907 کوردستان

منەتی چی بەسەر گۆڕاندا دەكەن؟

10:21 - 27/04/2021

زەمەن_دیسكی شیكاری

هەرچەندە چاكسازی چەقی ئامانج و رێككەوتنی بزوتنەوەی گۆڕانە بۆ پێكهێنانی كابینەی نۆیەم، بەڵام نزیكەی دوو ساڵە ئەوەی لە واقیعدا بەدیهاتووە بارتەقای رێککەوتن و بەڵێنەكان نیە.

حاڵی حازر لەلای دەسەڵاتداران پرسی چاكسازی و خەمخواردن لە ژیانی خەڵك، هەنگاوی گەورەی بۆ نەهاوێژراوە و زیاتر لە تەلەفزیۆن و لێدوانی بەر كامێراكاندا رەنگیداتەوە، لە واقیعدا دزی و گەندەڵی، بەهەردەردان و دەستتێوەردانی حزبی، ناشەفافیەتی مەلەفی نەوت، رۆتینات و شكست، زۆربەی سێكتەرەكانی دیكەی تەنیوە.

گۆڕان بەڵێنی بە دەنگدەر و جەماوەرەكەی داوە كە بۆ چاكسازی خەبات بكات، بەڵام كە دەبینرێت رەنگدانەوەی بەسەر كاروباری حكومەتەوە نەبووە و رەنگینەداوەتەوە بەبێ بێدەنگی دانانیشێت و نوێنەرەكانی لە پەرلەمان بەردەوام دەبن لە هەڵدانەوەی دۆسیەكانی گەندەڵی.

هەنگاوەكانی یەکێتی و پارتی لە حكومەت هێندە بە ئاڕاستەی كاتكوشتن و موماتەلەیە بە مەسەلەی چاكسازییەوە نیو هێندە بۆ بەرجەستەكردنی نیە لە واقیعدا.

لە ناو خودی حكومەتیشدا، تیمی وزاری گۆڕان بە جۆرێك لە جۆرەكان تەنیایە و هەر ئەو لە خەمی چاكسازییدایە، ئەگەر چاكسازییەكانی وەزارەتی دارایش نەبوایە ئەم حكومەت بە ئەستەم دەیتوانی بە لێبڕینیشەوە مووچە بدات.

هاوتەریبی تیمە وزارییەكەش فراكسیۆنەكان هەمیشە پێداگر بوون لە ئەنجامدانی چاكسازی و كۆتایهێنان بە گەندەڵی و ناشەفافیەتی.

گوڵستان سەعید سەرۆکى فراکسیۆنى گۆڕان له‌ په‌رله‌مانی كوردستان، له‌ دانیشتنی پەرلەماندا رایگەیاند، "هیچ رێککەوتنێکى سیاسی بەربەست نییە لەبەردەم ئەوەى پەرلەمانتارانى گۆڕان رەخنە لە حکومەت بگرن".

وتیشی: چاوپۆشى ناکەین لە لێبڕینى موچە و گەندەڵى و قاچاخچێتى، ئێمە دەزانین حکومەت ئوتێلى پێنج ئەستیرە نییە، بەڵام نەهاتوین دابنیشین بۆ ئەوەى قڕ و قەپ بکەین و هیچ نەڵێین".

لەگەڵ ئەوەی هەردوولایەنەکەی دەسەڵات ئامادەنەبوون لەسەر ئاستە حكومیەكە پابەندی تەواوی رێككەوتنەكان نەبوون و هەنگاوی گەورەی چاكسازیان نەناوە، هاوكاتی ئەوەش لەسەر ئاستە سیاسی و ئیعلامییەكە بەردەوامن لە پڕوپاگەندە و جەنگی دەرونی لەگەڵ بزوتنەوەی گۆڕان، دوور لە پرەنسیپی هاوپەیمانی و دۆستایەتی.

لەم نێوەندەدا كۆمەڵێك وردە سیاسی بێ سەنگ و رەدووكەوتی بەرژەوەندی تایبەت، كە لەناو ویژدانی گۆڕانخوازاندا بە خەڵكانی بێ پرەنسیپ و بێ وەفا ناسراون، بە موناسەبەو بێ موناسەبە خەریكی فریودان و چەواشەكارین.

بەهۆی دەرگای ئاواڵایی گۆڕان بۆ سەرجەم چین و توێژەكان و قەناعەتبوون بە هێنانە پێشەوەی خەڵكی هەژار و بێ پشت و پەنا بۆ ناو كایەتی سیاسی و حكومڕانی دەرفەتی ئەوەیان بۆ هاتە پێشەوە، زیاتر لە سەنگ و قورسایی خۆیان دەستیان بە پۆست و پایە بگات و دواتریش سەنگەر و ریزی چاكسازیی و گۆڕانخوازانیان بەجێهێشت و چوونە ناو زەلكاوی گەندەڵی و ئێستا بوونەتە داردەستی دەربار و رۆژانە پەلاماری قولەپێی سەركردە و رەمزەكانی گۆڕان و پرۆژەكەی دەدەن.

دەسەڵات بۆ ئیحراجكردنی گۆڕان، ئەو دەموچاوانە زوو نیشانی خەڵك دەدات و لەو رێگەیەوە دەیەوێت لە پێگە و هەڵوێستی گۆڕان بدات كە بەردەوام لەبەرژەوەندی بەرەی خەڵك و جەماوەر بووە.