رۆژی رەشبگیری
8/7/2022 4:38:00 PM
331 جار خوێندراوەتەوە
عەدنان عوسمان
دوێنێ، ٦ ی ٨ی ٢٠٢٢، رۆژی رەشبگیری بوو لە
کوردستان، لە هەڵمەتێکدا دەسەڵاتی هەرێم زیاد لە ٦٠٠ هاوڵاتی بێ هیچ پاساوێک بە شێوەیەکی
نا ئینسانیانە دەستگیر کرد. بەشێکی بەرچاویان رۆژنامەنوس و پەرلەمانتار و
چالاکوانن. هەمو ئەوانەی کە گیراون، بێ هیچ هۆکارێک و پاساوێک بوە، چونکە نە
توندوتیژی رویداوە، نەهێرش بۆ سەر دامودەزگاکان. ئەوەی رویدا جگە لە ئاماژەیەک بۆ
عەقڵیەتی نادیموکراسی و روحی پاوانخوازی و رێزنەگرتن لە ئازادیەکان هیچی تر نیە.
بە کورتیش سێ ئاماژەو دیاردە لەم هەنگاوەدا
بەدی ئەکرێت:
یەکەم: دەسەڵاتدارانی کوردستان کە لە بەغدا
پشتگیری دیموکراسیەت و مافی خۆپیشاندان ئەکەن تەنها لە ترسی سەید موقتەدایە. دەنا
هیچ باوەڕێکیان بەو پرەنسیپانە نیەو دوژمنی سەرسەختی هەمو جۆرە ئازادیەکن.
دوەم: نەوەی دوەمی حوکمڕان لە هەردوو زۆندا،
کە هەمو ژیانیان لە رۆژئاوا بەسەر بردوە، نمونەیەکی گەورەی روحی دیکتاتۆری و تەنگەنەفەسین
بەرامبەر ئازادیەکان. رەفتارەکانیان زەنگێکی مەترسیدارە بۆ ئایندەی حوکمڕانیان.
سێیەم: پارێزگاری سلێمانی کە دەبێ سەرۆکی
لیژنەی ئەمنی بێت، یەک وشەو یەک هەڵوێستی لەسەر ئەو رەشبگیری و عەسکەرتاریەتە نەبوو.
ئەو زاتە هەم پێشتر رۆژنامەنوس بوەو هەمیش ئێستا لە حزبێکە قسە لەسەر ئازادی خۆپیشاندان
ئەکات!.