وتار

بەرنامەکەی بزوتنەوەی گۆڕان و خەڵک هەر لە شوێن خۆیانن ئەوە ئێمەین لەوێ نەبوین!!

10/13/2021 10:10:00 AM 90 جار خوێندراوەتەوە
گەیلان شێخ عومەر

  ئەنجامی دواهەمین هەڵبژاردنی  پەرلەمانی عێراق دەری خست هاوکێشەکە نەگۆڕاوە ، ئەوەی گۆڕاوە ڕێژەی دەنگەکانە کە زۆر کەمی کردوە ئەوەش تەنها یەک مانای هەیە ئەویش وشیاری ئەو دەنگدەرە بەرێزەیە کە باوەڕی تەواوی بە بەرنامەکەی بزوتنەوەی گۆڕان هەیە و لە هیچ کەسێک قبوڵ ناکات لاڕێ بێت.
 
دەرکەوت بەرنامەکەی بزوتنەوەی گۆڕان و پشتیوانی خەڵک هەر لە شوێنی خۆیان پێکەوە ماون و  وەفادارن بە بیرو بۆچونی داڕێژراوی بەرێز نەوشیروان موستەفا ، بەڵام ئەوە  ئێمەین لەوێ نەبوین .

دەرکەوت ئەو دەنگدرە بەرێزەی کە ساڵانێکە  لەسەر ئەرک و ماندبونی خۆی پشتیوانی لە پڕۆژەی چاکسازی و گۆڕانخوازی دەکات لە هەرێمی کوردستان  مەڕ  نیە لە لایە کەسێکەوە ئاڕاسته بکرێت بۆ ڕێگایێکی پێچەوانە ، چونکە خودی دەنگدەر خاوەن ڕوئیا و دونیا بینی خۆیەتی  و لێکدانەوەی باشی هەیە بۆ ڕوداو  و  پێشهاتەکان .

ئەو خەسڵەتانەی ئەندامانی بزوتنەوەی گۆڕانی پێ ناسراون بوێری و یاخیبونە بەرامبەر هەر دەسەڵات و هێزێک کە ویستی خۆسەپاندن و ستەمکاری هەبێت . 

دەبێ سەرانی بزوتنەوەی گۆڕان بیری خۆیان بخەنەوە کە دەنگدەری بزوتنەوەی گۆڕان جیایە لە دەنگدەری تەواوی حیزب و لایەنەکانیتر ئەو دەنگدەرە نە ڕامدەکرێت و نە دەستەمۆ ، ئەوکاتە دەنگی لێ بەرز نابێتەوە کە بزانێت کۆی سیاسەت و هەنگاوەکان لە پێناو بەرژەوەندی خەڵکە و بۆ هێنانە کایەی زیاتری دادگەری و یەکسانیە .
هەر ئەوەش بوو کە بزوتنەوەی گۆڕانی لە پێناودا دامەزراوە .

کەواتە هاکێشەکە نەگۆڕاوە و وەک خۆیەتی ، بۆ ئاشتکردنەوە و ڕابەرایەتی کردنی سەر لەنوێ و ئومێد دان بە هەزاران دەنگی نوێی ناڕازی  ئەوە بڕیاربەدەستانی بزوتنەوەی گۆڕانن دەبێ دان بەهەڵەکانیاندا بنێن و  بگەڕێنەوە ناو ئاپۆڕای پشتیوانانی بزوتنەوەی گۆڕانخوازی کە هێشتا  وەفاداران بەو بەرنامەیە و وەک شاخ سەر بەرزانە وەستاون .

سۆشیال میدیا

ڕۆژنامەی زەمەن

Advertisement