نێچیرڤان بارزانی: هەرێم و توركیا به‌رژه‌وه‌نديى هاوبه‌ش و درێژخايه‌ن كۆيانده‌كاته‌وه
07:52 - 25/08/2025
زەمەن پرێس:
نێچیرڤان بارزانی،
سەرۆكی هەرێم لە كۆبونەوەیدا لەگەڵ جێگری سەرۆكی ئاكپارتی رایگەیاند، هەرێم و
توركيا به‌رژه‌وه‌نديى هاوبه‌ش و درێژخايه‌ن كۆيانده‌كاته‌وه.
بەپێی راگەیەندراوێكی
سەرۆكایەتی هەرێم، نيوه‌ڕۆى ئه‌مڕۆ دوشه‌ممه، نێچيرڤان بارزانى، سه‌رۆكى هه‌رێمى
كوردستان، له ديدارێكدا له‌گه‌ڵ زافه‌ر سراكايا، جێگرى سه‌رۆكى پارتى داد و گه‌شه‌پێدانى
ده‌سه‌ڵاتدارى توركيا بۆ كاروبارى ده‌ره‌وه، په‌يوه‌ندييه‌كانى هه‌رێمى كوردستان
و عێراق له‌گه‌ڵ توركيا و دۆخى ناوچه‌كه‌يان تاوتوێ كرد.
وەك لە
راگەیەندراوەكەدا هاتوە، هه‌ردولا جه‌ختيان له گرنگيى په‌يوه‌ندييه‌كانى نێوانيان
و هاريكاريى هاوبه‌شيان له بواره جياجیاكاندا كرده‌وه كه خزمه‌ت به به‌رژه‌وه‌نديى
هه‌ردولا و پاراستنى ئارامى و سه‌قامگيرى له ناوچه‌كه‌دا ده‌كات.
نێچيرڤان بارزانى
دوپاتى كرده‌وه "هه‌رێمى كوردستان وه‌ك دراوسێيه‌كى گرنگ له توركيا ده‌ڕوانێت
كه به‌رژه‌وه‌نديى هاوبه‌ش و درێژخايه‌ن كۆيانده‌كاته‌وه."
نێچیرڤان بارزانی
پێزانينى بۆ ڕۆڵى ئه‌ردۆغان و ئاك پارتى له پته‌وكردنى په‌يوه‌ندييه‌كانى توركيا
له‌گه‌ڵ عێراق و هه‌رێمى كوردستاندا ده‌ربڕیوە.
لاى خۆيه‌وه سراكايا
وێڕاى نيشاندانى خواستى به‌رده‌وامى توركيا بۆ فراوانكردنى په‌يوه‌ندييه‌كانى له‌گه‌ڵ
عێراق و هه‌رێمى كوردستان له هه‌مو بواره‌كاندا، ستايشى په‌يوه‌ندى و دۆستايه‌تيى
نێچيرڤان بارزانی له‌گه‌ڵ توركيا و ڕۆڵى ئه‌رێنيى له‌سه‌ر ئاستى ناوچه‌كه كرد.
پرۆسه‌ى ئاشتى له
توركيا و چه‌ند پرسێكى جێى بايه‌خى هاوبه‌ش، ته‌وه‌رێكى ديكه‌ى ديداره‌كه بون.