عیراق

ئەنجامی كۆبونەوەی شیعەكان لە ماڵی نوری مالیكی

09:35 - 20/10/2021 650 جار خوێندراوەتەوە

"زەمەن"


هێز و لایەنە شیعەكانی "چوارچێوەی هەماهەنگی" كە بە نزیك لە ئێران لە قەڵەم دەدرێن جارێكی دیكە گومان دەخەنە سەر ئەنجامی هەڵبژاردنەكانی 10 ئۆكتۆبەر و دانوستانیش رەتدەكەنەوە.

شەوی رابردوو لە ماڵی نوری مالیكی هێزەكانی ناو "چوارچێوەی هەماهەنگی" كۆبونەوە و بڕیاریاندا هیچ دانوستانێك بۆ پێكهێنانی حكومەت نەكەن تاوەكو كۆمسیۆن "هەڵەكانی" راستدەكاتەوە.

بەپێی میدیاكانی نزیك لەم هێزانە، هەروەها داوای بەڵگەیی یاساییان كردووە لەسەر ئەنجامی كۆتایی هەڵبژاردنەكان لە دوای پێداچوونەوە بە گشت تانەكاندا.

"چوارچێوەی هەماهەنگی" لە ژمارەیەك هاوپەیمانیەتی پێكدێت لە نێویاندا هاوپەیمانی ففەتح بەسەرۆكایەتی هادی عامری، هاوپەیمانی هێزی دەوڵەت بەسەرۆكایەتی حەیدەر عەبادی و دەوڵەتی یاسا بەسەرۆكایەتی نوری مالیكی.

گومانی ئەم هێزانە لە پاكی هەڵبژاردنەكانی 10ی ئۆكتۆبەر لە كاتێكدایە كۆمسیۆنی باڵای هەڵبژاردنەكان و مستەفا كازمی سەرۆك وەزیران چەند جارێك جەختیان لە پاكی بەڕێوەچوونی پرۆسەكە كردووەتەوە.

سۆشیال میدیا

ڕۆژنامەی زەمەن