کوردستان

لاهور شێخ جه‌نگی په‌یامێكی له‌باره‌ی بڕیاری دادگا بۆ سزادانی رۆژنامه‌نوسان بڵاوكرده‌وه‌

10:29 - 06/05/2021 355 جار خوێندراوەتەوە

زه‌مه‌ن_هه‌ولێر


هاوسه‌رۆكی یه‌كێتی رایگه‌یاند، تۆمه‌تباركردنیی نێرده‌ دیپلۆماسییه‌ نێوده‌وڵه‌تییه‌كان به‌ تۆمه‌تی بێ بنه‌ما، سكانداڵه‌ و زۆر خراپ ناوبانگی هه‌رێم له‌كه‌دار ده‌كات.


لاهور شێخ جه‌نگی هاوسه‌رۆكی یه‌كێتی نیشتمانی كوردستان له‌ په‌یامێكدا ده‌ڵێت، ئازادی، به‌ردی بناغه‌ی هه‌رێمی كوردستانه‌ و ئازادیخوازانی كوردستان شایه‌نی پاراستن و رێزگرتن و پشتیوانیین.

ئاماژه‌ی به‌وه‌شكردووه‌، نێرده‌ دیپلۆماسییه‌ نێوده‌وڵه‌تییه‌كان،‌ به‌دیهێنه‌ری ناوچه‌ی ئارام و پارێزه‌ری ئه‌زموونی هه‌رێمی كوردستانن، تۆمه‌تباركردنییان به‌ تۆمه‌تی بێ بنه‌ما، سكانداڵه‌ و زۆر خراپ ناوبانگی هه‌رێم له‌ككه‌دار ده‌كات.

ده‌شڵێت، پێویسته‌ به‌ هه‌موومان، هێز و لایه‌نه‌ سیاسی و مه‌ده‌نییه‌كان، روبه‌ڕووی ئه‌م پێشهاته‌ مه‌ترسیداره‌‌ راوه‌ستین. داوا ده‌كه‌م به‌ڕێز سه‌رۆكی هه‌رێمی كوردستان ده‌سه‌ڵاتی خۆی به‌كاربێنێ: دادگا له‌ ده‌ستێوه‌ردانی سیاسی بپارێزێ، سزای ناڕه‌وای سه‌ر گه‌نجه‌ ده‌ستگیركراوه‌كانی بادینان لابه‌رێ و ئه‌و ده‌ستدرێژییه‌ی كراوه‌ته‌ سه‌ر نێرده‌ دیپلۆماسییه‌كان، به‌رپه‌رچبداته‌وه‌".

 

رۆژی سێشەممە 16ی شوباتی ئه‌مساڵ لە دووەم رۆژی دانیشتنی دادگادا، دادگای تاوانی هەولێر بە دەنگی زۆرینەی دادوەران، بەتۆمه‌تی "سیخوڕیكردن بۆ وڵاتان و هەوڵدان بۆ كودەتا"، هه‌ریه‌ك له‌ (شێروان شێروانی، گۆهدار محەمەد، ئەیاز کەرەم، شڤان سەعید و هاریوان عیسا)تاوانباركران و بڕیاردرا بە شەش ساڵ زیندانی حوكم بدرێن و رۆژی سێشه‌ممه‌ 28ی مانگی رابردووش، دادگای پێداچوونه‌وه‌ی هه‌ولێر بڕیاری كۆتایی داوه‌ له‌سه‌ر سزادانی ده‌ستگیركراوانی بادینان و سزاكه‌ی په‌سه‌ند كردووه‌.

حوكمی كۆتایی دادگای پێداچوونەوەی پێنج سزادراوه‌كه‌ی بادینان كە بە (6) ساڵ زیندانی سزا دران، لە دۆسیەی حوكمدانەكەدا ئەم  "شه‌ش تاوانه‌"یان خراوەتە پاڵ:
1- پەیوەندیان بە كونسوڵگەری ئەمریكا و ئەڵمانیا لە هەولێر كردووە
2- كۆبونەوەیان لەگەڵ كونسوڵی ئەڵمانیا كردووە لەیەكێك لە هۆتێلەكان
3- بڕی نزیكەی (5 هەزار)دۆلاریان لە رێكخراوێكی ئەمریكی وەرگرتووە.
4- پەیوەندییان لەگەڵ گروپی پەكەكە هەبووە
5- ڤیدیۆیان لەبارەی جموجوڵی پێشمەرگە لە ناوچەی شیلادزێی و بیرە نەوتیەكانی هەرێمی كوردستان داوە بە رێكخراوی پارێزەرانی جیهانی
6- زانیاریان داوە بە رێكخراوی 17ی شوبات لەسوید.

 

سۆشیال میدیا

ڕۆژنامەی زەمەن

Advertisement