وەزارەتی سامانە سروشتییەکان گەرمیان بێبەش دەکات لە نەوتی سپی ماڵان
08:47 - 28/12/2021
زەمەن_گەرمیان
سەرۆكی لیژنەی پیشەسازی و وزە لە ئەنجومەنی پارێزگای سلێمانی ئاشكرایدەكات، وەزارەتی سامانە سروشتیەکان گەرمیان بێ بەش دەکات لە نەوتی سپی ماڵان .
كەریم عەلی سەرۆكی لیژنەی پیشەسازی و وزە لە ئەنجومەنی پارێزگای سلێمانی بە "زەمەن"ی راگەیاند، بەپێی بەدواداچونمان دابەشنەکردنی نەوتی سپی ماڵان لە سنووری گەرمیان بەمەبەستە و دەویسترێت ئەمساڵ لە سنووری گەرمیان نەوت دابەش نەکرێت ئەوەیش بە بیانوی ئەوەی سنووری گەرمیان پلەکانی گەرمی زۆر دانابەزێت.
وتیشی، ئەم کارەش غەدرێکی ڕوون و ئاشکرایە لە دانیشتوانی سنووری گەرمیان دەکرێت ئەمەش لە کاتێکدایە لە هەموو ناوچەکانی دیکەی هەرێمی کوردستان ڕێژەیەک نەوتی سپی دابەش کراوە و ڕۆژانەش نزیکەی ٥٠٠٠٠ هەزار بەرمیل نەوتی خاو لە سنوورەکە دەردەهێنرێت و بە نادیاری دەبرێت و هاوڵاتیانیشی بێ بەش دەکرێن لە پێدانی نەوتی سپی.
كەریم عەلی باسی لەوشكرد، لە ساڵی ٢٠١٤ بەدواوە حکومەتی هەرێم نەوتی دابەش نەکردوەو ساڵانە حکومەتی عێراق ڕێژەیەک نەوتی سپی ناردوە بۆ هاوڵاتیانی هەرێمی کوردستان ، ئەمساڵ حکومەتی هەرێم و وەزارەتی سامانە سروشتیەکان بڕیاریان دابوو خۆیان نەوتی سپی دابەش بکەن و هەموو ماڵێک نەوتی سپی پێبدرێت، بەڵام تاکو ئێستا نەیان توانیوە لە بەڵێنەکەیان لە هیچ ناوچەیەک جێبەجێ بکەن و سنووری گەرمیانیشیان بێ بەش کردوە لە نەوتی سپی.
جەختیشی كردەوە، بۆ ئەو بابەتە لە بەدواداچووندان و هەموو هەوڵێک دەدەن بەشی هاوڵاتیانی سنووری گەرمیان لەنەوتی سپی بنێردرێت بەو ڕێژەیەی لە سنوورەکانی دیکە دابەشکراوە .