کێشەی دەرمان و نەشتەرگەری لە نەخۆشخانەکانى سلێمانی چارەسەر کرا
08:33 - 13/09/2025
زەمەن پرێس:
بەڕێوەبەرایەتی گشتی تەندروستی سلێمانی ڕایگەیاند، کێشەی
نەشتەرگەری و دەرمان و نەبونی کەرەستەی پزیشکی لە نەخۆشخانەكانی شاری سلێمانی تا
کۆتایی ئەمساڵ چارەسەرکرا و سوپای ئەو كەسانە و ڕاگەیاندنەكان دەكات هەوڵی
چارەسەرکردنی ئەو کێشەیەیان داوە.
بەڕێوەبەرایەتی گشتی تەندروستی سلێمانی،
ئەمشەو لە ڕاگەیەندراوێكدا بڵاویكردەوە، لەسەر راسپاردەی قوباد تاڵەبانی، جێگری
سەرۆکی ئەنجومەنی وەزیران و ئاوات شێخ جەناب، وەزیری دارایی هەرێم کێشەی
نەشتەرگەری و دەرمان و نەبونی کەرەستەی پزیشکی لە سلێمانی تا کۆتایی ئەمساڵ
چارەسەرکرا.
ئاماژەی بەوەشكرد، لە کۆبونەوەیەکدا بە ئامادەبونی هەریەکە لە بەڕێزان
شاهۆ عوسمان، جێگری پارێزگاری سلێمانی و د. سەباح نەسرەدین، بەڕێوەبەری تەندروستی
سلێمانی و د. ماکوان، بەڕێوەبەری لقی سلێمانی بانکی هەرێم کێشەی نەشتەرگەری و
دەرمان و نەبونی کەرەستەی پزیشکی تا کۆتایی ساڵی 2025 چارەسەرکرا.
بەگوێرەی ڕاگەیەندراوكەی تەندروستی سلێمانی، سوپاسی وەزیری تەندروستی
هەرێمی کوردستان و هەمو ئەو بەڕێزانە دەكات كە هەوڵی چارەسەرکردنی ئەو کێشەیەیان
داوە، هەروەها سوپاسی سەرجەم ڕاگەیاندنەکان دەكات بۆ گرنگی دان بەبابەتەکە و
خەمخۆریان.