کورد لە بۆشایدا
9/22/2025 9:51:00 PM
سەرکەوتی جیهاز و بەختیار نامیق
بە درێژایی مێژوو کورد لە بۆشایی جوگرافیا و ئابوری و سیاسیدا ژیاوە ، جگە
لە خۆبژێوی لە چوارچێوەی فۆرمێک لە خێڵ نەیتوانیوە بە پێی قۆناغەکانی گۆڕانکاری
بونی هەبێت ، لە ئێستادا باجی ئەو قۆناغانەی مێژوو دەدات کە لە مێژودا دواکەوتوە ،
بە مانایەکی تر عەقڵی حکومداری کوردی نەیتوانیوە سنوری ناوچەیەک یان گوندێک ببڕێت
بەرەو نەتەوەیی بون . لە ئێستادا کە جیهان
لەبەردەم زمین لەرزەیەکی سەربازی و ئابوری و سیاسیدایە دیسانەوە کورد دەکەوێتەوە
بۆشاییەوە ، بۆشایی بە مانای نەبونی پێگەی بەهێزی گشتی لەسەر ئاستی ناوخۆیی و
دەرەکیدا ، ئەگەر دوای گەردەلولی بیابان و بەهاری عەرەبی دەرفتێک بۆ کورد لە عێراق
و سوریادا دروست بوبێت تا قۆناغی بۆشایی ببڕێت بەرەو بونێکی کاریگەر ، ئەوا نەک
هەر نەیتوانی حکومداریەکی دروست لەناوخۆدا بکات تا وەک سەرچاوەی مرۆیی ئامادەیی
هەبێت ، بگرە بە گەڕانەوە بۆ دەستەڵاتی ناوچەگەری خەریکی پوکانەوەی یەکتر بوە ،
پڕە لە شەڕی براکوژی جەنگی براکان ، خۆ ئەگەر تەنها لە ڕوی بەرخودانەوە ئامادەگی
هەبوبێ دیسانەوە بوتە بەشێک لە شەڕکەری ئەجێندایەکی دەرەکی نەک هاوپەیمانێک لەگەڵ
بەرەیەک یان هێزێکدا ، لەم ڕوەوە دەکرا باشور ببوایەتە پێگەیەکی گرنگ تا کوردی
پارچەکانی تر بگەیشتنایەتە ئاستی جۆرێک لە فیداڕاڵی . هێزە گەورەکانی
ناوچەیی و جیهانی زۆر بە ئاسان توانیویانە کورد بۆ گەمەکانی خۆیان بەکاربهێنن و
نەهێڵن لە بۆشایی دەرچێت ، لە ڕۆژئاوا تا ئاستێک نمونەیەکی باشتر لە باشور هەیە و
خەریکە لە بۆشایی دەردەچێت ، بەڵام کاتێک دەبێتە تەواوکاری هێزی ئەمریکا دیسانەوە
دەچێتەوە بۆشایی چونکە هاوپەیمان نیە ، تەنها شەڕکەرە بۆ ئەجێندای بەرەیەکی زلهێز ،
ئەمەش لە عەفریندا دەرکەوت ، هەر کاتێک بەرژەوەندییەکانی ئەمریکا لەگەڵ تورکیا
یەکسان بونەوە دوبارە کورد دەگەڕێتەوە چوارگۆشەی یەکەم . خۆ ئەگەر بەرخودان
بکەینە پێوەر ئەوا لەبەردەم ئەم گۆڕانکاریانەدا و لەم سەردەمەدا هێندە گرنگە تا
چەندێ لەناو هاوپەیمانییەکدا بونت هەیە نەک بەرخودان ، واتا بەرخودان بە تەنها
ناتوانێت لەو بۆشاییە ڕزگارت بکات ، نمونەی بەرخودانەکانی ئۆکرانیا و غەززە ، کە
بونت نەتوانێ ببیت بە یاریچیەک لەناو هاوپەیمانی وڵاتە زلهێزەکاندا و وەچۆن بتوانی
بکەوتە سەر هێڵی بەرژەوەندی وڵاتان ئەوا دوبارە دەکەویتە ناو بۆشاییەوە . باشور وەک هەرێمێکی
فیدڕاڵی عێراق سەرەڕای دۆخی شلۆقی ناوخۆیی دەبێت ئەوە بزانێت کە عێراقیش وەک
سەنتەر دیسانەوە لە بۆشاییدایە و تا ئێستاش خاوەنی ئیرادەی ناوخۆیی نیە ،
گۆڕانکارییە خێراکان هەر لە ململانێی چین و ڕوس لەگەڵ ئەمریکا و ناتۆ زۆر پەیامی
گەیاند لە جەنگی ئۆکرانیا و ڕوس چی ناتۆ و چی ئەمریکامان بینی کە چۆن مامەڵەیان
لەگەڵ بەناو هاوپەیمانەکەیان ئۆکرانیا کرد ، ئێرانیشمان بینی کە چۆن ڕوس و چین
چیان کرد ، ئەمەش بۆ تایوان هەر ڕاستە ، بەڵام هێزەکەی کیم جون ئون دەبێتە
هاوپەیمانی چونکە وەک هێز بونی هەیە ، لە ئێستادا لە ڕۆمانیا و پۆلۆنیا هەمان
ڕوبەڕوبونەوەیە لە نێوان ناتۆ و ڕوسیادا هەیە وە دەبینین هەڵوێستی ترامپ چۆنە. کورد لە باشور و
ڕۆژئاوا دەکەونە بەردەم قۆناغێکی نوێ و لەبەردەم ئەم گۆڕانکاریانەدا دەبێت پێش
هەمو شت یەکێتی ناوەکی خۆیان بپارێزن و بزانن ئایا هاوپەیمانن یان شەڕکەرێکی باش
بۆ فرۆشتن لەسەر مێزی بەرژەوەندی وڵاتە زلهێزەکانی جیهانی و ناوچەیی