میری بەهەشت

09:04 - 27/07/2021

ناڵە حەسەن/کلتوری زەمەن

شازادەیەکی شەوگەڕ
چاوێکی پڕ لە ئاگر و
چاوەکەی تر پڕ لە دوکەڵ
گیرفانێکی پڕ لە بارووت و
گیرفانەکەیتر پڕ لە حەشیش
شازادە
جارجارە لەنێو ئەشکەوتێکی تاریک
لەگەڵ ئەسحابەکان دەچیتە خەڵوەت و
دواتر خەوێکی قووڵ قووڵ
زۆرجارانیش
بەدەم خەوەوە ڕێدەکات
بەدەم خەوەوە قسان دەکات
بەدەم خەوەوەش دەفڕیت
شازادەیەکی شێواو / شێواوێکی شەڕانگێز
هەر بەدەم خەوەوە
شیرە دووسەرەکەی لە قەڵغان دەردەهێنێ
دەڕواو دەڕواو دەڕوا
دەڕوا و ئاوڕ ناداتەوە
هەرچییەکیش بێتە بەردەمی
ڕووناکی
با
باڵندە
مێروولە
تەنانەت خاڵخاڵۆکەکانیش / خەڵتانی خوێنیان دەکا
هەندێکجاریش / لەسەر بەرماڵێکی ڕەشی ئاوریشمین
بەرماڵێکی ڕەش ڕەش
بەدەم دوعا و نزاوە
کڕنۆش بۆ دێو و داینەسۆرەکان دەبات
شازادە
خۆیی و جانتایەک پڕ لە وەهم
خۆیی و بوخچەیەک پڕ لە خەون
خۆیی و گۆزەیەک پڕ لە شەڕاب
لەسەر پشتی ئەسپی گەردەلوول
بەسەر پردی سیرات / پردێکی سەرابی
سەما دەکات
لەنێو بەهەشت
لەنێو تەنیایی خۆیدا
دەرگای ژوورەکان دادەخات
پەنجەرەکانیش
بە پەردەیەکی شەڕابی ئەستوور دادەپۆشێ
فەرمان بە حۆرییەکانیش دەدات
تیر بگرنە / شەپۆلەکان و خۆرەتاو و جەستەی سەوزایی
بڕیار دەدات
جگە لە گوڵە حاجیلە / هەموو گوڵەکانیتر دەبێ بمرن
جگە لە پایز / هەموو وەرزەکانیتر دەبێ بمرن
جگە لە مانگ / هەموو ئەستێرەکان دەبێ بمرن
کاتژمێری دەستی شازادە زەمەن ناخوێنێتەوە و
شەو و ڕۆژ لەیەک جیا ناکاتەوە
چاوەکانی
جگە لە پەیکەرە بەردینەکەی خۆی
هیچ زیندەوەرێک و بوونەوەرێکیتر نابینن
هەر خۆیی و هەر خۆیی و هەرخۆی
دواجار بڕیار دەدات
هەرخۆیشی ببێتە میری بەهەشت !