كۆمسیۆنی باڵا ڕەتیدەكاتەوە كە وادەی هەڵبژاردنی پێشوەختە دیاریكرابێت
02:45 - 07/08/2022
زه‌مه‌ن - عێراقی
كۆمسیۆنی باڵای سەربەخۆی هەڵبژاردنەكانی عێراق ئەمڕۆ یەكشەممە، دیاریكردنی
وادەی هەڵبژاردنی پێشوەختی ڕەتكردەوە.
جومانا غەلای وتەبێژی كۆمیسیۆنی باڵا بەئاژانسی هەواڵی عێراقی ڕاگەیاند: كۆمسیۆن
دەزگایەكی پیشەیی بێلایەنە كە بڕیار لەسەر هەڵبژاردن و ڕیفراندۆم و چەند بابەتێكی
دیكەی پەیوەندیدار بە كاری هەڵبژاردن جێبەجێ دەكات.
ئاشكراشیكرد: ئەنجومەنی كۆمسیاران دەسەڵاتی باڵای كۆمسیۆنی هەڵبژاردنەكانە
و بەرپرسیارە لە دیاریكردنی ئەو بەروارە یان كاتانەی كە پێویستە بۆ هەر پرۆسەیەكی
هەڵبژاردن بە ڕاوێژ لەگەڵ حكومەتدا لەسەر بنەمای یاسای هەڵبژاردن لە هێزدا ئەنجام
بدرێت.
ئاماژەی بۆ ئەوەشكرد: ئەنجومەنی كۆمسیاران هیچ بڕیارێك و ڕاگەیەندراوێكی لەو
بارەیەوە دەرنەكردووە.
لە 25/7/2022، چوارچێوەی هەماهەنگی رایگەیاند، کە محەمەد شیاع سوودانی کاندید
دەکەن بۆ پۆستی سەرۆک وەزیرانی داهاتووی عێراق، ئەمەش لەلایەن رەوتی سەدر رەتکرایەوە
و خۆپیشاندانی سەدرییەکان دەستیپێکرد و رۆژی 30/7/2022 خۆپیشاندەران چوونە ناوچەی
سەوز و چەند رۆژێک لە باڵەخانەی ئەنجومەنی نوێنەران مانەوە.
له‌نوێترین لێدوانیشیدا رێبه‌ری ره‌وتی سه‌در داوای هه‌ڵبژاردنی پێشوه‌خت
بۆ ئه‌نجومه‌نی نوێنه‌ران ده‌كات.