١٠ راسپاردە بۆ باشترکردنى هەلومەرجى ژنانى راگەیاندنکار
08:43 - 08/03/2019
زەمەن پرێس:
له شاری سلێمانى مێزگردێكی ره‌خنه‌یی له‌سه‌ر رۆڵ و روماڵی پرسه‌كانی مێینه له راگه‌یاندندا بەڕێوەچوو و ده‌ره‌نجامی گفتوگۆكانیش، به 10 راسپارده كۆتاییهات.
هەریەکە لە ماڵپەری (كەركوك ناو) و رێكخراوی چاودێریی میدیای كوردی، لەیەكەمین پرۆژەی هاوبەشی نێوانیاندا مێزگردێكی ره‌خنه‌ییان له‌سه‌ر رۆڵ و روماڵی پرسه‌كانی مێینه له راگه‌یاندندا رێكخست و تیادا باس لە چەندین تەوەرى سەرەکى تایبەت بە میدیاکارو رۆژنامەنوسى مێینە لە هەرێمى کوردستان کراوە.
هەروەها تیایدا گفتوگۆ کرا لەسەر بابەتەكانی رووماڵی پرسەكانی مێینە لە راگەیاندندا، جیاكاریی جێندەریی لەدەزگاكانی راگەیاندندا، كاریگەریی بابەتە رۆژنامەوانییەكان لەسەر رەگەزی مێیینە. پاشان خاڵی هاوبەشی نێوان گروپەكان دەستنیشانكران.
دەقى راسپاردەکان
1. بەشێكی زۆری دەزگاكانی راگەیاندن هیچ بەڵگەنامەیەكی نووسراویان لەبارەی سیاسەتی جێندەرییەوە نییەو هاوسەنگیی جێندەریی نەبووەتە بەشێك لە سیاسەت و ستراتیژی كاركردنی پیشەییان.
2. راگەیاندنكارانی مێیینە لەیەك كاتدا شەڕی خێزان، كۆمەڵگە و هاوپیشەكانیان لەنێو دەزگاكانی راگەیاندندا دەكەن، ئەوەش وایكردووە باجی هەڵبژاردنی پیشەی راگەیاندن بدەن و زۆرجار بەچاوێكی جیاواز سەیریان بكرێت.
3. ژمارەیەك لە راگەیاندنكارانی مێیینە رووبەڕووی گێچەڵپێكردن و دەستدرێژیی سێكسیی دەبنەوە لەلایەن بڕیاربەدەست و بەپرسانی دەزگاكانیان و ئەو سەرچاوانەی كە زانیارییان لێوەردەگرن.
4. راگەیاندنەكان زۆرتر مۆركێكی نێرانەیان هەیەو نێرسالاریی بەسەر تەواوی جومگەكانیاندا زاڵە.
5. دەزگاكانی راگەیاندن سیاسەتێكی تەحریریی روون و پەسەندكراویان نییە تا لەپرسەكانی تایبەت بە رەگەزی مێیینەدا كاری لەسەر بكەن.
6. لە بەرهەمە رۆژنامەوانییەكاندا، رەگەزی مێینە بەلاواز نیشان دەدرێت و لەرێی توندوتیژی زارەكییەوە وشە و دەستەواژەی نەگونجاویان لەبەرامبەردا بەكاردەهێنرێت كە ئەوەش وایكردووە كاریگەری نەرێنیی لەسەر راگەیەندنكارانی مێینە بەجێبهێڵێت.
7. بەشێوەیەكی رووكەش رووماڵی پرسەكانی تایبەت بە رەگەزی مێینە دەكرێت. نەبونی رووماڵ و بەد‌واداچونی ورد و بابەتیی لەسەر پرسەكانی خۆكوشتن كە ئەوەش كاریگەریی لەسەر زیادبوون و بەئاسایی وەرگرتنی توندوتیژیی هەیە بەتایبەتی لەبەرامبەر راگەیاندندكارانی مێیینەدا.
8. ژینگەی كاركردنی پیشەی رۆژنامەوانیی بۆ راگەیاندنكاری مێیینە گونجاو و لەبارنییە.
9. دەزگاكانی راگەیاندن كەمتر متمانە بە رەگەزی مێیینە دەكەن لەرووداوەكانی خۆپیشاندان، جەنگ و ناوچە نائارامەكاندا، بەهۆی تێڕوانینی باو بەرامبەر راگەیاندنكارانی مێیینە و نەبینینی خولی پاراستنی سەلامەتی.
10. راگەیاندنكارانی مێینە لە هەندێك دەزگا و دامەزراوەدا، زۆرتر بۆ جوانكردنی شاشە و پشتبەست بەپێوەری جوانیی و رەهەندی سێكسیی وەردەگیرێن، وەك لە پێوەری تواناو لێهاتووییان كە ئەوەش كاریگەریی كردۆتە سەر ئەوەی نەتوانن نوێنەرێكی باش بن بۆ پرسەكانی تایبەت بە رەگەزی مێینە.
