2470 وەرزش

مۆندیالی هەرێمەكان لە كوردستان بەڕێوەدەچێت

02:21 - 24/04/2023

"زەمەن"
مافی میوانداریكردنی جامی كۆنیفای 2024ـی نێوان هەرێمەكان، بە كوردستان بەخشرا و یەكێتیی تۆپی پێی كوردستانیش دەڵێت، یارییەكان لە یاریگاكانی كوردستان بەڕێوەدەچن.
شوان عەزیز، بەرپرسی ڕاگەیاندنی لیژنەی ئۆڵۆمپی كوردستان، ڕایگەیاند: یارییەكانی ئەو پاڵەوانەتییە لە یاریگاكانی سلێمانی، هەولێر، دهۆك و زاخۆ بەڕێوەدەچن.
مانگی ئاداری ئەمساڵ (٢٠٢٣) شاندێكی كۆنیفا سەردانی هەرێمی كوردستانیان كرد، بۆ ئاگەداربوون لە دۆخی ئەمنی و یاریگاكانی كوردستان، دوای هەڵسەنگاندنی دۆخەكە، بڕیاردرا مافی میوانداریكردنی جامەكە بە كوردستان ببەخشرێت.
هاوكات جەلال سەعید، وتەبێژی یەكێتیی تۆپی پێی كوردستان، وتی: لە ناوەڕاستی ساڵی داهاتوو (٢٠٢٤) یارییەكان دەستپێدەكەن و ١٦ هەرێم بەشداری دەكەن.
هەشت هەرێم داوای میوانداریكردنی پاڵەوانەتییەكەیان كردبوو، بەڵام دواجار مافی میوانداریكردنی چوارەمین وەشانی جامەكە بە هەرێمی كوردستان بەخشرا.
لەبارەی ئامادەكارییەكان بۆ پێشوازیكردن لە هەڵبژاردەی هەرێمەكان و ئامادەیی یاریگاكانی كوردستان، بەرپرسی ڕاگەیاندنی لیژنەی ئۆڵۆمپی وتی: ئامادەكاریی تەواو دەكرێن و لە ئامادەباشیدا دەبین بۆ هەر ئەگەرێك.
كۆنیفا، ڕێكخراوێكی جیهانیی قازانج نەویستە و پشتگیری لە ھەڵبژاردەكانی تۆپی پێی هەرێمەكان دەكات. لە مانگی حوزەیرانی ساڵی ٢٠١٣ دامەزراوە و یەكەم پاڵەوانەتیش لە مانگی حوزەیرانی ساڵی ٢٠١٤ بە بەشداریی ١٢ هەڵبژاردە لە سوید بەڕێوەچوو.