جوانییەکانی بێئومێدیی
2/19/2023 11:48:00 AM
ئارام قادر حەمەسور
ئومێدبوون وەک ئارامکەرەوەیە، ئومێدبوون هەمیشە چاوەڕوانیمان درێژتر دەکات بۆ نەهاتووەکان، بەڵام هەرگیز چارەسەری ناکات. تازیاتر بە ئومێدبین زیاتر بێئومێد دەبین.
زۆرکات ئەوە ئومیدبوونە وەک ئارامکەرەوە بەدیار وەهم و ڕووداوێک و کاریزمایەکەوە دەمان وەستێنێت، بەرەو کویلایەتیی و مەستبوونمان دەبات. سپینۆزا دەڵێت؛ ئومێدبوون ڕێگایەکی خەمباربوونی مرۆڤە.
ئومێدبوون پاراسیتامۆڵێکە تابەرگەی خەمێک بگرین و بەدیارییەوە دابنیشین و ئارام بگرین. بۆیە هەندێ کات بێئومێدیی باشترین ئەرکە، تا دووبارە بەرگێکی تازەتر بپۆشین.
هەندێ ئومێدبوون تەنیا پیربوونە بەدیار دۆڕانێکەوە کە دانی پێدانانێین. یونانییەکان هەمیشە ئومێدبوونییان بە سەرچاوەی یەکەمی خراپە داناوە، خراپەیەک هەمیشە لە وەهمدا دەمانهێڵێتەوە. ئومێدبوون ئەو گێژەڵووکەیە کە ئێمە وەک کاغەزێک لوول دەدات و گێژمان دەکات و بەرەو شوێنێکی نادیارمان دەبات. گەشەپێدانی مرۆیی دەروێشانە ستاییشی ئومێدبوون دەکات، مرۆڤ دەبەستێتەوە بە کۆمەڵێ وەهمی پووچ. ئەمەش ترسە لە بێئومێدیی.
بێئومێدیی دەبێتە هۆی یاخیی بوونمان لە یاسا و نەریتە دۆگماکان، تا دووبارە خۆمان نوێ بکەینەوە. هەمیشە ستەمکار و خۆپەرستەکان ستاییشی ئومێدبوون دەکەن، چونکە دەترسن مرۆڤ بیر بکاتەوە.
لە بێئومێدییدا مرۆڤ وزەیەکی گەورە و بیرکردنەوەی باش درووست دەکات. هەندێ ئومێدبوون بەردەوام رووحە سیزیفەکەمان ئاو دەدات. ڕۆسۆ دەڵێت؛ بێئومێدیی سەرەتای گۆڕانکارییە، چونکە بێئومێدیی ناچارمان دەکات ژیانێکی تازە درووست بکەینەوە.
ئومێدبوون هەمیشە مرۆڤ دەبەستێتەوە و لە بازنەیەکدا دەیخوولێنێتەوە و گێژی دەکات. هەمیشە ئومێدبوون مرۆڤ لە ئازادبوون دادەبڕێت. چونکە بێئومێدیی واتا ئازادیی. ئەمەش ڕستەیەکی سەر گۆڕی نیکووس کازانتزاکیسە.
بێئومێدیی جوانە، چونکە دەبێتە هۆی شکاندنی بتەکان، دەبێتە هۆی کۆتاییهێنان بەو مەستبوونە بازنەییەی کە دەیەوێت بەردەوام تەوافیبکەین.
هەمیشە لە بێئومێدییدا دەتوانین بەهارێکی جوانتر درووست بکەین، ئومێدبوون هەمیشە لە زستاندا دەمانهێڵێت و بەهارمان لێدەکاتە فریادڕەسێک تامردن چاوەڕێی بکەین.
سەرەتای گۆڕانکاریی خودیی و کۆمەڵایەتی، بێئومێدییە لەو ئومێدە ساختانەی کە تەمەنمان کوورت دەکەنەوە. چونکە ئومێدبوون چارەسەری نەخۆشییەکە ناکات، تەنیا و زەمان دەداتێ تا زیاتر بەرگەی نەخۆشییەکە بگرین. ئومێدی ڕاستەقینە و گەورە لەناو بێئومێدیی دایە.