730وتار

هەڵوەرینی حیزب

7/27/2021 10:17:00 AM

عەزیز ئەحمەد

ئەگەر دیقەت بدەین، لە کوردستان چەندان حزب مێژووی چەندان ساڵەیان هەبووە لە خەبات و تێکۆشان، خاوەن هێز و پێگەی جەماوەری و ڕێکخستن بوونە، پاشان هەڵوەریون و بچوک بونەتەوە، ئەمەش دیارە بێ هۆکار نییە. وەک دەزانین سەرهەڵدانی حزبی سیاسی لە هەرقۆناغێکدا، هەڵومەرجی لەباری بابەتی دەیهێنێتە پێش و لەلایەن بیرمەندانی ئەو رەوتەوە بەرنامە و پەیڕەوی ناوخۆ و سیاسی بۆ دادەنرێ و خەڵک لە دەوری خۆی کۆدەکاتەوە.

زۆرێک لە حزبەکانی کوردستان، لە لوتکەی بەهێزی و پێگەی جەماوەریدا بوونە، پاشان وردە ووردە پوکاونەتەوە و بەرەو لاوازی ڕۆیشتوون.

ئەم لاواز بوونەوەیەی حزبە سیاسییەکانی کوردستان، لە هاتنە پێشی قۆناغەکانی خەباتی سیاسی ئەودیوی پێشهاتەکانیان نەبینیوە، بەرنامە و خوێندنەوەی وردیان نەبووە، تا ئامادەکاری بۆ پێشهاتەکان بکەن. هاتنە پێشی چەندان دۆخی سیاسی هەبووە خەڵکی سادە دەرکی پێ کردووە، بەلام لە کوردستان حزبی سیاسی هەلوێست و تێڕووانین و خوێندنەوەی دروستی نەبووە، ڕای خۆی زانستیانە بە جەماوەر و خەڵکەکەی خۆی نیشان نەداوە، ئەمەش وادەکات بێ متمانەیی لە نێوان حزب و جەماوەردا دروست بێت.

لە کوردستانی خۆمان هەردەم حزبی سیاسی لە دۆڵێک بووە و خەڵکیش لە دۆڵێکی تر⸮
حزب و جەماوەر، وەکوو ئاو و ماسین هیچیان بێ ئەویتر ناژی، بەمەش دەبێ حزبی سیاسی هەردەم بەرژەوەندییەکانی خەڵک لە سەرووی هەموو شتێک بزانێ و بۆی تێبکۆشێ، لە پێناو سەروەری و عەدالەت، ئەوکاتە ئاوێتەبوونێک دروست دەبێ لە نێوان حزب و جەماوەر، کە جیابوونەوەیان تەنها بە مەرگیان دەبێ.

بەڵام ئەگەر پێچەونەکەی بینرا، ماڵی سەرۆک حزب لە کۆشک و بەرزاییدا بووە، منداڵەکانیشیان گیرفانیان پڕ و قوتابخانە و نەخۆشخانە و جل و بەرگ و ئۆتۆمبێلەکانیان چەندان قات جیاواز دەبێ و بینیمان حزب دەبێتە کۆمپانیا بۆ کەسانی دەستڕۆیشتووی حزب، بینیمان قۆرغکاری لە ئابووری داهاتی ولات دەکرێ و حزب لە کاتی دەسەڵات گرتنەدەستدا جیاوازی لە نێو هاوڵاتیان دەکات و بەرژەوەندی هاوڵاتیانی ناوێ و بەرنامەی خۆش گوزەرانی پێ نییە، نابێ دەسەڵات ڕەنگدانەوەی حزبی پێوە دیاربێ.

حزب نابێ هێز و سوپای سەربازی هەبێ، هێز دەبێ لە چوارچێوەی یاسای سەربازیدا ڕێکبخرێ، ڕاگەیاندن دەبێ بە یاسا ڕێکبخرێ، نەک حزب و شەخسی حزبی خاوەن چەندان کەناڵی ئاسمانی بن، هەمووی لەسەر قووتی خەڵک بەڕێوە بچن، حزب نابێ کلکایەتی لەگەڵ داگیرکەران بکات و لەسەرحسابی خاک و نیشتمان بۆ بەرژەوەندی حزب و بنەماڵەی حزبی سیاسی نابێ کۆمپانیای هەبێ و قۆرغی بازاڕ بکات، نابێ جومگە سەرەکییەکانی ئابووری بخاتە ژێر ڕکێفی حزب، کە بەهۆی ئەمانەوە قەیران و برسێتی و بێکاری تین بۆ خەڵک دێنن و خەڵک نەک لەگەڵ حزب نامێنێتەوە، بەڵکو دژیشی دەوەستنەوە ⸮

ئەگەر ڕاپرسییەکی سەرپێییانە بکەین، لەسەر حزبی یەکەمی دەسەڵات و هەوادار و ئەندامانی هەمووی هەڵوەریون و زۆر لاوازن، لەبەرئەو ئەو هۆکارانەی باسمانکردن، لە بەشێکی زۆری حزبە سیاسییەکانی کوردستان دەبینرێ، حزبی یەکەمی دەسەڵات هەڵوەرینی لە هەموویان زیاترە، بەڵام بەهۆی ئەوەی جومگە سەرەکییەکانی ئابوری لە دەستە و بۆخۆی قۆرغی کردوون هەڵوەرینەکەی پەردەپۆش کردووە.