شەپۆلێکی بەهێزی شەستە باران و تەرزە و هەورە بروسکە دەستپێدەکات
04:36 - 27/04/2026
زەمەن_هەواڵ
کەشناسی هەرێم ڕایگەیاند: سبەی تاوە باران و تەرزە و هەورە بروسکە، ناوچە جیاجیاکانی هەرێم دەگرێتەوە.
ئەمڕۆ دووشەممە، ٢٧ی نیسانی ٢٠٢٦، بەڕێوەبەرایەتی گشتی کەشناسی و بومەلەرزەزانی هەرێم، کەشی ٤٨ کاتژمێری داهاتووی بڵاوکردەوە ڕایگەیاند: سبەی لەئەنجامی کاریگەری بەهێزی نزمەپاڵەپەستۆی دەریای سوور و بارستە هەوایەکی زۆر سارد لە چینە بەرزەکانی بەرگەهەوادا لەکاتەکانی بەرەبەیانەوە تاو تاو باران و هەورە بروسکە سەرەتا ناوچەکانی سنوری ئیدارەی گەرمیان و پارێزگای سلێمانی و هەڵەبجە و کەرکوک دەگرێتەوە و پاشان لەکاتەکانی نیوەرۆوە کاریگەری فراوانتر ئەبێت بە مامناوەندی تاوە باران و تەرزە و هەورە بروسکە ناوچەکانی سنوری ئیدارەی راپەرین و سۆران و سنوری پارێزگای هەولێر و دهۆکیش ئەگرێتەوە.
ئاماژەی بەوەشداوە، لەناوچەکانی سنوری پارێزگای سلێمانی و هەڵەبجە و کەرکوک و ئیدارەی گەرمیان هەر لەکاتەکانی نیوەرۆ بەدواوە بۆ کاتەکانی شەو کاریگەری ئەو حاڵەتە بەهێزتر ئەبێت و لەزۆربەی شوێنەکان ئەگەری شەستە بارانی بەهێز و تەرزە و هەورە بروسکەی توند ئەبێت و لەهەندێ شوێنیشدا ئاستی ئاو بەرزدەبێتەوە.
کەشناسی دەشڵێت: پلەکانی گەرما بەڕاورد بە ئەمڕۆ سێ تا چوار پلە نزمدەبنەوە و خێرای با چالاک ئەبێت.
لەبارەی کەشی ڕۆژی چوارشەممەوە، کەشناسی بڵاویکردووەتەوە، کاریگەری ئەو ناجێگیریە بە شێوەیەکی بەهێز لەسەر ناوچەکانمان ئەمێنێتەوە بەتایبەت بۆ ناوچەکانی سنوری پارێزگای دهۆک و دەڤەری بادینان و ناوچەکانی سنوری ئیدارەی سۆران و راپەرین کاریگەریەکانی بەهێزتر ئەبێت و ئەگەری شەستە باران و تەرزە و بروسکەی توند ئەبێت لەگەڵ دروستبوونی لافاو لەهەندێ شوێندا.
هاوکات، ڕاشیگەیاندووە، لەسنوری پارێزگای سلێمانی و هەڵەبجە و کەرکوکی و باکوری گەرمیان و سەنتەری پارێزگای هەولێر ناوبەناو تاوە بارانی بەخوڕ و تەرزە و هەورە بروسکە چالاک ئەبێتەوە و پلەکانی گەرماش بەرێژەی یەک بۆ دوو پلە نزمترئەبنەوە، بەگشتی چوارشەمە لەکاتەکانی ئێوارەوە کاریگەری ئەم شەپۆلە لاواز ئەبێت کەش جێگیر ئەبێتەوە.