختی لەسەر بکاتەوە بەدەستهێنانی مافە سیاسیەکانییەتی لە چوارچێوەی ئێران، لە قۆناغی کورت مەوداو و قۆناغی ناوەند. دەبێت حیزبەکانی ڕۆژهەلات واز لەوە بێنن و خەون بەوە بێنن هێزێکی نێودەولەتی یانیش هەرێمی بێت، ئێران وەکو سیستەم و دەولەت بۆیان بروخێنێت. پێویستە لەسەریان بەهەرجۆرێک بێت ڕێکەوتن یانیش دانوستاندن لەگەل ئێران بکەن بۆ گرێنتی مافە سیاسیەکانی کورد لە چوارچێوەی ئێران. لە ئێستادا هیچ بژاردەیێکی تری سیاسی لەبەر دەستی کورد نیە جگە ڕێکەوتن و دانوستاندن لەگەل ئێرانی دوای جەنگی 12 ڕۆژی!