وڵاتەکەی زیلینسکی لەسەر روداوەکانی سلێمانی هاتە دەنگ
03:41 - 30/08/2025
زەمەن _ جیهانی
باڵیۆزخانەی ئۆكرانیا لە بەغداد ئەو تۆمەتانە رەتدەكاتەوە كە وڵاتەكەیان تێوەگلابێت لە مەشقپێكردنی چەكداران و چۆنیەتی دروستكردنی درۆن بۆ ئەنجامدانی چالاكی لە هەرێمی كوردستان.
ئەمڕۆ شەممە، ٣٠ی ئابی ٢٠٢٥، باڵیۆزخانەی ئۆكرانیا لە بەغدا لە راگەیەندراوەكەیدا دەڵێت، ئەو هەواڵە درۆیانە رەتدەكەینەوە كە لە بەشێك لە میدیاكان بڵاوكراونەتەوە گوایە لایەنی ئۆكرانی تێوەگلاوە لە ئامادەكردن و پێدانی مەشق بە كەسانێك كە بەشداری چالاكی نایاسایی دەكەن لە نێو خاكی عێراق یان هەرێمی كوردستان.
باڵیۆزخانەكە وتوشیەتی، ئۆكرانیا بەهیچ شێوەیەك هیچ چالاكییەك ئەنجام نادات كە پەیوەست بێت بە مەشقدان بە چەكداران یاخود دروستكردنی درۆن بۆ بەكارهێنانی نایاسایی لە دەرەوەی خاكەكەی.
جەختیشی كردۆتەوە "ئەم بانگەشانە بەتەواوەتی زانیاریی چەواشەكارانەن و هیچ بنەمایەكی راستییان تێدا نییە.
ئاماژەی بەوەشداوە، "پێمانوایە بڵاوكردنەوەی ئەو زانیارییە درۆیانە، هەوڵێك بۆ شێواندنی ناوبانگی ئۆكرانیاو سەركردایەتییەكەی."
دەزگای ئاسایشی هەرێمی كوردستان، رۆژی ٢٧27ی ئەم مانگە، "دانپێدانان"ی گروپەكەی لالەزاری بڵاوكردەوەو تێیدا ئاماژە بەوەدرابو كە بەشێك لە چەكدارانی گروپە چونەتە ئۆكرانیا و لەوێ مەشق و راهێنانیان لەسەر درۆن و چۆنیەتی دروستكردنی درۆن بینوە لەپێناو "تێكدان"ی ئاسایشی هەرێم و "تیرۆركردنی سەرۆكی یەكێتی". بەڵام ئەمڕۆ شەممە، باڵیۆزخانەی ئۆكرانیا لە بەغدا لە راگەیەندراوێكدا ئەو تۆمەتانە رەتدەكاتەوە.