هەڤاڵ ئەبوبەکر: ئەگەر کورد خۆی ببێتە دوژمنی خۆی، ئەوا "بنەتۆوەکەشی" نامێنێتەوە
01:57 - 29/04/2026
زەمەن - هەواڵ
پارێزگاری سلێمانی پەیامێکی ئاراستەی لایەنە سیاسییەکان
و نوخبەی ڕۆشنبیری کرد و داوای لێکردن کۆتایی بە دووبەرەکی بهێنن و یەکگرتوویی
بپارێزن.
هەڤاڵ ئەبوبەکر، پارێزگاری سلێمانی لە ڕاگەیێنراوێکدا
لە هەژماری فەرمی خۆی لە تۆڕی کۆمەڵایەتی فەیسبووک ئاماژەی بەوە کردووە، ئەگەر دەستەبژێری
حیزبی و بەشێک لە کایەی ڕۆشنبیری و تۆڕەوانەکان، ژیانیان کردبێتە مەیدانی ناکۆکی و
دووبەرەکی و دژایەتیی یەکتر، ئەوا کاتی ئەوە هاتووە ئەو ڕێڕەوە بگۆڕدرێت. ناوبراو
جەختی لەوە کردووەتەوە کە نابێت "گوریسی یەکترخستن" لە گەردنی یەکتردا
توند بکرێت.
پارێزگاری سلێمانی داوا دەکات ئەم دۆخە ڕاست
بکرێتەوە و نەک تەنها ژیان، بەڵکو کارەسات، نەهامەتی، لێقەومان و تەنانەت مەرگیش
بکرێنە دەرفەتێک بۆ بەیەکەوەبوون، سەبووری و پشتیوانیکردنی یەکتر. هەروەها داوای
کردووە کە مەکۆیەک بۆ کۆکبوون و یەکترتەواوکردن دروست بکرێت و هەمووان دوور بکەونەوە
لە "خۆپەسەندی، خۆسەپێنی، خۆپەرستی و خۆبەخودازانی".
لە پەیامەکەیدا هاتووە کە پێویستە جیاوازی و
ناکۆکییەکان بکرێنە دەرفەتی خۆیەکخستن و گەشەکردن، نەک بۆ سڕینەوە و پاکتاوکردنی یەکتر.
هەڤاڵ ئەبوبەکر هۆشداری دەدات و دەڵێت، کورد دوژمنی زۆرە و دۆستی کەمە، بۆیە ئەگەر
کورد خۆی ببێتە دوژمنی خۆی، ئەوا "بنەتۆوەکەشی" نامێنێتەوە و ڕووبەڕووی
مەترسیی لەناوچوون دەبێتەوە.
پارێزگاری سلێمانی بۆ دووپاتکردنەوەی پەیامەکەی،
سوودی لە هۆنراوەیەکی قانعی شاعیر وەرگرتووە کە تێیدا دەڵێت: "برا بن، غایەتان
یەک بێ، برایی؛ غایە یەکبوونە. ئەوی کۆمەک بە فیکرت بێ؛ لە هەر لا بێ؛ براتانە."
بەمەش جەخت لەوە دەکاتەوە کە پێویستە ئامانجەکان یەک بخرێن و هەر کەسێک هاوکاری فیکری
بێت، بە برا هەژمار بکرێت.