کوردستان

وەزیری دارایی رێنمایی چاکسازی لە خانەنشینی دەرکرد

11:13 - 29/06/2020 1905 جار خوێندراوەتەوە

"زه‌مه‌ن"

وه‌زاره‌تی دارایی و ئابووری حكومه‌تی هه‌رێمی كوردستان، ئه‌مڕۆ گشتاندنی بۆ رێنمایی دارایی كرد، كه‌ به‌ ژماره‌ (13) ئاراسته‌ی سه‌رجه‌م لایه‌نه‌ په‌یوه‌ندیداره‌كانی كردوون و تیایدا ورده‌كاری تایبه‌ت به‌ چاكسازی له‌ خانه‌نشینی له‌ چوارچێوه‌ی جێبه‌جێكردنی یاسای چاكسازی روونكردووه‌ته‌وه‌.


بەپێی نوسراوێکی وەزارەتی دارایی، كه‌ وێنه‌یه‌كی ده‌ست دیجیتاڵ میدیای "زه‌مه‌ن" كه‌وتووه‌، وەزارەتی دارایی و ئابوری، رێنمایی تایبەتی بۆ جێبەجێکردنی یاسای چاکسازی ژمارە (4)ی ساڵی (2020) دەرکرد، کە بەپێی رێنماییەکە سەرجەم خانەنشینانی پلە باڵا لە هەرێمی کوردستان دەخرێنەوە بەر هەمان مەرج و پێوەرەکانی خانەنشینبونی فەرمانبەران لە پلە گشتییەکانی وەزیفە.

بەپێی رێنماییەکان " شایستەی موچەی خانەنشینی نابێت لە رێژەی (50٪) تێپەڕ بکات، لە کۆی گشتی دوا مووچە و دەرماڵە، کە لەکاتی خزمەتیدا وەریگرتوە، هەروەها لە سەرەتای ئەم مانگەوە ئەندامانی پەرلەمان ئارەزومەندانە بۆی هەیە دەستبەرداری ماف و شایستەی خانەنشین بون بێت، پێویستە لەماوەی (30) رۆژدا داواکارییەک پێشکەش بە دیوانی سەرۆکایەتی پەرلەمانی کوردستان بکات بۆ وەرگرتنی رێکارە یاساییە پێویستەکان.

ئەوەش هاتوە "بەڕێوەبەرایەتی گشتی خانەنشینی، سەر بە وەزارەتی دارایی و ئابوری، چەند لیژنەیەک پێکدەهێنێت بۆ پێداچونەوە بە لیستی خانەنشینان و دڵنیابون لە شایستەی یاسایی وە تۆماربونیان لە سیستمی بایۆمەتری".

جگە لەوەش وەزارەتی دارایی و ئابوری لەگەڵ وەزارەتی پێشمەرگە ناوی سەرجەم ئەو کەسانەی بە نایاسایی یان پلەی وەزیفی بەرزتر لە پلەی شایستەی خۆیان خانەنشین کراون، یان لەسەر بنەمای نایاسایی ئەژماری خزمەتی ساڵانی وەزیفیان بۆ کراوە، بەرزدەکاتەوە بۆ سەرۆکایەتی ئەنجومەنی وەزیران بۆ ئەوەی لەژێر رۆشنایی یاسا بەرکارەکان راستکردنەوەی موچەیان بۆ بکرێت.

هەروەها هیچ کەسێک خانەنشین ناکرێت لە ژێر هیچ ناونیشانێک ئەگەر پێشتر بە شایستەبونی یاسایی لە تۆمارەکان و داتابەیستی بایۆمەتری پەیڕەوکراو لەلایەن حکومەتی هەرێمی کوردستان تۆمار نەکرابێت و بەرایی نەبێت.

 

ده‌قی نووسراوه‌كانی وه‌زاره‌تی دارایی:

 

 



سۆشیال میدیا

ڕۆژنامەی زەمەن

Advertisement