بەرھەم ساڵح و ئیمانوێل ماکرۆن په‌یوه‌ندییه‌كی ته‌له‌فۆنییان ئه‌نجامدا
11:01 - 02/12/2020
"زەمەن"
بەرھەم ساڵح سەرکۆماری عێراق و ئیمانوێل
ماکرۆن سەرکۆماری فەڕەنسا، پەیوەندییەکی تەلەفۆنیان ئەنجامدا و تێدا باسی
پەیوەندییە دووقۆڵییەکانی نێوان ھەردوو وڵاتیان کرد.
بەپێی ئەو ھەواڵەی لە ماڵپەری فەرمی
سەرۆکایەتی کۆماری عێراق بڵاوکراوەتەوە، ھەردوو سەرۆک تاوتوێی پێشھاتەکانی
ناوچەکەیان کردووە و جەختیان لە گرنگی ئەنجامدانی دیالۆگ بەمەبەستی دەستەبەرکردنی
سەقامگیری و ئاسایشی ناوچەکە کردووەتەوە.
ئاماژه به‌وه‌شكراوه، بەرھەم ساڵح
و ماکرۆن جەختیان لە گرنگی دەستەبەرکردنی پاڵپشتی نێودەوڵەتی بەمەبەستی
چاودێریکردنی ھەڵبژاردنەکانی داھاتووی عێراق و ھەماھەنگییکردنی یەکتر لە
رووبەڕووبوونەوەی ھەڕەشەی ڤایرۆسی کۆرۆنای نوێ کردووەتەوە.
له هه‌واڵه‌كه‌دا باس له‌وه‌شكراوه،
سەرکۆماری عێراق و سەرکۆماری فەڕەنسا لەمیانی پەیوەندییە تەلەفۆنییەکەدا ئاماژەیان
بەوە داوە کە تیرۆریزم بە ھەموو جۆرەکانییەوە زیان بە ئاشتی و پێکەوە ژیان
دەگەیەنێت و ھێز لە خستنەوەی ناکۆکی لە نێوان ئاینە جیاوازەکان وەردەگرێ.
ھاوکات بەرھەم ساڵح لەمیانی
گفتوگۆیەکەی لەگەڵ ماکرۆن ئەوەی خستووەتەڕوو کە گرووپە تیرۆریستییەکان ھەوڵدەدەن
ناکۆکی بخەنە نێو عێراقییەکان و لەم چوارچێوەیەش موسڵمان، کریستیان، ئێزدیی و
پێکھاتەکانی دیکە بکەنە ئامانج.