وتار

دەسەڵاتی سەر کەندەڵان

1/2/2021 1:12:00 PM 554 جار خوێندراوەتەوە
یوسف مەنتک

 
حکومەت: دەستور، یاسا، دامەزراوەی جیددی، کادروفەرمانبەری پسپۆڕو دلسۆزی دەبێت، واتە لەسەر کۆمەلێک پایەی پتەوبیناکراوە.
ئەوەی پێی دەگووترێ حکومەتی هەرێمی کوردستان، حکومەت نییە، بەڵکو دەسەلاتێکی کوردی پاوانخوازی دەسەڵاتخوازە، لە فۆڕمی حکومەت خۆی دەناسێنێ،  ئەم جۆرە دەسەڵاتە هیچ کاتێک ناتوانێت ببێت بە فەرمانڕەوایی هەقیقی و وەک حکومەتێک کارەکانی ئەنجامبدات، پێکهاتەی دەسەڵاتەکە لە دوو یا سێ حیزبی سەرەکی و  کۆپی وردە حیزب پێکهاتووە، ئەوانیش دابەش بوون بەسەر حیزبە سەرەکییەکان کە پێکهاتوون لە چەند بنەماڵەیەکی دەسەڵاتخوازی بەژەوەندخواز، هەمان ئەو ئەزموون و فۆرمەی حیزب بە باڵای دەسەڵات ( حکومەت) دا بڕاوە، کادران و فەرمانبەرانی ئەم دەسەڵاتەش لە ئەندامانی بنەماڵەی حزبی دەستڕۆیشتوو و دەست و پێوەندو کۆیلەکانیان پێکهاتوون، دەسەڵاتەکە بریتین لە دزو تاڵانچی، ئامانجی سەرەکیان: دابەشکردنی داهات ومانەوەیان لە حوکمرانی، بۆ بەردەوامی مانەوەیان: ناشەفافی و تەسلیم بوون بە داگیرکەرانی کورستان.
لایەنەکانی نێو دەسەڵات هەمیشە لەگەڵ یەکتر ناکۆک و ناڕاست و لە جەنگدان، بۆیە ئەم جۆرە دەسەڵاتە بەردەوام لە دڵە راوکێی و مەترسیدایە، وەک ئەوە وایە بینایەکی پەڕپووت لەسەر کەندڵاندێک بیناکرابێت، هەر زریانێک یا شەپۆلێکی بەهێزبێت ڕای دەماڵێت. واتە دەسەڵاتی(حکومەتی)  هەرێمی کوردستانی/ ئێراق، لەسەر کەندەڵان بیناکراوە.

شۆڕشی کورد دەسەڵاتێکی دزو درۆزن و ناشەفاف و تیرۆرو تۆقاندنی ‌هاوڵاتیانی بەرهەم هێنا، نموونەی: نازیزمی هیتلەر، فاشیزمی مۆسۆلینی و فرانکۆ، سۆشیالیزمی ستالین، تورکیزمی عوسمانی و کەمالی و ئەردۆغانی، ئێرانی اسلامی و زۆرێک لە وڵاتانی عەرەبی.
دەسەڵاتدارانی کوردستان ستەمکاری پیادە دەکەن، کە شۆڕشیان کرد درووشمی ئازادی و سەربەخۆییان هەڵکردبوو، زۆرێک لەوانەی باوەڕیان بەم درووشمانە هەبوو بوونە قوربانی و شەهید بوون، ئەوانەی مانەوەش ئەوانەن کە ئێستا دەسەڵاتیان گرتۆتە دەست و کۆمەلێک درووشمی وەک: مافی مرۆڤ. دیموکراسی، تەبایی وبرایەتی، دادپەروەریی، ئاشتی، خۆشگوزەرانی، هەڵی کار، چاکسازی، دژە گەندەڵیان بەرزکردۆتەوە، ئەوەش تەنیا بۆ فریودان وخۆڵ کردنە چاوی ‌هاوڵاتییانە، تاکی کورد بۆتە بوکەڵە بە دەستی حیزب وسەرکردەوپیاوانی ئاینییەوە.

مڵملانێیەک نزیکەی شەست ساڵە ڕادەکێشت، کەس نازانێت لە پێناوی چییە، لە غەیری ماڵوێرانی بۆ کورد، زۆرینەی تاکی کورد خۆی ونکردووە، بوونەتە کۆیلە بەدوای حیزب و سەرکردە کەوتوون، دەسەڵاتی ستەمکار تەوای کۆمەڵگەی داگیرکردووە، ئازادی تاکی تا بیناقاقا خنکاندووە، کۆمەڵگەیەکی کۆیلەی نا هۆشیاری بنیاکردووە، کەتوونەتە ژێر کاریگەری دەسەڵاتێکی ئەقڵی پاوانخواز وکۆنەخوازو ژن کوژو ئازادی کوژ.

لە هەقیقەتدا گوتاری دەسەڵات، هۆشیارکردنەوەو ڕزگارکردنی مرۆڤەکانە، نرخ و بەهای مرۆڤ بەرز سەیر بکرێت، خۆشگوزەرانیان بۆ دابینبکات، ئاسایشیان بپارێزیت، لەبری هەموو ئەم مافانە، دەبینین دەسەڵاتخوازی ستەمکار چی عەشرێک بە هاوڵاتیان دەکات.

بەداخەوە ڕۆشنبیرانیش نەیانتوانیوە رۆڵی کاریگەری خۆیان ببینن لە هۆشیارکردنەوە، بەڵکو زۆرینەیان چوونەتە باوەشی دەسەڵات و لەشکری کۆیلانیان گەورەتر کردووە.

ئەوە خەڵکە دەسەڵاتێکی زاڵمیان درووستکردووە، لە جیاتی خۆ دروستکردن!، دەبێت دەسەڵاتی ڕەها لای گەل بێت، نەک لای ستەمکار، هەر کات پێویست بوو دەسەلات بگۆڕن، کەچی ژیانی مرۆڤی کورد وەک خواوەند بریاری دابێت بەشی پەنابردن بێت بۆ : خۆ کوشتن، کۆچکردن، دزیکردن، خیانەتکردن، گەندەڵی. مانایەک بۆ ژیانی تاک نەماوەتەوە وەک بەردەکەی سیزیف هەمیشە دەبێت لەسفرەوە دەست پێبکەنەوە، بۆ ئەبەد هەر لە عەزابدا بژین.

باشترین چارەسەر ئەوەیە تاکی کورد بەدوای خۆیدا بگەڕێت و خۆی بدۆزێتەوە، خۆی دروستبکات، نەک زاڵم.

سۆشیال میدیا

ڕۆژنامەی زەمەن