قوباد تاڵەبانی: رێگە بە یاساشکێنی و دروستبوونی گرووپی چەکدار لە دەرەوەی یاسا نادرێت
07:17 - 02/09/2025
زەمەن پرێس:
جێگری سەرۆک وەزیرانى هەرێم رایدەگەیەنێت، وتیشی: بە هەمان شێوەی
وڵاتانی دیموکراسیش رێگە بە یاساشکێنی و دروستبوونی گرووپی چەکدار لە دەرەوەی یاسا
نادرێت.
قوباد تاڵەبانی، جێگری سەرۆک وەزیرانی هەرێم رایگەیاند، لە
کۆبوونەوەکانم لەگەڵ پاتریک دۆرێل، باڵیۆزی فەڕەنسا و ئەندرۆ بیزلی، کونسوڵی گشتیی
بەریتانیا لە هەرێم جارێکی دیکە جەختمان کردەوە سلێمانی وەک هەمیشە بە شاری ئازادیی
کاری سیاسی و ئازادیی رادەربڕین دەمێنێتەوە.
وتیشی: بە هەمان شێوەی وڵاتانی دیموکراسیش رێگە بە یاساشکێنی و
دروستبوونی گرووپی چەکدار لە دەرەوەی یاسا نادرێت.
تاڵەبانی جەختیکردەوە، سوورن لەسەر چەسپاندنی سەروەریی یاسا و
جێبەجێکردنی بڕیارەکانی دادگا و لە هەمانکاتیشدا مافی یاسایی هەموو تۆمەتبارێک
پارێزراو دەبێت.
لەلایەکی دیکەوە قوباد تاڵەبانی پێشوازی لە باڵیۆز عهلی رەزا گوينهى،
بهڕێوهبهرى گشتيى كاروبارى عێراق و ئێران له وهزارهتى دهرهوهى توركيا کرد
و پێکەوە لەبارەی پرۆسەی ئاشتی و چەند پرسێکی دیکە گفتوگۆیان کرد.
لە کۆبوونەوەکەدا جێگری سەرۆک وەزیران جەختیکردەوە لەسەر پشتگیری
هەرێمی کوردستان لە پرۆسەی ئاشتی لە تورکیا و رایگەیاند، سەرکەوتنی ئەم پرۆسەیە لە
بەرژەوەندیی هەموو ناوچەکەیدایە و هەڵگری ئەو پەیامەیە بۆ هەموو ناوچەکە کە دواجار
چارەسەری راستەقینە و ریشەیی کێشەکان هەر لە رێگەی ئاشتی و لێکتێگەیشتنەوە بەدی
دێت نەک لە رێی شەڕ و ئاڵۆزی و ناسەقامگیرییەوە.
قوباد تاڵەبانی روونیکردەوە کە گفتوگۆی بەردەوام هەیە بۆ ئەوەی بەپێی
دەستور کێشە و ناکۆکییەکان چارەسەر بکرێن، ئێستا زیاتر لە هەر کاتێکی دیکە
لێکتێگەیشتن بۆ چارەسەرکردنی کێشەکان بە تایبەتیش کێشەی مووچە و هەناردەکردنەوەی
نەوتی هەرێم هەیە.