وتار

چاوەڕێی وەڵامێکی توندی ئەنجومەنی ئاسایش بن

4/19/2021 9:13:00 PM 1170 جار خوێندراوەتەوە

تەنیا کوردی

لە دوای پرۆسەی ئازادی لە عێراقی فیدڕاڵ، دوای راپۆرتەکانی نێردەی نەتەوە یەکگرتووەکان لەم کاتدا کە ستیڤان دیموسترا دوو راپۆرتی لە بارەی ناوچە کوردستانییەکانی دەرەوەی ئیدارەی ھەرێم، سنووری ماددەی ١٤٠، پێشکەس کرد و نەخشەڕێگای چارەسەریی دوورمەودای دانا، بەڵام ئیدی نەتەوەیەکگرتووەکان چاوی لە ناوچە کوردستانییەکان داخست و ھەنگاوەکانی چارەسەری لەم ناوچانە سڕکران.

ئەمڕۆ سەرۆکی ھەرێمی کوردستان نێچیرڤان بارزانی لە نامەیەکدا بۆ سکرتێری گشتی نەتەوە یەکگرتووەکان و ئەندامانی ئەنجوومەنی ئاسایشی نێودەوڵەتی بە فەرمی داوایەکی یاسایی ئاراستەکردن کە رۆڵی زیاتر بدرێ بە نێردەی سکرتێری گشتیی نەتەوە یەکگرتووەکان لە عێراق و دەسەڵاتی زیاتری پێبدرێت و ڕۆڵی زیاتری هەبێت لە نێوەندگیریی نێوان حکوومەتی فیدراڵی عێراق و حکوومەتی هەرێمی کوردستان بۆ چارەسەرکردنی کێشەکان بەتایبەتی جێبەجێکردنی ماددەی (140)ى دەستوور و کێشەی نەوت و دابەشکردنی داھات.

لەم خاڵەدا راشکاوانە سەرۆکی ھەرێم داوا دەکات کە دەسەڵاتی نێردەی نەتەوەیەکگرتووەکان لە عێراقدا پلاسخارت بەشێوەیەک بێت مەلەفە ھەڵپەسێردراوەکانی نێوان ھەرێم و بەغدا حەسم بکات.
نامەکەی سەرۆکی ھەرێمی کوردستان روانگەیەکی نێودەوڵەتی ھەیە کاتێ پشتگیری لە داواکارییەکەی حکوومەتی فیدراڵى عێراق لە ئەنجومەنی ئاسایشی نێودەوڵەتی دەکات بۆ زیاترکردنی ڕۆڵی نەتەوە یەکگرتووەکان لە چاودێریکردنی هەڵبژاردنەکان لە عێراق و دڵنیابوون لەوەی کە هەڵبژاردنەکانی مانگی ئۆکتۆبەری ئەمساڵ بە باشی و دوور لە پێشێلکاری بەڕێوە بچێت.

نێچیرڤان بارزانی دەیەوێ بە پاڵپشتی ئەورووپاو تایبەت سەرۆکی فەرەنسا ماکرۆن لە عێراقدا ئاشتەوایی سیاسیی دروست بکات، بۆ ئەم مەبەستەش دەستپێشخەری کردووە بۆیان، لەم نامەیەشدا ئەگەر دیقەتی ورد بدرێ کە داوای لە ئەنجوومەنی ئاسایشی نێودەوڵەتییە ھەم بۆ عێراق و ھەمیش داوا دەکات لە دەقی پرۆژەبڕیاری نوێی ئەنجومەنی ئاسایشی نێودەوڵەتیدا دەربارەی عێراق، پشتگیریی فەرمیی ئەنجومەنى ئاسایشى نێودەوڵەتى هەبێت بۆ جێبەجێکردنی ڕێککەوتنی ئەم دواییەی نێوان حکوومەتی فیدراڵى عێراق و حکوومەتی هەرێمی کوردستان دەربارەی بودجە و دانوستان لەسەر تەواوى پرسە ھەڵپەسێردراوەکان. ئەمە رێک نامەکە روانگەیەکی ستانداردی نێودەوڵەتی ھەیە کە چاوەڕوانکراوە ئەنجوومەنی ئاسایشی نێودەوڵەتی وەڵامێکی ئەرێنی و جیددی ھەبێ لەسەر ئەم نامەیەی سەرۆکی ھەرێمی کوردستان، ھاوکات شەرعیەتدان بە چارەکردنی کێشەکان لە یوئێندا کەیسی چارەسەری نێوان ھەرێم و بەغدا زیندوو دەکرێتەوە و ھۆشداری توندی ئەنجوومەنی ئاسایشی نێودەوڵەتی بەدوادادێ بۆ یەکلاکردنی ھەندێ پڕسی ھەستیار کە دەمێکە دەبوو یوئێن ئەم ڕۆڵەی ھەبووا.

ئەم ھەنگاوانەی سەرۆکی ھەرێمی کوردستان پێمان دەڵێ، خولقێنەری ھێزی نەرم لە ناوچەکەدا لە جەولەی دیپلۆماسی و دەولی ناوەستێ، تا بەتەواوەتی لە نێو ھاوکێشەی ناوچاکەدا بە ستراتیژیەتێکی جیھانی ستاندارد پێگەی ھەرێمی کوردستان بە پاڵپشتی کۆمەڵگەی دەولی بەھێز دەکاتەوە و، ئەم ھاوکێشەیە پێچەوانە دەکاتەوە کە مەترسی سڕینەوە لەسەر قەوارەی ھەرێم ھەبوو، دەیگۆڕێت بۆ ھەرێمێکی کاریگەر و سەقامگیر لە گەشەی دیپلۆماسی و حساب بۆکراو لە ھەندێ پێشھاتی نوێی ناوچەکە دا.