سەردانی پاپای ڤاتیکان و چەند ئاماژەیەکی ئاینی و سیاسی
3/5/2021 1:59:00 PM
98 جار خوێندراوەتەوە
فه‌ره‌یدون غه‌ریب
ئاشکرایە هاتنی وەفدی ئاینی یان سیاسی وڵاتان لە هەر ئاین و نەتەوەو وڵاتێکەوە بێت، کارێکی ئاسایی و یاسایی وشەرعیە بەمەرجێک لە چوارچێوەی کاری دیبلۆماسی وپێشوەخت ڕەزامەندی لەسەر درابێت.
لەمێژوی ئاینی پیرۆزی ئیسلامدا و لەسەردەمی پێغەمبەردا(درودی خودای لەسەربێت) دەیان نمونەی هاتنی وەفدی ئاینەکانی ترو میوانداری و پێشوازی گەرمی ئەو زاتە دەگێڕدرێتەوە، کە بەگەرمی و شێوازی شایستە میوانداریان لێکراوە. نامەکان بۆ فارس و قەیسەری ڕۆم و نەجاشی و پێشوازی نەصراکان ، مێژوی پێکەوە ژیانی ئاینی و دیبلوماسیەت وڕێزگرتن بوە لەوانیتر.
ئاین لەپاڵ خودا پەرستیدا، بەشێکە لە پڕۆگرامی ژیان و نەخشەڕێگای ئێستاو داهاتووی مرۆڤایەتی، بەهۆی ئاین وکڵتورو کاری دیبلۆماسیەت و ئابوری و سیاسەتەوە، ئەزمون و ئاکارەکانی یەکترناسین و ڕێزگرتن لەبەرانبەرو پێکەوەژیان و تەبایی و یەکترقەبوڵ کردن ئەبێتە ناسنامەی مرۆڤایەتی.
لەم سۆنگەیەوە جیاوازی ئاینی نەک نابێتە ڕێگرو کۆسپی بەردەم پێشکەوتنی کۆمەڵگاکان بە پێچەوانەوە هۆکارو پردی پەیوەندیە بۆسەقامگیری ئاشتی نێوان گەل و وڵاتان و لێبوردەیی و پێکەوە ژیانی کۆمەڵگاو مرۆڤەکان، با لەئاین و نەتەوەو ڕەگەزو ژینگەو وڵاتی جیاوازیشەوەبن...
لەگۆڕەپانی ژیاندا، قورئان زۆرڕاشکاوانە لەگەڵ ئەهلی کتاب داوای جەخت کردنەوەلەخاڵەهاوبەشەکان دەکاتەوە بەمەبەستی لێک نزیک بونەوە،( قل ياٲهل الكتاب تعالَوا ٳلی كلمةسواءبیناوبینكم ...... ) ال عمران/٦٤
له م ڕوانگە بەرزە خوداییەوە، لەوێوە کەمرۆڤ و مرۆڤبون سەنتەرە لەئاینەکاندا، پێشوازی کردن لەئاینەکانی دیکە بەمەبەستی هاوکاریکردنی یەکترو دەستبار بۆیەکگرتن کارێکی گونجاوەو لەئاینی پیرۆزی ئیسلامدا جێگای کراوەتەوە.
لەم ڕوانگەیەوە سەردانی پاپای ڤاتیکان بۆ عێراق و هەرێمی کوردستان ئاماژەی بایەخدارن بۆ گرنگی پێدانی جیهانی مەسیحیەت(وڵاتانی ئەوروپی کەئێستا پاپا نوێنەری ئەوانیشە) بە عراق و هەرێمی کوردستان کەلەئێستادا بەخراپترین دۆخی سیاسی و ئابوری ئاڵۆسکاوی نێوان ئەم هۆمۆجینەی بەزوڵم و ستەم ناویان لێناوە عێراق.
دەکرێت پێشوازی پاپای ڤاتیکان بکەینە شاشەی پیشاندانی مێژووی چەندین ساڵەی گەلانی کوردستان، کە لەڕابردوو ئێستادا، کوردوستان لانکەی پێکەوەژیان و ئاشتی وئارامی تەبایی ئاین و پێکهاتەجیاوازەکان بوە، هەروەک چۆن لەسەردەمی کۆچی جووەکاندا ئەوەندە متمانە بەیەک هەبوو دوکان و خانوو شوێنی نیشتەجێی خۆیان دایەدەستی موسوڵمانە هاوشاریە کوردەکانیان.
نزیک لەئاین و سیاسەت ، جیهانی ئەمڕۆ جیهانێکی وابەستەی بەرژەوەندی و خەم لێخواردنی داهاتوە، بەتایبەت بۆگەلێکی بێ دەوڵەت و لانەوازی وەکو کورد، کەبەداخەوە،فاکتەرە نێوخۆیی و دەرەکیەکان ، میللەت و دەوڵەتانی موسوڵمانی وەک تورک و عەرەب و فارس هەر بە برابچوکی ئاینی و نەتەوەیی بن دەستیان هێشتینەوە، مافی دەوڵەت داریان پێ ڕەوا نەبینین..، دەکرێت ئەو ووتە هاوبەشەی نێوان ئاینەکان بکرێتەخاڵی وەرچەرخان کەدەڵێت:( ئەوەی بۆخۆت پێت خۆش دەبێت بۆ برامرۆڤەکەی تریشت پێت خۆش بێت ) ، ئێستا گرنگە بۆ سەلماندنی تواناو وزەو ئایندەمان ڕێز و سوود لەهەموو هەنگاوێک وەربگرین کەخشتێک دەخاتە سەر دیواری ئاشتی و پێکەوەژیان و بەدەستهێنانی مافەکانمان.